Dancing Missile: ఇరాన్- అమెరికా మధ్య నెలకొన్న ఉద్రిక్తతలు తగ్గుముఖం పట్టడం లేదు. రెండు దేశాలు తమదైన శైలిలో తమ శక్తిసామర్థ్యాలను ప్రదర్శించుకుంటున్నాయి. అమెరికా- ఇరాన్ సరిహద్దుల చుట్టూ తన యుద్ధ విమానాలను, యుద్ధనౌకలను మోహరించింది. మరోవైపు ఇరాన్ కూడా స్పష్టం చేస్తూ.. తమపై జరిగే ఎలాంటి దాడినైనా యుద్ధంగానే పరిగణిస్తామని, దానికి ధీటైన సమాధానం ఇస్తామని ప్రకటించింది. ఈ క్రమంలో ఇరాన్ తన సైనిక శక్తిని మరింత పటిష్టం చేసుకుంటూ సెజ్జిల్-2 బాలిస్టిక్ మిసైల్ను ప్రపంచం ముందుకు తెచ్చింది. దీని సుదూర లక్ష్యాలను ఛేదించే సామర్థ్యం, వేగం, రాడార్ల కళ్లుగప్పే టెక్నాలజీ అంతర్జాతీయంగా చర్చనీయాంశమయ్యాయి.
ఇరాన్ సెజ్జిల్-2 మిసైల్ అంటే ఏమిటి?
సెజ్జిల్-2 అనేది ఒక లాంగ్ రేంజ్ బాలిస్టిక్ మిసైల్. దీనిని ఇరాన్ పూర్తిగా స్వదేశీ సాంకేతికతతో అభివృద్ధి చేసింది. ఈ క్షిపణిని మొదటిసారిగా 2008లో పరీక్షించారు. అప్పటి నుండి ఇందులో నిరంతరం సాంకేతిక మార్పులు చేస్తూ వచ్చారు. సెజ్జిల్-2 ఘన ఇంధనం ఆధారంగా పనిచేస్తుంది. ఇది ఇతర క్షిపణుల కంటే దీనిని మరింత ప్రమాదకరంగా మారుస్తుంది. దీని పరిధి సుమారు 2,000 నుండి 2,500 కిలోమీటర్లు. ఇంతటి సామర్థ్యం కారణంగా ఇది మిడిల్ ఈస్ట్ లోని అనేక దేశాలను లక్ష్యం చేసుకోగలదు. నిపుణుల అభిప్రాయం ప్రకారం.. సెజ్జిల్-2 సంప్రదాయ ఆయుధాలతో పాటు అణు ఆయుధాలను కూడా మోసుకెళ్లగలదు.
దీనిని ‘డ్యాన్సింగ్ మిసైల్’ అని ఎందుకు అంటారు?
సెజ్జిల్-2ను ‘డ్యాన్సింగ్ మిసైల్’ అని పిలుస్తారు. ఎందుకంటే ఇది ప్రయాణించేటప్పుడు తన మార్గాన్ని మార్చుకోగలదు. ఈ క్షిపణి సరళరేఖలో వెళ్లకుండా గాలిలో అలల మాదిరిగా ఊగుతూ దిశను మారుస్తుంది. దీనివల్ల శత్రువుల రాడార్, ఎయిర్ డిఫెన్స్ సిస్టమ్లకు దీనిని ట్రాక్ చేయడం చాలా కష్టమవుతుంది. అందుకే ఆధునిక మిసైల్ డిఫెన్స్ సిస్టమ్లకు కూడా ఇది ఒక పెద్ద సవాలుగా మారింది.
Also Read: హీరో విజయ్ కు మద్రాస్ హైకోర్టు షాక్
ఘన ఇంధన సాంకేతికత ఎందుకు ప్రత్యేకం?
రాడార్ల నుండి తప్పించుకోవడానికి సెజ్జిల్-2లో అడ్వాన్స్డ్ గైడెన్స్ సిస్టమ్, ప్రత్యేక కోటింగ్, అత్యధిక వేగాన్ని ఉపయోగించారు. ఇది వాతావరణంలోకి తిరిగి ప్రవేశించేటప్పుడు దీని వేగం విపరీతంగా ఉంటుంది. ఘన ఇంధనం వాడటం వల్ల దీనిని ప్రయోగించడానికి చాలా తక్కువ సమయం పడుతుంది. ద్రవ ఇంధన క్షిపణుల మాదిరిగా కాకుండా దీనిని నిమిషాల్లో ప్రయోగించవచ్చు, దీనివల్ల శత్రువులకు సిద్ధమయ్యే అవకాశం ఉండదు.
ఇజ్రాయెల్లో కనిపించిన అసలు శక్తి
ఈ క్షిపణి అసలు నైపుణ్యం ప్రపంచానికి ఇజ్రాయెల్ విషయంలో తెలిసింది. ఇజ్రాయెల్ రాజధాని టెల్ అవీవ్ పై ఈ క్షిపణి దిశలు మారుస్తూ దాడి చేసింది. ఇరాన్ ఈ ‘డ్యాన్సింగ్ మిసైల్’ ఇజ్రాయెల్కు చెందిన ఐరన్ డోమ్, ఆరో వంటి అత్యంత ఆధునిక డిఫెన్స్ సిస్టమ్లను కూడా బురిడీ కొట్టించింది. సెజ్జిల్-2 క్షిపణి సుమారు 700 కిలోగ్రాముల బరువున్న వార్హెడ్ను మోసుకెళ్లగలదు. ‘సెంటర్ ఫర్ స్ట్రాటజిక్ అండ్ ఇంటర్నేషనల్ స్టడీస్’ ప్రకారం దీని పొడవు 18 మీటర్లు, బరువు 23,600 కిలోగ్రాములు.