Karachi Port: కరాచీ నౌకాశ్రయం (Karachi Port)లోని టెర్మినళ్లను యునైటెడ్ అరబ్ ఎమిరేట్స్ (UAE)కి అప్పగించాలని పాకిస్థాన్ పరిశీలిస్తున్నట్లు సమాచారం. UAE నుండి ఆర్థిక సహాయం పొందడానికి పాకిస్థాన్ ఇలా చేస్తున్నట్లు తెలుస్తుంది. పాకిస్తాన్ ప్రభుత్వం గత సంవత్సరం ఒక చట్టాన్ని ఆమోదించింది. దీనిలో ప్రభుత్వ ఆస్తులను ఏ ఇతర దేశానికైనా అప్పగించే హక్కు ఉంది.
అయితే అందుతున్న సమాచారం ప్రకారం.. పాకిస్థాన్‌లో ఆర్థిక సంక్షోభం తీవ్రరూపం దాల్సింది. IMF నుంచి కూడా ఆశించిన స్థాయిలో సాయం అందకపోవడంతో.. ఇప్పటికే పాక్‌ ప్రభుత్వం విదేశాల్లో చరాస్తులను అమ్మడం, అద్దెకివ్వడం చేస్తోంది. తాజాగా పాకిస్థాన్‌లోని కరాచీలో ఉన్న ప్రధాన ఓడరేవును UAEకి చెందిన ఏడీ పోర్ట్‌ గ్రూప్‌నకు అద్దెకు ఇచ్చింది. 50 ఏళ్ల పాటు కరాచీ పోర్టు నిర్వహణ బాధ్యతలను ఏడీ పోర్టు చూసుకుంటుంది. ఈ ఒప్పందం విలువ 220 మిలియన్‌ డాలర్లు అని సమాచారం.
ఓడరేవు టెర్మినల్స్ ఒప్పందంపై చర్చలను ముందుకు తీసుకెళ్లేందుకు పాకిస్థాన్ ఆర్థిక మంత్రిత్వ శాఖ ఇటీవల అత్యవసర కమిటీని ఏర్పాటు చేసింది. దీనికి ముందు పాకిస్థాన్ ప్రభుత్వం, యూఏఈ ప్రభుత్వం మధ్య చర్చలు జరిగాయి. మీడియా నివేదికలకు సంబంధించి దీనికి సంబంధించిన పూర్తి సమాచారం ఇంకా అందుబాటులో లేదు. అందుకే దీనిపై గందరగోళం నెలకొంది. పాకిస్థాన్ టెర్మినల్స్ నిర్వహణ హక్కులను మాత్రమే యూఏఈకి విక్రయిస్తుందని కొన్ని నివేదికలు తెలిపాయి. టెర్మినల్స్ పూర్తి విక్రయం ఉంటుందని కొన్ని నివేదికలు తెలిపాయి.
Also Read: Submersible Vs Submarine : సబ్ మెర్సిబుల్, సబ్ మెరైన్ మధ్య తేడాలు ఇవీ
కరాచీ నౌకాశ్రయం అరేబియా సముద్రంలో ఉంది. ఇది ఒమన్ గల్ఫ్‌కు తూర్పున ఉంది. ఇది పాకిస్తాన్ అతిపెద్ద నౌకాశ్రయం. ఇక్కడ నుండి పాకిస్తాన్ దిగుమతి-ఎగుమతిలో 60 శాతం సముద్ర మార్గం ద్వారా జరుగుతుంది. ఈ ఒప్పందం తర్వాత పాకిస్తాన్‌తో యుఏఈ లాజిస్టిక్స్ సంబంధాలు బాగా బలపడతాయి. యుఏఈ కి కార్యకలాపాలను అప్పగించిన తర్వాత గల్ఫ్ ఆఫ్ ఒమన్‌కు, తిరిగి వచ్చే నౌకలు వేగంగా ప్రయాణాన్ని పూర్తి చేయగలవని యుఏఈ అధికారి ఒకరు తెలిపారు.
పాకిస్థాన్ ఆర్థిక వ్యవస్థ పతనం అంచున ఉంది. దేశంలో ద్రవ్యోల్బణం ఆకాశాన్ని తాకుతోంది. విదేశీ మారకద్రవ్య నిల్వలు పడిపోతున్నాయి. చైనా నుండి ఎటువంటి సహాయం లేకుంటే పాకిస్తాన్ ఈపాటికి డిఫాల్ట్‌గా ఉండవలసి వచ్చేది. ఈ ఆర్థిక సంక్షోభం కారణంగా పాకిస్తాన్‌లోని షెహబాజ్ షరీఫ్ ప్రభుత్వం తన విధానంలో పెద్ద మార్పు చేసి రష్యా నుండి ముడి చమురును దిగుమతి చేసుకోవడం ప్రారంభించింది. ప్రపంచ మార్కెట్‌తో పోలిస్తే ఈ చమురును సబ్సిడీపై పొందుతున్నారు.
అదే నెలలో రష్యా చమురు మొదటి సరుకు పాకిస్తాన్‌కు చేరుకుంది. మొదటి సరుకులో మూడు లక్షల 30 వేల బ్యారెళ్ల చమురు పాకిస్థాన్‌కు వచ్చిందని చెప్పారు. ఈ నెలలో మరో సరుకు పాకిస్థాన్ చేరుకోనుంది. రష్యా నుంచి ఈ చమురును పాకిస్థాన్‌కు అందుతున్న అసలు ధర మిస్టరీగా మిగిలిపోయింది. దీనికి సంబంధించి ఇరు దేశాల నుంచి ఎలాంటి సమాచారం అందలేదు.
రష్యా నుంచి చమురు కొనుగోలుపై మాజీ ప్రధాని ఇమ్రాన్ ఖాన్ ప్రభుత్వం నిర్ణయం తీసుకుంది. గతేడాది ఏప్రిల్‌లో అధికారంలోకి వచ్చిన తర్వాత షెహబాజ్ షరీఫ్ ప్రభుత్వం ఆ నిర్ణయాన్ని తోసిపుచ్చింది. అయితే ఇప్పుడు తన నిర్ణయాన్ని వెనక్కి తీసుకోవలసి వచ్చింది. రష్యా నుంచి తొలి ముడి చమురు సరుకు రావడంపై షరీఫ్ సంతోషం వ్యక్తం చేశారు. అతను ఇలా అన్నాడు- ‘రష్యా నుండి పాకిస్తాన్‌కు ఇది మొదటి చమురు సరుకు మరియు దీనితో రెండు దేశాల మధ్య సంబంధాలలో కొత్త ప్రారంభం ఏర్పడింది.’