Donald Trump : మార్-ఎ-లాగో రిసార్ట్లోకి తుపాకీతో చొరబడేందుకు ప్రయత్నించిన ఆగంతుకుడిని సీక్రెట్ సర్వీస్ ఏజెంట్లు కాల్చి చంపిన ఘటనపై అమెరికా అధ్యక్షుడు డొనాల్డ్ ట్రంప్ తొలిసారి స్పందించారు. భద్రతా లోపంపై ఆయన ఒకవైపు ఆందోళన వ్యక్తం చేస్తూనే మరోవైపు తనదైన శైలిలో వ్యంగ్య వ్యాఖ్యలు చేయడం రాజకీయ వర్గాల్లో చర్చనీయాంశంగా మారింది. వైట్ హౌస్లో జరిగిన ఒక కార్యక్రమంలో పాల్గొన్న ట్రంప్ మాట్లాడుతూ.. “నేను ఇంకా ఎంతకాలం ఇక్కడ జీవించి ఉంటానో నాకు తెలియదు. నా కోసం తుపాకులు పట్టుకుని ఎంతమంది వేచి చూస్తున్నారో చూశారుగా?” అని వ్యాఖ్యానించారు. ఈ వ్యాఖ్యలు అక్కడున్నవారిలో కాసేపు నవ్వులు పూయించినప్పటికీ, భద్రతా వ్యవస్థలపై ఆయనకు ఉన్న ఆందోళన స్పష్టమైందని విశ్లేషకులు చెబుతున్నారు.
భద్రతపై ఆందోళన .. నాయకత్వంపై చమత్కారం
ట్రంప్ తన ప్రసంగంలో చరిత్రలోని ప్రభావశీల అధ్యక్షులను ప్రస్తావించారు. ముఖ్యంగా అబ్రహం లింకన్, జాన్ ఎఫ్. కెన్నెడీ వంటి నేతలను లక్ష్యంగా చేసుకున్న దాడులను గుర్తు చేశారు. గొప్ప నాయకులకే ఇలాంటి ముప్పులు ఉంటాయి. బహుశా నేను కొంచెం తక్కువ ప్రభావశీల నాయకుడిగా ఉంటే బాగుండేదేమో. కొంతసేపు సాధారణ అధ్యక్షుడిలా ఉండాలి అనిపిస్తోంది అని ఆయన చమత్కరించారు. ఈ వ్యాఖ్యలతో ట్రంప్ తనపై ఉన్న భద్రతా ముప్పులను రాజకీయంగా కూడా ఉపయోగించుకుంటున్నారనే అభిప్రాయాలు వ్యక్తమవుతున్నాయి. ఆయన వ్యాఖ్యల్లో సీరియస్ టోన్తో పాటు వ్యంగ్యపు చాయలు ఉండటం గమనార్హం.
అసలు ఘటన ఏంటి ?
ఫిబ్రవరి 22 తెల్లవారుజామున సుమారు 1:30 గంటల సమయంలో 21 ఏళ్ల ఆస్టిన్ టక్కర్ మార్టిన్ అనే యువకుడు మార్-ఎ-లాగో రిసార్ట్ ప్రహరీ గోడ దాటేందుకు ప్రయత్నించాడు. అతని వద్ద షాట్గన్తో పాటు ఇంధనంతో నిండిన క్యాన్ కూడా ఉన్నట్లు అధికారులు వెల్లడించారు. భద్రతా సిబ్బంది పలుమార్లు హెచ్చరించినప్పటికీ, అతడు వెనక్కి తగ్గలేదు. పైగా తుపాకీని ఎక్కుపెట్టడంతో పరిస్థితిని అదుపులోకి తీసుకురావడానికి సీక్రెట్ సర్వీస్ ఏజెంట్లు కాల్పులు జరిపారు. ఈ కాల్పుల్లో మార్టిన్ అక్కడికక్కడే మృతి చెందాడు. ఆ సమయంలో ట్రంప్ దంపతులు వైట్ హౌస్లోనే ఉన్నట్లు సమాచారం. ఘటన తర్వాత భద్రతను మరింత కట్టుదిట్టం చేసినట్లు అధికారులు తెలిపారు. ఈ సంఘటన రిసార్ట్ భద్రతా ఏర్పాట్లపై ప్రశ్నలు లేవనెత్తింది.
గత హత్యాయత్నాలు .. కొత్త అనుమానాలు
ఇది ట్రంప్పై జరిగిన మొదటి ముప్పు కాదు. గతంలో కూడా ఆయనపై రెండు సార్లు హత్యాయత్నాలు జరిగినట్లు వార్తలు వచ్చాయి. తాజా ఘటనలో మృతి చెందిన యువకుడు ప్రభుత్వంపై తీవ్ర అసహనంతో ఉన్నట్లు కొన్ని టెక్స్ట్ సందేశాల ద్వారా బయటపడినట్లు దర్యాప్తు సంస్థలు చెబుతున్నాయి. ముఖ్యంగా ఎప్స్టీన్ ఫైల్స్ విడుదల విషయంలో అతనికి అసంతృప్తి ఉన్నట్లు సమాచారం. ఈ సంఘటనతో అధ్యక్షుడి భద్రత, రాజకీయ ఉద్రిక్తతలు, సోషల్ మీడియా ప్రభావం వంటి అంశాలు మళ్లీ చర్చకు వచ్చాయి. ట్రంప్ చేసిన వ్యాఖ్యలు ఇప్పుడు అమెరికా రాజకీయాల్లో హాట్ టాపిక్గా మారాయి. భద్రతా లోపాలపై విచారణ కొనసాగుతుండగా అధ్యక్షుడి వ్యంగ్య స్పందన ప్రజల్లో మిశ్రమ ప్రతిస్పందన తెచ్చింది.