. సరిహద్దుల్లో వ్యూహాత్మక మార్పులు
. సుమీ, ఖర్కీవ్ వైపు ముందడుగు
. డ్రోన్ దాడులు, శాంతి చర్చల మధ్య ఉద్రిక్తత
Ukraine buffer zone expansion : కొన్ని రోజులుగా ఉక్రెయిన్పై తీవ్ర దాడులతో దూకుడు పెంచుతున్న రష్యా, తాజాగా మరిన్ని వ్యూహాత్మక చర్యలకు శ్రీకారం చుట్టింది. ఉక్రెయిన్ భూభాగాన్ని మరింత ఆక్రమించుకునే లక్ష్యంతో సరిహద్దు ప్రాంతాల్లో బఫర్ జోన్ను విస్తరించాలని రష్యా అధ్యక్షుడు వ్లాదిమిర్ పుతిన్ ఆదేశించినట్లు రష్యా సైన్యాధిపతి జనరల్ వాలేరి గెరసిమోవ్ వెల్లడించారు. వచ్చే ఏడాదిలో ఈ భద్రతా పరిధిని మరింత పెంచాలని పుతిన్ స్పష్టంగా ఆదేశించారని ఆయన తెలిపారు. ఈ నిర్ణయంతో రష్యా దళాలు ఉక్రెయిన్ ఈశాన్య ప్రాంతాల్లో తమ కదలికలను వేగవంతం చేస్తున్నాయి.
గెరసిమోవ్ వ్యాఖ్యల ప్రకారం, రష్యా సైన్యం సుమీ, ఖర్కీవ్ ప్రాంతాల్లోని పలు గ్రామాలను ఆక్రమిస్తూ లోనికి చొచ్చుకెళ్లేందుకు ప్రయత్నిస్తోంది. సరిహద్దుల్లో ఉక్రెయిన్ నుంచి చొరబాట్ల ముప్పు ఉందనే కారణంతో గతంలోనే ‘భద్రతా బఫర్ జోన్’ ఏర్పాటు చేయాలని పుతిన్ ఆదేశాలు జారీ చేశారు. అయితే ఆ సమయంలో ఈ జోన్ పరిమితి ఎంతవరకు ఉంటుందన్న విషయంలో స్పష్టత ఇవ్వలేదు. ఆ తర్వాత ఉక్రెయిన్ ఈశాన్య సుమీ ప్రాంతంలో ఉన్న నాలుగు సరిహద్దు గ్రామాలను రష్యా బలగాలు స్వాధీనం చేసుకున్నాయి. ఇప్పుడు తాజా ఆదేశాలతో ఆ బఫర్ జోన్ను మరింత విస్తరించడంపై దృష్టి పెట్టడం గమనార్హం. ఇటీవల పుతిన్ నివాసంపై డ్రోన్లతో దాడికి ఉక్రెయిన్ ప్రయత్నించిందన్న వార్తల నేపథ్యంలో ఈ ఆదేశాలు రావడం అంతర్జాతీయంగా చర్చనీయాంశంగా మారింది.
అయితే గెరసిమోవ్ చేసిన వ్యాఖ్యలపై ఉక్రెయిన్ ఇప్పటివరకు ఎలాంటి అధికారిక స్పందన ఇవ్వలేదు. మరోవైపు, ఇరుదేశాల మధ్య శాంతి ఒప్పందాలపై చర్చలు కొనసాగుతున్నప్పటికీ, కీవ్–మాస్కో మధ్య దాడులు మాత్రం ఆగడం లేదు. ఇటీవల ఉక్రెయిన్ 91 దీర్ఘశ్రేణి డ్రోన్లను రష్యాపై ప్రయోగించినట్లు రష్యా విదేశాంగ శాఖ మంత్రి సెర్గీ లవ్రోవ్ తెలిపారు. ఇది యుద్ధం మరింత తీవ్రమయ్యే సూచనలుగా విశ్లేషకులు భావిస్తున్నారు. బఫర్ జోన్ విస్తరణ నిర్ణయం రష్యా వ్యూహంలో కీలక మలుపుగా మారే అవకాశముంది. ఇది యుద్ధాన్ని మరింత పొడిగించే ప్రమాదం ఉన్నప్పటికీ, సరిహద్దు భద్రతే లక్ష్యంగా ఈ చర్యలు చేపట్టినట్లు రష్యా చెబుతోంది. ఇక ఉక్రెయిన్ నుంచి వచ్చే స్పందన, అంతర్జాతీయ సమాజం తీసుకునే వైఖరి ఈ సంఘర్షణ భవిష్యత్తును నిర్ణయించనుంది.