ఆంధ్రప్రదేశ్‌లో వైసీపీ అధినేత , మాజీ సీఎం జగన్ మోహన్ రెడ్డి పర్యటన (Jagan Tour) అంటే సాధారణ ప్రజలే కాదు, సొంత పార్టీ శ్రేణులు సైతం భయపడుతున్న పరిస్థితి నెలకొంది. దీనికి ప్రధాన కారణం, జగన్ పర్యటనల సందర్భంగా చోటు చేసుకుంటున్న ప్రమాదాలు, నిబంధనల ఉల్లంఘనలు. కాన్వాయ్ ఎక్కడ జనాలపైకి దూసుకువస్తుందో, ఎవరు ప్రాణాలు కోల్పోతారో, ఎన్ని పోలీస్ కేసులు నమోదవుతాయో అని ఆందోళన చెందుతున్నారు. ఇలాంటి ఘటనలు ప్రతిసారి జగన్ పర్యటనల్లో పునరావృత్తం అవుతూనే ఉన్నాయి.
తాజాగా జగన్ నెల్లూరు పర్యటనలోనూ నిబంధనలు ఉల్లంఘించారనే ఆరోపణలతో మూడు కేసులు నమోదయ్యాయి. ఒక సంఘటనలో ప్రసన్న కుమార్ ఇంటికి వెళ్లే దారిలో వైసీపీ నాయకులు బారికేడ్లను లాగేయడంతో ఒక కానిస్టేబుల్ చేయి విరిగింది. ఈ ఘటనకు సంబంధించి ప్రసన్న కుమార్ తో పాటు పలువురు వైసీపీ నాయకులపై కేసు నమోదైంది. ఈ తరహా ఘటనలు పర్యటనల నిర్వహణలో భద్రతా లోపాలను, అతి ఉత్సాహాన్ని స్పష్టం చేస్తున్నాయి.
AP Liquor Scam: వచ్చే వారం సంచలనాలు జరగబోతున్నాయా..?
అంతేకాకుండా రోడ్డుపై ధర్నా చేసి ట్రాఫిక్‌కు తీవ్ర అంతరాయం కలిగించినందుకు దర్గామిట్ట పోలీసులు మరో కేసు నమోదు చేశారు. అలాగే అనుమతి లేకుండా బైక్ ర్యాలీ నిర్వహించినందుకు కూడా కేసు నమోదైంది. పర్యటనల సమయంలో ప్రజలకు అసౌకర్యం కలగకుండా, ట్రాఫిక్ సమస్యలు తలెత్తకుండా చూడాల్సిన బాధ్యత ప్రభుత్వానిదే. కానీ, ఇటువంటి సంఘటనలు ప్రజలకు తీవ్ర అసౌకర్యం కలిగిస్తున్నాయి.
ప్రమాదాలు, భద్రతాపరమైన లోపాలు, మరియు నిబంధనల ఉల్లంఘనలు పునరావృతం అవుతుండటంతో జగన్ పర్యటనలంటే ఒకరకమైన భయాందోళన వ్యక్తమవుతోంది. ప్రజల భద్రతకు, పర్యటనల క్రమబద్ధతకు ప్రాధాన్యత ఇవ్వాల్సిన అవసరం ఉందని పలువురు అభిప్రాయపడుతున్నారు. భవిష్యత్తులో ఇటువంటి ఘటనలు పునరావృతం కాకుండా తగిన జాగ్రత్తలు తీసుకోవాలని సామాన్య ప్రజలు కోరుతున్నారు.