Iran-US War: అమెరికా- ఇరాన్ మధ్య కొనసాగుతున్న యుద్ధం ఇప్పుడు 36వ రోజులోకి ప్రవేశించింది. నిరంతర దాడులు, ప్రతిదాడుల మధ్య పరిస్థితులు మరింత ఉద్రిక్తంగా మారుతున్నాయి. ఈ తరుణంలో యుద్ధానికి సంబంధించి పలు కీలక అప్డేట్లు వెలువడ్డాయి. ఇవి పరిస్థితి తీవ్రతను తెలియజేస్తున్నాయి.
ఇప్పటివరకు 2,076 మరణాలు
ఇరాన్ అధికారుల సమాచారం ప్రకారం.. ఫిబ్రవరి 28 నుంచి ప్రారంభమైన ఈ యుద్ధంలో ఇప్పటివరకు కనీసం 2,076 మంది మరణించారు. అలాగే 26,500 మందికి పైగా గాయపడ్డారు.
అమెరికాకు చెందిన రెండు యుద్ధ విమానాలను కూల్చివేసినట్లు వాదన
అమెరికాకు చెందిన రెండు యుద్ధ విమానాలను తాము కూల్చివేసినట్లు ఇరాన్ పేర్కొంది. వీటిలో ఒకటి F-15E ఫైటర్ జెట్ కాగా, రెండోది A-10 అటాక్ ఎయిర్క్రాఫ్ట్. ఇరాన్ తెలిపిన వివరాల ప్రకారం.. F-15E ఫైటర్ జెట్ను తమ భూభాగంలో కూల్చివేశారు. ఈ విమానంలో ఉన్న ఒక సిబ్బందిని రక్షించగా, మరొకరు ఇప్పటికీ గల్లంతయ్యారు. ఇక A-10 అటాక్ ఎయిర్క్రాఫ్ట్ పర్షియన్ గల్ఫ్లో కూలిపోయిందని ఇరాన్ మీడియా చెబుతోంది. అయితే ఈ విమానం కూలిపోయిందా లేదా కూల్చివేయబడిందా అనే విషయంపై అమెరికా అధికారులు ఇంకా స్పష్టత ఇవ్వలేదు.
Also Read: ఉదయనిధి vs కనిమొళి.. డీఎంకేలో వారసత్వ పోరు.. నెక్స్ట్ సీఎం ఎవరు?
అమెరికా సైన్యం గల్లంతైన సిబ్బంది కోసం గాలిస్తోంది. ఈ క్రమంలో సెర్చ్ అండ్ రెస్క్యూ ఆపరేషన్లో పాల్గొన్న అమెరికన్ బ్లాక్ హాక్ హెలికాప్టర్లు కూడా ఇరాన్ కాల్పులకు గురయ్యాయి. హెలికాప్టర్కు నష్టం వాటిల్లినప్పటికీ అది గాలిలోనే నిలబడగలిగింది. అమెరికన్ మీడియా ప్రకారం.. F-15E పైలట్ను వెతికే పనిలో ఉన్న ఇలాంటి రెండు హెలికాప్టర్లు ఈ దాడులకు గురయ్యాయి. తాము “కొత్త అడ్వాన్స్డ్ డిఫెన్స్ సిస్టమ్” సహాయంతో అమెరికా విమానాలను కూల్చివేసినట్లు ఇరాన్ వెల్లడించింది. ఇరాన్ గగనతల రక్షణ వ్యవస్థను ముందే ధ్వంసం చేశామన్న అమెరికా ప్రకటనకు ఇది విరుద్ధంగా ఉంది.
48 గంటల కాల్పుల విరమణ ప్రతిపాదనను తిరస్కరించిన ఇరాన్
అమెరికా పంపిన 48 గంటల కాల్పుల విరమణ (సీజ్ఫైర్) ప్రతిపాదనను ఇరాన్ తిరస్కరించింది. ఫార్స్ న్యూస్ ఏజెన్సీ కథనం ప్రకారం.. మూడవ దేశం ద్వారా ఈ ప్రతిపాదనను టెహ్రాన్కు పంపగా, దానిని అంగీకరించేందుకు ఇరాన్ నిరాకరించింది. ఈ అంశంపై అమెరికా ఇంకా అధికారికంగా స్పందించలేదు.
ఈ పరిణామాలు చర్చలపై ప్రభావం చూపవు – ట్రంప్
ఈ సంఘటనల వల్ల ఇరాన్తో జరగబోయే సంభావ్య చర్చలపై ఎటువంటి ప్రభావం ఉండదని అమెరికా అధ్యక్షుడు డొనాల్డ్ ట్రంప్ పేర్కొన్నారు.
రక్షణ బడ్జెట్ పెంచాలని డిమాండ్
ఇరాన్తో పెరుగుతున్న ఉద్రిక్తతల మధ్య అమెరికా పార్లమెంటు రక్షణ బడ్జెట్ను 1.5 ట్రిలియన్ డాలర్లకు పెంచాలని ట్రంప్ డిమాండ్ చేశారు. ప్రస్తుతం అమెరికా రక్షణ బడ్జెట్ సుమారు 839 బిలియన్ డాలర్లు (దాదాపు 70 లక్షల కోట్ల రూపాయలు)గా ఉంది. అమెరికా, దాని మిత్రదేశాల సైనిక ఖర్చులను పెంచాలని డొనాల్డ్ ట్రంప్ గతంలో కూడా చెబుతూ వస్తున్నారు.