Jamaica Floods: జమైకాలో కుంభవృష్టి..ప్రమాదంలో వేలాదిమంది

కరేబియన్‌ దీవుల్లోని జమైకా దేశం ప్రస్తుతం భయానక స్థితిని ఎదుర్కొంటోంది. మెలిస్సా హరికేన్‌ కారణంగా దేశవ్యాప్తంగా కుండపోత వర్షాలు, గాలివానలు బీభత్సం సృష్టిస్తున్నాయి. వాతావరణ శాఖ సమాచారం ప్రకారం, ఈ తుపాన్‌ ప్రస్తుతం కేటగిరీ–5 స్థాయికి చేరుకుని అత్యంత తీవ్రతర స్థాయిలో విరుచుకుపడుతోంది. గంటకు 280 కి.మీ.లకుపైగా వేగంతో గాలులు వీచడం వలన చెట్లు, విద్యుత్‌ స్తంభాలు, ఇళ్లు నేలమట్టమవుతున్నాయి. జమైకా రాజధాని కింగ్‌స్టన్‌ సహా పలు జిల్లాలు పూర్తిగా నీట మునిగిపోయాయి. రోడ్లు, వంతెనలు దెబ్బతినడంతో రవాణా సౌకర్యాలు స్తంభించిపోయాయి.

‎Banana-Milk: రాత్రిపూట పాలు,అరటిపండు కలిపి తీసుకుంటే ఏం జరుగుతుందో మీకు తెలుసా?

ఈ తుపాన్‌ ప్రభావం ఇప్పటికే జమైకాలో పెద్ద ఎత్తున విధ్వంసం సృష్టించింది. వర్షాల కారణంగా కొండచరియలు జారిపడడం, వరదనీరు ఇళ్లలోకి చేరిపోవడం వలన నాలుగు మంది ప్రాణాలు కోల్పోయారు. వేలాది కుటుంబాలు ఇళ్లను వదిలి సురక్షిత ప్రాంతాలకు తరలించబడుతున్నాయి. ప్రభుత్వం అత్యవసర పరిస్థితి ప్రకటించి, సిబ్బందిని రక్షణ చర్యలకు మోహరించింది. విద్యుత్‌ సరఫరా, నీటి సదుపాయాలు, రవాణా వ్యవస్థలు పూర్తిగా దెబ్బతిన్నాయని అధికారులు తెలిపారు. అనేక పాఠశాలలు, ఆసుపత్రులు తాత్కాలికంగా మూసివేయబడ్డాయి.

వాతావరణ శాఖ అంచనా ప్రకారం మెలిస్సా తుపాన్‌ ప్రభావం ఇంకా రెండు రోజులు కొనసాగే అవకాశం ఉంది. ప్రస్తుతం సముద్రతీర ప్రాంతాల్లో అలలు 25 అడుగుల ఎత్తులో ఎగసిపడుతున్నాయి. తీర ప్రాంత ప్రజలు అత్యంత అప్రమత్తంగా ఉండాలని అధికారులు హెచ్చరించారు. అత్యవసర పరిస్థితుల్లో మాత్రమే బయటకు రావాలని సూచిస్తూ, ప్రభుత్వ రక్షణ బృందాలు పూర్తి సన్నద్ధతలో ఉన్నాయి. తుపాన్‌ కల్లోలాన్ని ఎదుర్కొనేందుకు అమెరికా, మెక్సికో వంటి దేశాలు సహాయక చర్యల్లో పాలుపంచుకునే అవకాశమున్నట్లు అంతర్జాతీయ వాతావరణ సంస్థలు పేర్కొన్నాయి.