Ashok Gajapathi Raju : తెలుగుదేశం పార్టీ సీనియర్‌ నాయకుడు, కేంద్ర మాజీ మంత్రి పూసపాటి అశోక్‌ గజపతిరాజు గోవా రాష్ట్ర గవర్నర్‌గా నియమితులయ్యారు. ఈ సందర్బంగా రాష్ట్రవ్యాప్తంగా ఆయనకు శుభాకాంక్షల వెల్లువెత్తింది. ముఖ్యమంత్రి నారా చంద్రబాబు నాయుడు, మంత్రి నారా లోకేశ్‌, స్పీకర్‌ అయ్యన్నపాత్రుడు, డిప్యూటీ సీఎం పవన్‌ కల్యాణ్‌ సహా పలువురు ప్రముఖులు అభినందనలు తెలిపారు. గవర్నర్‌గా అశోక్‌ గజపతిరాజు నియామకం ఆంధ్రప్రదేశ్‌ ప్రజలకు గర్వకారణమని ముఖ్యమంత్రి చంద్రబాబు అన్నారు. రాజకీయ, పరిపాలనా అనుభవం అశోక్‌గారికి వాస్తవికంగా ఉన్నదని, ఆయన రాజ్యాంగ బాధ్యతలను అత్యుత్తమంగా నిర్వర్తిస్తారని విశ్వాసం వ్యక్తం చేశారు. ఈ సందర్భంగా గవర్నర్‌గా ఆయనను నియమించిన రాష్ట్రపతి ద్రౌపది ముర్ము, ప్రధానమంత్రి నరేంద్ర మోడీకి కృతజ్ఞతలు తెలిపారు. అశోక్‌ గజపతిరాజు గారు తమ గౌరవప్రదమైన పదవిని సమర్థంగా నిర్వహించి, ప్రజలకు ఆదర్శంగా నిలుస్తారని ఆశిస్తున్నాను అని సీఎం అన్నారు.
Read Also: PF Money: పీఎఫ్ ఖాతాలో ఉన్న మొత్తం డ‌బ్బును ఒకేసారి డ్రా చేయొచ్చా?
ఇక, ఐటీ, పట్టణాభివృద్ధి శాఖ మంత్రి నారా లోకేశ్‌ కూడా అశోక్‌ గజపతిరాజుకు హృదయపూర్వక శుభాకాంక్షలు తెలియజేశారు. నిజాయితీ, నిబద్ధత, పరిపక్వత ఉన్న నాయకుడు గవర్నర్‌ పదవికి వన్నె తెస్తారు. ఆయన ఈ బాధ్యతను సమర్థంగా నిర్వర్తిస్తారని నమ్మకం ఉంది అని పేర్కొన్నారు. రాష్ట్రపతి, ప్రధానమంత్రులకు ఈ గౌరవాన్నిచ్చినందుకు కృతజ్ఞతలు తెలిపారు. ఆంధ్రప్రదేశ్‌ శాసనసభ స్పీకర్‌ అయ్యన్నపాత్రుడు కూడా గజపతిరాజుకు అభినందనలు తెలియజేస్తూ, ఆయన సేవలు మరోసారి ప్రజలకు ఉపయోగపడతాయని పేర్కొన్నారు. ఈ నేపథ్యంలో జనసేన పార్టీ అధినేత, రాష్ట్ర డిప్యూటీ సీఎం పవన్‌ కల్యాణ్‌ సోషల్‌మీడియా వేదికగా స్పందిస్తూ, అశోక్‌ గజపతిరాజుకు శుభాకాంక్షలు తెలియజేశారు. పూసపాటి గారు గోవా గవర్నర్‌గా ఎంపిక కావడం ఎంతో సంతోషకరం. ఆయన రాజ్యాంగ విలువలకు కట్టుబడి నిస్వార్థంగా సేవలందిస్తారని నమ్ముతున్నాను అని పవన్‌ తెలిపారు. కేంద్ర మాజీ మంత్రిగా, టీడీపీ కీలక నేతగా ఆయన అందించిన సేవలు గొప్పవని కొనియాడారు.
పూసపాటి అశోక్‌ గజపతిరాజు తెలుగు రాజకీయాల్లో విశిష్ట స్థానం సంపాదించారు. ఆయన కుటుంబం వైజాగ్‌ రాజవంశానికి చెందినది. బహుళ మంత్రిత్వ బాధ్యతలతో పాటు, అనేక కమిటీల్లో సభ్యుడిగా పనిచేశారు. రాష్ట్ర, జాతీయ స్థాయిలలో అనేక అభివృద్ధి కార్యక్రమాలకు ఊతమిచ్చారు. గవర్నర్‌ పధవిలోకి అడుగుపెట్టిన ఆయన, తన అనుభవంతో గోవా ప్రజలకు స్ఫూర్తిదాయక నాయకత్వాన్ని అందిస్తారని రాజకీయ వర్గాలు భావిస్తున్నాయి. ఈ నియామకంతో తెలుగుదేశం పార్టీ శ్రేణుల్లో హర్షాతిరేకాలు కనిపిస్తున్నాయి. కేంద్రంలో ఎన్డీయే కూటమి ప్రభుత్వం అశోక్‌గారిని గవర్నర్‌గా ఎంపిక చేయడం, టీడీపీకి బలాన్ని చేకూర్చిన సంఘటనగా పార్టీ వర్గాలు అభివర్ణిస్తున్నాయి. అశోక్‌ గజపతిరాజు నియామకం ద్వారా, తెలుగు రాజకీయ నాయకుల రాజ్యాంగ పదవుల్లో పాత్ర మరోసారి ప్రతిష్టాత్మకంగా నిలిచింది.