ప్రపంచ చమురు మార్కెట్లో ఊహించని పరిణామం చోటుచేసుకుంది. అంతర్జాతీయంగా ముడి చమురు (Crude oil) డిమాండ్ గణనీయంగా తగ్గడంతో, ప్రపంచంలోనే అతిపెద్ద చమురు ఎగుమతిదారు అయిన సౌదీ అరేబియా తన చమురు ధరలపై భారీ కోత విధించింది. రాబోయే ఆగస్టు నెలకు సంబంధించి క్రూడాయిల్ ధరలను బ్యారెల్కు ఏకంగా $11 తగ్గించింది. గత 26 సంవత్సరాల చరిత్రలోనే సౌదీ చమురు ధరల్లో ఇంతటి భారీ తగ్గుదల నమోదు కావడం ఇదే తొలిసారి కావడం విశేషం. ప్రముఖ అంతర్జాతీయ ఆర్థిక వార్తా సంస్థ ‘బ్లూమ్బెర్గ్’ కథనం ప్రకారం.. ఆసియా దేశాలకు సౌదీ అరేబియా సరఫరా చేస్తున్న ముడి చమురు ధర, ప్రస్తుతం మార్కెట్లో ఉన్న ఒమన్ లేదా దుబాయ్ చమురు సగటు ధర కంటే బ్యారెల్కు $1.50 తక్కువగా ఉండటం గమనార్హం.
గతంలో ఇరాన్-ఇజ్రాయెల్ మధ్య తలెత్తిన తీవ్ర యుద్ధ వాతావరణం మరియు భౌగోళిక రాజకీయ ఉద్రిక్తతల (Geopolitical tensions) కారణంగా ప్రపంచవ్యాప్తంగా చమురు సరఫరా నిలిచిపోతుందనే భయాలు రేగాయి. ఆ సమయంలో అంతర్జాతీయ మార్కెట్లో ముడి చమురు ధర ఏకంగా బ్యారెల్కు $120 మార్కును తాకి, ప్రపంచ దేశాలను కలవరపెట్టింది. అయితే, ప్రస్తుతం అంతర్జాతీయంగా డిమాండ్ క్షీణించడం మరియు సరఫరా సాధారణ స్థితికి రావడంతో క్రూడాయిల్ ధరలు నిలకడగా తగ్గుతూ వస్తున్నాయి. ప్రస్తుతం బ్యారెల్ ముడి చమురు ధర $71.7 వద్ద స్థిరపడింది. సౌదీ తీసుకున్న ఈ తాజా నిర్ణయం వల్ల భారత్ లాంటి పెద్ద మొత్తంలో చమురు దిగుమతి చేసుకునే దేశాలకు భారీగా ఆర్థిక ఊరట లభించనుంది.