Twitter Employees: ఎలాన్‌ మస్క్‌.. మీ ఆలోచన సరైంది కాదు: ట్విట్టర్ ఉద్యోగులు

Elon Musk

ట్విట్టర్ కొనుగోలు ఒప్పందంలో నెలకొన్న సందిగ్ధత ఇంకా కొనసాగుతూనే ఉంది. ఒకవేళ టెస్లా అధినేత ఎలాన్‌ మస్క్‌ ట్విట్టర్ సొంతం చేసుకుంటే 75శాతం మంది ఉద్యోగుల్ని తొలగిస్తారని ఇటీవల వార్తలు వచ్చాయి. ఈనేపథ్యంలో కొంతమంది ఉద్యోగులు ఎలాన్‌ మస్క్‌కు బహిరంగ లేఖ రాశారు. సిబ్బందిని తొలగించాలన్న మస్క్‌ నిర్ణయం అనాలోచితమైందని ఉద్యోగులు లేఖలో పేర్కొన్నారు. ఉద్యోగులపై బహిరంగ బెదిరింపులకు దిగుతున్నట్లుగా భావించాల్సి ఉంటుందన్నారు.

మస్క్ తప్పనిసరిగా శుక్రవారం (అక్టోబర్ 28) నాటికి ట్విట్టర్ డీల్ ను పూర్తి చేయాలి. లేకుంటే డెలావేర్ కోర్టులో వ్యాజ్యాన్ని పునఃప్రారంభించాల్సి ఉంటుంది. మస్క్ తన ట్విటర్ సముపార్జనకు సంబంధించిన కాబోయే నిధులదారులతో మాట్లాడుతూ.. దాదాపు 75% ట్విటర్ సిబ్బంది ఉద్యోగాలను తొలగించడానికి యోచిస్తున్నానని, హెడ్‌కౌంట్‌ను 7,500 నుండి కేవలం 2,000కి తగ్గించినట్లు వాషింగ్టన్ పోస్ట్ గత వారం నివేదించిన విషయం తెలిసిందే.

సోమవారం ట్విట్టర్ ఉద్యోగులు ఈ విషయంపై ఓ బహిరంగ లేఖను మస్క్ కు రాశారు. “75% ట్విట్టర్ ఉద్యోగులను తొలగించాలనే మస్క్ ప్రణాళిక, పబ్లిక్ సంభాషణను అందించే ట్విట్టర్ సామర్థ్యాన్ని దెబ్బతీస్తుందని, ఇది కార్మికుల బెదిరింపులకు పారదర్శక చర్య” అని ఆ లేఖలో పేర్కొన్నారు ఉద్యోగులు. మస్క్ కంపెనీని టేకోవర్ చేస్తే ట్విటర్ ప్రస్తుత హెడ్‌కౌంట్‌ను కాపాడుకోవడానికి కట్టుబడి ఉండాలని లేఖలో రాశారు. రాజకీయ విశ్వాసాల ఆధారంగా ఉద్యోగుల పట్ల వివక్ష చూపకూడదని ట్విట్టర్ ఉద్యోగులు ఆ లేఖలో రాశారు.