తెలుగుదేశం పార్టీ రాజకీయ ప్రస్థానంలో ఒక నూతన అధ్యాయం మొదలైంది. పార్టీ వ్యవస్థాపక దినోత్సవాల నేపథ్యంలో, యువ నాయకత్వానికి పట్టం కడుతూ నారా లోకేశ్ జాతీయ వర్కింగ్ ప్రెసిడెంట్గా బాధ్యతలు చేపట్టడం ఏపీ రాజకీయాల్లో హాట్ టాపిక్గా మారింది. మంగళగిరిలోని టీడీపీ కేంద్ర కార్యాలయం ఎన్టీఆర్ భవన్లో నారా లోకేశ్ పట్టాభిషేకం అట్టహాసంగా జరిగింది. పార్టీ అధినేత, ముఖ్యమంత్రి నారా చంద్రబాబు నాయుడు సమక్షంలో లోకేశ్ టీడీపీ జాతీయ వర్కింగ్ ప్రెసిడెంట్గా ప్రమాణస్వీకారం చేశారు. గత ఎన్నికల్లో మంగళగిరి నుంచి రికార్డు మెజారిటీతో విజయం సాధించి, మంత్రిగా తనదైన ముద్ర వేస్తున్న లోకేశ్.. ఇప్పుడు పార్టీ వ్యవహారాల్లో పూర్తిస్థాయిలో బాధ్యతలు తీసుకోనున్నారు. ఈ సందర్భంగా పార్టీ శ్రేణులు పెద్ద ఎత్తున కార్యాలయానికి చేరుకుని సంబరాలు చేసుకున్నాయి.
యువతకు, అనుభవానికి పెద్దపీట
లోకేశ్తో పాటు పార్టీకి మరింత ఊపు తెచ్చేందుకు జాతీయ స్థాయి కార్యవర్గాన్ని కూడా ప్రకటించారు. మొత్తం 18 మందిని జాతీయ ఉపాధ్యక్షులుగా ఎంపిక చేసి, వారితో ప్రమాణస్వీకారం చేయించారు. ఇందులో సీనియర్ నాయకులతో పాటు సామాజిక సమీకరణాలను బ్యాలెన్స్ చేస్తూ నూతన కార్యవర్గాన్ని చంద్రబాబు తీర్చిదిద్దారు. లోకేశ్ నేతృత్వంలో ఈ బృందం అటు ఆంధ్రప్రదేశ్, ఇటు తెలంగాణతో పాటు జాతీయ రాజకీయాల్లో పార్టీ వాయిస్ను బలంగా వినిపించేలా కార్యాచరణ సిద్ధం చేసింది.
యువ రక్తం.. కొత్త ఉత్సాహం
పార్టీలో యువ రక్తాన్ని నింపి, డిజిటల్ యుగానికి అనుగుణంగా పార్టీని ఆధునీకరించడం లోకేశ్ ముందున్న ప్రధాన లక్ష్యం. ఇప్పటికే ‘యువగళం’ పాదయాత్ర ద్వారా ప్రజలకు చేరువైన ఆయన, ఇకపై కేడర్ను ఎన్నికల దిశగా ఎప్పుడూ సిద్ధంగా ఉంచే బాధ్యతను భుజాన వేసుకోనున్నారు. ముఖ్యంగా యువతను పార్టీ వైపు ఆకర్షించడం, ఐటీ మరియు సోషల్ మీడియా విభాగాలను బలోపేతం చేయడంలో లోకేశ్ కీలకంగా వ్యవహరించనున్నారు. చంద్రబాబు పాలనపై దృష్టి సారిస్తుంటే, లోకేశ్ పార్టీ సంస్థాగత బలాన్ని పెంచడంపై దృష్టి పెడతారని సమాచారం.