భారత ఈవీ మార్కెట్లోకి సుజుకి ఎంట్రీ.. ధ‌ర ఎంతంటే?!

Suzuki e-Access: దేశీయంగా ఎలక్ట్రిక్ వాహనాలకు పెరుగుతున్న డిమాండ్‌ను దృష్టిలో ఉంచుకుని ప్రముఖ జపనీస్ సంస్థ సుజుకి మోటార్‌సైకిల్ ఇండియా తన మొట్టమొదటి ఎలక్ట్రిక్ స్కూటర్ ‘సుజుకి ఇ-యాక్సెస్’ను భారత మార్కెట్లోకి విడుదల చేసింది. నమ్మకమైన బ్రాండ్ ఇమేజ్, ఆకర్షణీయమైన ఫీచర్లు, అదిరిపోయే ఆఫర్లతో ఈ స్కూటర్‌ను కంపెనీ లాంచ్ చేసింది.

ధర, బుకింగ్ వివరాలు

సుజుకి ఇ-యాక్సెస్ ధరను రూ. 1,88,490 (ఎక్స్-షోరూమ్)గా నిర్ణయించారు. ఈ స్కూటర్ బుకింగ్‌లు ఇప్పటికే ప్రారంభమయ్యాయి. కస్టమర్లు దేశవ్యాప్తంగా ఉన్న సుజుకి డీలర్‌షిప్‌లలో లేదా ఆన్‌లైన్ ప్లాట్‌ఫారమ్ Flipkart ద్వారా కూడా దీనిని బుక్ చేసుకోవచ్చు. ఇటీవల జరిగిన ‘భారత్ మోబిలిటీ గ్లోబల్ ఎక్స్‌పో 2025’లో దీనిని మొదటిసారి ప్రదర్శించారు.

కస్టమర్ల కోసం బంపర్ ఆఫర్లు

కొత్త స్కూటర్ కొనుగోలుదారుల కోసం సుజుకి అద్భుతమైన ఆఫర్లను ప్రకటించింది. ఎటువంటి అదనపు ఖర్చు లేకుండా 7 ఏళ్లు లేదా 80,000 కిలోమీటర్ల వరకు ఎక్స్‌టెండెడ్ వారంటీ. 3 ఏళ్ల తర్వాత స్కూటర్ ధరలో 60% వరకు తిరిగి ఇచ్చే బై-బ్యాక్ అష్యూరెన్స్ (ప్రారంభ ఆఫర్). పాత సుజుకి కస్టమర్లకు రూ. 10,000 లాయల్టీ బోనస్, కొత్త వారికి రూ. 7,000 వెల్‌కమ్ బోనస్. కేవలం 5.99% వడ్డీ రేటుతో ఫైనాన్స్ సౌకర్యం.

బ్యాటరీ, రేంజ్, పనితీరు

ఈ స్కూట‌ర్‌లో 3.07 kWh లిథియం ఐరన్ ఫాస్ఫేట్ బ్యాటరీ ఉంది. ఒక్కసారి ఫుల్ ఛార్జ్ చేస్తే 95 కిలోమీటర్ల వరకు ప్రయాణించవచ్చు. గంటకు గరిష్టంగా 71 కి.మీ. వేగంతో వెళ్తుంది. 5.49 bhp పవర్, 15 Nm టార్క్‌ను ఉత్పత్తి చేస్తుంది.

Also Read: భక్తుల మనోభావాలతో చెలగాటమాడితే సహించేది లేదు: మంత్రి వాసంశెట్టి సుభాష్

ఛార్జింగ్- రైడ్ మోడ్స్

సుజుకి ఇ-యాక్సెస్‌తో పోర్టబుల్ ఛార్జర్ లభిస్తుంది. సాధారణ ఛార్జర్‌తో ఫుల్ ఛార్జ్ కావడానికి 6 గంటల 42 నిమిషాలు పడుతుంది. ఫాస్ట్ ఛార్జర్ ద్వారా కేవలం 2 గంటల 12 నిమిషాల్లోనే ఛార్జింగ్ పూర్తవుతుంది. ఇందులో ఇకో (Eco), రైడ్ A, రైడ్ B వంటి మోడ్స్‌తో పాటు రివర్స్ మోడ్ కూడా ఉంది.

స్టైలిష్ డిజైన్, కలర్స్

ఈ స్కూటర్ నాలుగు డ్యూయల్-టోన్ కలర్ ఆప్షన్లలో లభిస్తుంది.

• మెటాలిక్ మ్యాట్ బ్లాక్ విత్ మెటాలిక్ మ్యాట్ బోర్డియక్స్ రెడ్.
• పెర్ల్ గ్రేస్ వైట్ విత్ మెటాలిక్ మ్యాట్ ఫిబ్రోయిన్ గ్రే.
• పెర్ల్ జేడ్ గ్రీన్ విత్ మెటాలిక్ మ్యాట్ ఫిబ్రోయిన్ గ్రే.
• మెటాలిక్ మ్యాట్ స్టెల్లార్ బ్లూ విత్ మెటాలిక్ మ్యాట్ ఫిబ్రోయిన్ గ్రే.

తేలికపాటి, బలమైన ఛాసిస్‌తో రూపొందించబడిన ఈ స్కూటర్ పట్టణ ప్రాంత వినియోగదారులకు ఒక అద్భుతమైన ఎంపికగా నిలవనుంది. ముఖ్యంగా ఇందులోని మెయింటెనెన్స్-ఫ్రీ డ్రైవ్ బెల్ట్ 7 ఏళ్ల పాటు మన్నికనిస్తుందని కంపెనీ పేర్కొంది.