United Airlines : అమెరికాకు చెందిన ప్రముఖ విమానయాన సంస్థ యునైటెడ్ ఎయిర్లైన్స్ కార్యకలాపాలకు ఊహించని అంతరాయం ఎదురైంది. సంస్థ కంప్యూటర్ వ్యవస్థలో ఏర్పడ్డ సాంకేతిక లోపం కారణంగా అమెరికా అంతటా ప్రధాన విమాన సర్వీసులన్నింటినీ తాత్కాలికంగా నిలిపివేయాల్సి వచ్చింది. ఈ అప్రతిష్టకర ఘటనతో వందలాది విమానాలు ఆయా ఎయిర్పోర్టుల్లోనే గంటల తరబడి ఆగిపోయాయి. సాంకేతిక లోపం ప్రభావంతో వేలాది మంది ప్రయాణికులు తమ గమ్యస్థానాలకు వెళ్లలేక ఎయిర్పోర్టుల్లో నిరీక్షించాల్సిన పరిస్థితి ఏర్పడింది. ప్రయాణసౌకర్యాలకు అలవాటుపడిన అమెరికన్లు ఒక్కసారిగా ఇటువంటి విఘాతం ఎదుర్కోవడం వల్ల ఆగ్రహం వ్యక్తం చేశారు. ఒక ప్రయాణికుడు “ఇతివరకు వాయుమార్గం అంటే వేగం అనుకున్నాం. కానీ ఈ రోజు ప్రయాణమే ప్రశ్నార్థకంగా మారింది” అంటూ మీడియాతో వేదనను పంచుకున్నాడు.
Read Also: Baba Vanga : ఈ 4 రాశుల వారు 6 నెలల్లో కోటీశ్వరులు అవ్వడం ఖాయం
ఈ తాత్కాలిక నిలిపివేతను ‘గ్రౌండ్ స్టాప్’గా వ్యవహరించిన ఫెడరల్ ఏవియేషన్ అడ్మినిస్ట్రేషన్ (FAA) రంగంలోకి దిగింది. దేశవ్యాప్తంగా ఉన్న ప్రముఖ ఎయిర్పోర్టులైన షికాగో, డెన్వర్, హ్యూస్టన్, నెవార్క్, శాన్ ఫ్రాన్సిస్కో తదితర నగరాల్లో యునైటెడ్ ఎయిర్లైన్స్ విమానాలకు గాలిలోకి లేచే అనుమతిని ఇవ్వకుండా నిలిపివేసింది. సాంకేతిక లోపం స్వరూపం లేదా దాని మూలకారణంపై యునైటెడ్ సంస్థ స్పష్టత ఇవ్వలేదు. అయితే, సిస్టమ్ను పునరుద్ధరించే ప్రక్రియ కొనసాగుతోందని తెలిపింది. సమస్య పూర్తిగా పరిష్కరించేందుకు ఇంకా కొన్ని గంటల సమయం పట్టే అవకాశం ఉందని సంస్థ వర్గాలు పేర్కొన్నాయి. ఇటీవలి కాలంలో అమెరికాలోని విమానయాన రంగంలో ఈ తరహా సాంకేతిక సమస్యలు మళ్లీ మళ్లీ ఎదురవుతున్నాయి. గత నెలలో అలస్కా ఎయిర్లైన్స్ కూడా ఇదే తరహా ఐటీ లోపానికి గురై, తన సేవలను కొన్ని గంటల పాటు నిలిపివేసింది. అంతేగాక, 2025లో న్యూయార్క్ ప్రాంతంలోని కొన్ని ప్రధాన ఎయిర్పోర్టుల్లో ట్రాఫిక్ కంట్రోల్ వ్యవస్థలు సైతం అనేకసార్లు పనిచేయకపోవడం వంటి ఘటనలు చోటుచేసుకున్నాయి.
ఈ ఘటనలన్నీ ప్రయాణికుల భద్రత, సేవల నాణ్యతపై అనేక ప్రశ్నలు లేవనెత్తుతున్నాయి. విమానయాన రంగంలో ఆధునిక టెక్నాలజీ మీద అత్యధిక ఆధారపడుతున్న సంస్థలు, తమ సాఫ్ట్వేర్ వ్యవస్థలను మరింత విశ్వసనీయంగా మార్చాల్సిన అవసరం స్పష్టంగా కనిపిస్తోంది. అంతేకాకుండా, ఈ ఏడాది ప్రారంభంలో వాషింగ్టన్ డీసీ సమీపంలోని రీగన్ నేషనల్ ఎయిర్పోర్ట్ వద్ద ప్రయాణికులతో వెళ్తున్న ఓ విమానం సైనిక హెలికాప్టర్ను ఢీకొట్టిన దుర్ఘటనలో పదుల సంఖ్యలో ప్రజలు ప్రాణాలు కోల్పోయిన విషయం మరువలేము. ఈ ఘటనలన్నింటి నేపధ్యంలో అమెరికా విమానయాన రంగం భద్రతా ప్రమాణాలపై మళ్లీ విశ్లేషణ జరపాల్సిన అవసరం తలెత్తుతోంది. ప్రస్తుతం యునైటెడ్ ఎయిర్లైన్స్ సేవలు మళ్లీ పునరుద్ధరించే దిశగా ప్రయత్నాలు ముమ్మరం చేసినట్టు సంస్థ పేర్కొంది. అయితే, పూర్తి స్థాయిలో కార్యకలాపాలు సాధారణ స్థితికి రాగలిగేంత వరకు మరికొంత ఆలస్యం తప్పదన్న సంకేతాలు వెలువడుతున్నాయి. ప్రయాణికులు తమ ప్రయాణాల షెడ్యూల్ను సంస్థ అధికారిక వెబ్సైట్ లేదా యాప్ ద్వారా నిరంతరం పరిశీలించాలని సూచించారు.