రైల్వేకోడూరు జనసేన ఎమ్మెల్యే అరవ శ్రీధర్పై వచ్చిన లైంగిక వేధింపుల ఆరోపణలు, తాజాగా బాధిత మహిళపై జరిగిన దాడి ఉదంతం ఏపీ రాజకీయాల్లో పెను సంచలనంగా మారాయి. ఈ వ్యవహారంలో జనసేన అధినేత పవన్ కళ్యాణ్ మౌనంపై విమర్శలు వెల్లువెత్తుతున్నాయి. రైల్వేకోడూరు జనసేన ఎమ్మెల్యే అరవ శ్రీధర్ ఒక మహిళా ఉద్యోగినిని లైంగికంగా వేధించారనే ఆరోపణలు రాష్ట్రవ్యాప్తంగా చర్చనీయాంశమయ్యాయి. సదరు బాధిత మహిళ వరుస వీడియోలు విడుదల చేస్తూ, ఎమ్మెల్యే కారణంగా తాను ఐదుసార్లు అబార్షన్ చేయించుకోవాల్సి వచ్చిందని ఆవేదన వ్యక్తం చేశారు. ఈ ఘటనపై తొలత స్పందించిన జనసేనాని పవన్ కళ్యాణ్, ఒక త్రిసభ్య కమిటీని నియమించి విచారణకు ఆదేశించారు. అయితే, కమిటీ నివేదిక సమర్పించి రెండు నెలలు గడుస్తున్నా, అందులో ఏముందో బహిర్గతం కాలేదు. అటు పార్టీ పరంగా ఎమ్మెల్యేపై ఎలాంటి చర్యలు తీసుకోకపోవడంతో, ఆయన మళ్లీ దర్జాగా పార్టీ మరియు ప్రభుత్వ కార్యక్రమాల్లో పాల్గొనడం మొదలుపెట్టారు. ఇది బాధితురాలికి మరియు సామాన్య ప్రజలకు తప్పుడు సంకేతాలను పంపిందనే విమర్శలు వ్యక్తమవుతున్నాయి.
బాధిత మహిళపై భౌతిక దాడి
తమకు జరిగిన అన్యాయంపై బాధితురాలు మళ్లీ ప్రశ్నించడం ప్రారంభించడంతో ఈ వివాదం మరో మలుపు తిరిగింది. ఇటీవల ఆమె స్థానిక టీడీపీ ఇంచార్జ్ను కలిసి ఫిర్యాదు చేయడంతో పరిస్థితి జఠిలంగా మారింది. ఈ క్రమంలో జనసేన అధికార ప్రతినిధి తాతంశెట్టి నాగేంద్ర మరియు ఆయన అనుచరులు నడిరోడ్డుపై సదరు మహిళపై భౌతిక దాడికి దిగడం కలకలం సృష్టిస్తోంది. పోలీసుల లాఠీని లాక్కొని మరీ దాడికి పాల్పడటం వీడియోల్లో స్పష్టంగా కనిపించడంతో పార్టీ పరువు రోడ్డున పడిందని విశ్లేషకులు భావిస్తున్నారు. ఒక తప్పును కప్పిపుచ్చుకోవడానికి మరో తప్పు చేస్తున్నారన్న అభిప్రాయం వ్యక్తమవుతోంది. ఎమ్మెల్యేపై చర్యలు తీసుకోకపోగా, ప్రశ్నిస్తున్న మహిళపై దాడులు చేయడం పార్టీ శ్రేణుల్లోనే అసంతృప్తిని కలిగిస్తోంది.
ప్రశ్నించే తత్వం ఏది? పవన్ కళ్యాణ్ మౌనంపై విమర్శల వర్షం
“మహిళలకు అన్యాయం జరిగితే తాట తీస్తా” అని వేదికలపై ఆవేశంగా ప్రసంగించే పవన్ కళ్యాణ్, తన సొంత పార్టీ ఎమ్మెల్యే విషయంలో ఎందుకు మౌనంగా ఉన్నారనే ప్రశ్నలు ఇప్పుడు అందరినీ వెంటాడుతున్నాయి. ప్రశ్నించడానికే పార్టీ పెట్టానని చెప్పే జనసేనాని, ఇప్పుడు తన పార్టీ నేతలే ప్రశ్నార్థకమైన పనులు చేస్తున్నా స్పందించకపోవడం ప్రత్యర్థులకు బలమైన అస్త్రంగా మారింది. ఒకవేళ ఎమ్మెల్యే తప్పు చేయలేదని పార్టీ నమ్మితే, ఆ విషయాన్ని అధికారికంగా ఎందుకు ప్రకటించడం లేదన్నది సామాన్యుల ప్రశ్న. ప్రస్తుతం ఈ ఇష్యూ మరింత వివాదాస్పదమైన నేపథ్యంలో, అరవ శ్రీధర్ మరియు దాడికి పాల్పడిన తాతంశెట్టిలపై పవన్ కళ్యాణ్ ఎలాంటి నిర్ణయం తీసుకుంటారో వేచి చూడాలి. ఈ ఎపిసోడ్ జనసేన పార్టీ నైతిక విలువలను పరీక్షించేదిగా మారింది.