Canada: కెనడాలో హిందూ దేవాలయంపై దాడి.. ఖండించిన భారత కాన్సులేట్ కార్యాలయం

Resizeimagesize (1280 X 720) 11zon

కెనడా (Canada)లో మరోసారి హిందూ దేవాలయంపై దాడి జరిగింది. ఈసారి బ్రాంప్టన్‌లోని ప్రముఖ హిందూ దేవాలయంపై హిందూ వ్యతిరేక నినాదాలు రాయబడ్డాయి. ఇది భారతీయ సమాజం మనోభావాలను దెబ్బతీసింది. గౌరీ శంకర్ ఆలయంలో జరిగిన విధ్వంసం ఘటనను ఖండిస్తూ ఆలయాన్ని ధ్వంసం చేసిన ఘటన కెనడాలోని భారతీయుల మనోభావాలను దెబ్బతీసిందని టొరంటోలోని భారత కాన్సులేట్ జనరల్ అన్నారు.

ఆలయంలో జరిగిన ఈ దారుణమైన ఘటనతో కెనడాలోని హిందూ సమాజం మనోభావాలు దెబ్బతిన్నాయని కెనడాలోని భారత కాన్సులేట్ కార్యాలయం మంగళవారం ఒక ప్రకటన విడుదల చేసింది. మేము ఈ విషయం గురించి కెనడియన్ పరిపాలనకు మా ఆందోళన వ్యక్తం చేసాము. భారతీయ వారసత్వానికి ప్రతీకగా నిలిచే ఈ ఆలయ గోడలపై, భారత్‌పై ద్వేషపూరిత రాతలు రాశారు. కెనడియన్ అడ్మినిస్ట్రేషన్ ప్రస్తుతం ఈ ఘటనపై దర్యాప్తు చేస్తోంది.

Also Read: Meta Layoffs Soon: ఈసారి వారి వంతే.. వేటుకు సిద్ధమైన మెటా సీఈఓ జుకర్‌బర్గ్..! 

బ్రాంప్టన్‌లోని ఒక హిందూ దేవాలయాన్ని ధ్వంసం చేయడం ఇది మొదటిసారి కాదు. గత జులై నుంచి ఇలాంటి ఘటనలు మూడు జరిగాయి. గత సెప్టెంబరులో భారత విదేశాంగ మంత్రిత్వ శాఖ భారతీయులపై ద్వేషం, భారత వ్యతిరేక కార్యకలాపాలకు సంబంధించిన కేసులు బాగా పెరిగిపోయాయని తీవ్ర పదజాలంతో కూడిన ప్రకటన విడుదల చేసింది. ఈ ఘటనలపై సరైన విచారణ జరపాలని భారత ప్రభుత్వం కోరింది.

కెనడా ప్రభుత్వం అధికారిక గణాంకాల ప్రకారం.. 2019, 2021 మధ్య కెనడాలో మతం, లైంగిక ధోరణి, జాతికి సంబంధించిన ద్వేషపూరిత నేరాలు 72 శాతం పెరిగాయి. ఇది మైనారిటీ వర్గాల్లో ముఖ్యంగా భారతీయ సమాజంలో భయాన్ని పెంచింది. కెనడాతో పాటు ఆస్ట్రేలియా, న్యూజిలాండ్‌లో కూడా హిందూ దేవాలయాలపై దాడులు పెరిగిపోతుండడంతో భారతీయ సమాజం మండిపడుతోంది.