Sajjala Ramakrishna Reddy : తాడేపల్లిలో నిర్వహించిన వైఎస్‌ఆర్‌సీపీ స్వాతంత్ర్య దినోత్సవ వేడుకల్లో రాష్ట్ర కోఆర్డినేటర్ సజ్జల రామకృష్ణారెడ్డి కీలక వ్యాఖ్యలు చేశారు. పులివెందుల చరిత్రలో వైఎస్‌ఆర్‌సీపీ ఎన్నడూ ఓడిపోలేదని గుర్తు చేస్తూ, ఆ ప్రాంత ప్రజల విశ్వాసం ఏదీ తేలికగా బలహీనపడదని అన్నారు. జడ్పీటీసీ ఉప ఎన్నికల విషయాన్ని ప్రస్తావిస్తూ, ఈ ఎన్నికల్లో తాము ఎదుర్కొన్న అన్యాయాలపై న్యాయపోరాటం కొనసాగుతుందని ఆయన స్పష్టం చేశారు. వైఎస్‌ఆర్‌సీపీ అధ్యక్షుడు జగన్ మోహన్ రెడ్డి నిజమైన విలువలతో నడిచే నాయకుడని, ఆయన ప్రజల భద్రతను మొదటిప్రాధాన్యతగా చూసే వ్యక్తి అని అన్నారు. జడ్పీటీసీ ఉప ఎన్నికలో ప్రభుత్వ యంత్రాంగాన్ని కూటమి నేతలు తమ చేతుల్లోకి తీసుకుని, అన్ని వ్యవస్థల్ని నిర్వీర్యం చేశారని ఆరోపించారు. అయినా జగన్ వ్యవహరించిన విధానం శాంతియుతంగా, సమతౌల్యంగా ఉందని తెలిపారు.
ఎన్నికల సంఘం పాక్షికంగా కాకుండా, గుడ్డిగా వ్యవహరించిందని సజ్జల విమర్శించారు. సీసీ ఫుటేజ్, వెబ్ కాస్టింగ్ వివరాలు ఇవ్వమన్నా, ఎన్నికల సంఘం అందించలేదని ఆయన ఆగ్రహం వ్యక్తం చేశారు. ఈ విధమైన వ్యవహారం ప్రజాస్వామ్యాన్ని చెరిపివేసే ప్రయత్నంగా అభివర్ణించారు. మేము కూడా ఢీ అంటే ఢీ అని ఎదురుగా వచ్చి ఉండాల్సిందేమో. కానీ ప్రజల ప్రాణాలకు ప్రమాదం కలగకూడదనే దృక్పథంతో మేము వెనక్కి తగ్గాం అని అన్నారు సజ్జల. ఓటింగ్ కేంద్రాల్లో వైఎస్సార్సీపీ ఏజెంట్లను అనుమతించకుండా, ఒకపక్క 15 బూత్‌లకు 2000 మంది పోలీసులు నియమించడం చాలా స్పష్టమైన కుట్ర అని మండిపడ్డారు. ఇంతటి భారీ పోలీసు బలగాల నియామకంతో ఓటింగ్ స్వేచ్ఛకు తూట్లు పడ్డాయని అన్నారు. ఇంటింటికీ వెళ్లి చూస్తే ఎంతమంది ఓటు వేశారో, ఎవరెవరి వేలికి సిరా వేసారో స్పష్టమవుతుందని చెప్పారు. ఈ విషయం మీద ప్రజలే తీర్పు చెప్పాలన్నారు. ఈ సందర్భంగా సజ్జల ప్రజలను ఉద్దేశించి మన ప్రజాస్వామ్యాన్ని మనమే రక్షించుకోవాలి. అధికార యంత్రాంగం మిమ్మల్ని అణచివేయాలని చూస్తుంటే, మీరు ఓటు అనే శక్తితో మీ గళాన్ని వినిపించాలి అని పిలుపునిచ్చారు. జగన్ నాయ‌క‌త్వాన్ని మద్దతుగా నిలబడి, ప్రజాస్వామ్య విలువల కోసం పోరాడాల్సిన అవసరం ఇప్పుడు ఎంతైనా ఉందని సజ్జల హితవు పలికారు. పార్టీని ఆదరించే ప్రతి కార్యకర్త, ప్రతి ఓటరు చైతన్యంతో ముందుకు రావాలని కోరారు.