Abortion Right : అబార్షన్ (గర్భస్రావం) చేయించుకోవడాన్ని మహిళల రాజ్యాంగపరమైన హక్కుగా గుర్తించిన తొలి దేశంగా ఫ్రాన్స్ అవతరించింది. 1958 నాటి తమ రాజ్యాంగంలో ఈమేరకు ఫ్రాన్స్ ప్రభుత్వం సవరణలు చేసింది. గర్భస్రావాన్ని మహిళల రాజ్యాంగ హక్కుగా గుర్తించే చరిత్రాత్మక బిల్లుకు ఆమోద ముద్ర వేసింది. ఈ బిల్లుకు 780-72 ఓట్ల తేడాతో ఫ్రాన్స్ పార్లమెంటు గ్రీన్ సిగ్నల్ చూపించింది. ఓటింగ్ ఫలితాలు వెలువడగానే.. పార్లమెంట్లోని సభ్యులంతా లేచి నిల్చుని చప్పట్లు కొట్టి హర్షాతిరేకాలు వ్యక్తం చేశారు. చట్టసభ సభ్యులు తీసుకున్న ఈ నిర్ణయం ఫ్రాన్స్ దేశ గౌరవాన్ని మరింత పెంచిందని దేశ అధ్యక్షుడు ఎమ్మాన్యుయేల్ మేక్రాన్ తెలిపారు. అయితే ఈమేరకు మార్పులు చేయడాన్ని యాంటీ అబార్షన్ గ్రూప్లు తీవ్రంగా వ్యతిరేకిస్తున్నాయి. వాస్తవానికి ఫ్రాన్స్లో 1975 సంవత్సరం నుంచే గర్భస్రావం చట్టబద్ధమైనది. అయితే ప్రెగ్నెన్సీని తొలగించుకునే మహిళల హక్కును కాపాడేందుకు రాజ్యాంగ సవరణ చేయాలని 85 శాతం మంది దేశ ప్రజలు కోరారు. అందుకే ఇప్పుడు దానికి సంబంధించిన రాజ్యాంగ సవరణ చేశారు.
We’re now on WhatsApp. Click to Join
ప్రపంచంలోని చాలా దేశాలు ఇప్పటికే సంతానోత్పత్తికి సంబంధించిన పలు అంశాలలో ప్రజలకు స్వేచ్ఛనిచ్చే చట్టాలు చేశాయి. అయితే అబార్షన్ను కూడా రాజ్యాంగపరమైన హక్కుగా గుర్తించిన తొలి దేశంగా ఫ్రాన్స్ నిలిచింది. దేశ రాజ్యాంగానికి 25వ సవరణ చేయడం ద్వారా అబార్షన్ను రాజ్యాంగపరమైన హక్కుగా ఫ్రాన్స్ ప్రభుత్వం గుర్తించింది. 2008 సంవత్సరం తర్వాత ఫ్రాన్స్ రాజ్యాంగానికి చేసిన తొలి సవరణ ఇదే. అబార్షన్ను రాజ్యాంగపరమైన హక్కుగా(Abortion Right) గుర్తించే అంశంపై ఫ్రాన్స్ పార్లమెంటు నుంచి ప్రకటన వెలువడిన వెంటనే..దేశ రాజధాని పారిస్లోని ఈఫిల్ టవర్ ‘బై బాడీ, మై చాయిస్’నే మెసేజ్ను ప్రదర్శించారు. ‘‘మీ శరీరం మీదే. మీ శరీరం విషయంలో ఎవరూ నిర్ణయం తీసుకోరు’’ అనే సందేశాన్ని తాము మహిళలందరికీ ఇస్తున్నట్లు ఫ్రాన్స్ ప్రధానమంత్రి గాబ్రియల్ అట్టల్ అధికారికంగా ప్రకటించారు.