ట్రంప్–మోదీల మధ్య విభేదాలు కూడా అలాంటివే : అమెరికా రాయబారి

. ట్రంప్–మోదీ మధ్య స్నేహం వాస్తవమే

. ద్వైపాక్షిక, వాణిజ్య సంబంధాలకు ప్రాధాన్యం

. వాణిజ్య ఒప్పందం, ఇతర రంగాల్లో సహకారం

Trump – Modi : భారతదేశం–అమెరికా మధ్య ఉన్న స్నేహ సంబంధాలకు బలమైన పునాదులు ఉన్నాయని అందులో భాగంగానే అమెరికా అధ్యక్షుడు డొనాల్డ్ ట్రంప్, భారత ప్రధానమంత్రి నరేంద్ర మోదీ మధ్య ఉన్న స్నేహబంధం నిజమైనదేనని భారత్‌కు నూతన అమెరికా రాయబారిగా బాధ్యతలు స్వీకరించిన సెర్గియో గోర్ స్పష్టం చేశారు. నిజమైన స్నేహితుల మధ్య కొన్ని అభిప్రాయ భేదాలు ఉండటం సహజమని అలాంటి భేదాలు ట్రంప్, మోదీ మధ్య కూడా కనిపించవచ్చని ఆయన అభిప్రాయపడ్డారు. అయితే అవి శాశ్వత విభేదాలు కాదని  పరస్పర గౌరవం, సంభాషణల ద్వారా వాటిని పరిష్కరించుకుంటూ ముందుకు సాగేందుకు ఇద్దరు నాయకులూ ఎప్పుడూ ప్రయత్నిస్తారని తెలిపారు. ఈ స్నేహమే ఇరు దేశాల బలమైన భాగస్వామ్యానికి నిదర్శనమని గోర్ అన్నారు.

భారతదేశం ప్రపంచంలోనే అతిపెద్ద ప్రజాస్వామ్య దేశమని ఆర్థికంగా కూడా వేగంగా ఎదుగుతున్న శక్తిగా నిలుస్తోందని సెర్గియో గోర్ పేర్కొన్నారు. ఇలాంటి దేశంతో అమెరికా సంబంధాలు మరింత బలోపేతం కావాల్సిన అవసరం ఉందన్నారు. ద్వైపాక్షిక, ముఖ్యంగా వాణిజ్య సంబంధాలను ఉన్నత స్థాయికి తీసుకెళ్లేందుకు తన వంతు కృషి చేస్తానని హామీ ఇచ్చారు. రెండు దేశాల మధ్య సత్సంబంధాలకు వాణిజ్యం కీలక పాత్ర పోషిస్తుందని పెట్టుబడులు, ఎగుమతులు–దిగుమతుల ద్వారా ఇరు దేశాల ఆర్థిక వ్యవస్థలకు లాభం చేకూరుతుందని వివరించారు. భారత్‌–అమెరికా భాగస్వామ్యం కేవలం వాణిజ్యానికే పరిమితం కాదని వ్యూహాత్మకంగా కూడా చాలా ముఖ్యమని అన్నారు.

వీలైనంత త్వరగా సమగ్ర వాణిజ్య ఒప్పందాన్ని కుదుర్చుకునేందుకు ఇరు దేశాల ప్రతినిధులు నిరంతరం సంప్రదింపులు జరుపుతున్నారని గోర్ వెల్లడించారు. ఈ ఒప్పందం ద్వారా రెండు దేశాల మధ్య వ్యాపారానికి మరింత ఊతం లభిస్తుందని ఆశాభావం వ్యక్తం చేశారు. వాణిజ్యంతో పాటు భద్రత, సాంకేతికత, ఆరోగ్యం, ఇంధనం వంటి కీలక రంగాల్లో కూడా పరస్పర సహకారం కొనసాగుతుందని చెప్పారు. ఉగ్రవాద నిరోధం, సైబర్ భద్రత, ఆధునిక సాంకేతిక పరిజ్ఞానం వంటి అంశాల్లో కలిసి పనిచేయాల్సిన అవసరం ఉందన్నారు. భారతదేశం అమెరికాకు అత్యంత ముఖ్యమైన భాగస్వామి అని స్పష్టం చేశారు. వాణిజ్య ఒప్పందానికి సంబంధించి జనవరి 13న ఇరు దేశాల ప్రతినిధులు మరోసారి సమావేశం కానున్నట్లు సెర్గియో గోర్ తెలిపారు. ఈ సమావేశం ఇరు దేశాల సంబంధాల్లో కీలక మలుపుగా మారే అవకాశం ఉందని ఆయన అభిప్రాయపడ్డారు. భారత్‌–అమెరికా స్నేహబంధం భవిష్యత్తులో మరింత బలపడుతుందని ఆయన విశ్వాసం వ్యక్తం చేశారు.