Chinese Researchers Develop Eye Surgery Robot వైద్య సాంకేతిక రంగంలో చైనా పరిశోధకులు ఒక అద్భుతమైన ముందడుగు వేశారు. కంటిలోని అత్యంత సున్నితమైన భాగాల్లోకి స్వయంచాలకంగా (అటానమస్) ఇంజెక్షన్లు ఇచ్చే ఒక రోబోటిక్ వ్యవస్థను విజయవంతంగా అభివృద్ధి చేశారు. చైనీస్ అకాడమీ ఆఫ్ సైన్సెస్కు చెందిన ఇన్స్టిట్యూట్ ఆఫ్ ఆటోమేషన్ ఈ రోబోను రూపొందించింది. రెటీనా సంబంధిత వ్యాధులకు చికిత్స అందించే సర్జరీలలో కచ్చితత్వం, భద్రతను ఈ రోబో గణనీయంగా పెంచుతుందని భావిస్తున్నారు.
- జంతువులపై జరిపిన ప్రయోగాల్లో 100 శాతం విజయం సాధించిన రోబో
- కంటి ఆపరేషన్ల కోసం స్వయంచాలిత రోబోను అభివృద్ధి చేసిన చైనా
- మనిషి కన్నా 80 శాతం ఎక్కువ కచ్చితత్వంతో సర్జరీ
- దూర ప్రాంతాల్లోనూ సంక్లిష్టమైన కంటి చికిత్సలకు మార్గం సుగమం
- వైద్యుల శిక్షణా కాలాన్ని తగ్గించడంలో ఈ రోబో ఉపయోగకరం
జిన్హువా న్యూస్ ఏజెన్సీ కథనం ప్రకారం జంతువులపై జరిపిన ప్రయోగాల్లో ఈ రోబో 100 శాతం విజయవంతంగా సబ్-రెటినల్, ఇంట్రావాస్కులర్ ఇంజెక్షన్లు ఇచ్చింది. ఈ వివరాలను పరిశోధకులు “సైన్స్ రోబోటిక్స్” జర్నల్లో ప్రచురించారు. కంటిలోని నిర్మాణాలు చాలా చిన్నవిగా, మృదువుగా ఉండటంతో రెటీనా సర్జరీలు అత్యంత సవాలుతో కూడుకున్నవి. ఈ కొత్త రోబోటిక్ వ్యవస్థ 3D స్పేషియల్ పర్సెప్షన్, ప్రిసైజ్ పొజిషనింగ్ వంటి అధునాతన అల్గారిథమ్లతో పనిచేస్తుంది. ప్రయోగాల్లో, మనుషులు చేసే సర్జరీలతో పోలిస్తే ఈ రోబో పొరపాట్లను దాదాపు 80 శాతం తగ్గించింది. సర్జన్ నియంత్రించే రోబోటిక్ సర్జరీతో పోలిస్తే 55 శాతం తక్కువ తప్పులు చేసినట్లు బృందం వెల్లడించింది.
“ఈ ఫలితాలు స్వయంచాలిత కంటి సర్జరీ రోబో ఆచరణ సాధ్యమేనని, ఇంజెక్షన్ల కచ్చితత్వం, భద్రత, స్థిరత్వాన్ని ఇది మెరుగుపరుస్తుందని నిరూపిస్తున్నాయి. ఈ వ్యవస్థ సర్జరీల స్థిరత్వాన్ని పెంచుతుంది. సర్జన్ల శిక్షణా కాలాన్ని కూడా తగ్గిస్తుంది” అని పరిశోధకులు తెలిపారు. ఈ ఆవిష్కరణతో నిపుణులైన సర్జన్లు అందుబాటులో లేని మారుమూల ప్రాంతాల్లో కూడా క్లిష్టమైన కంటి ఆపరేషన్లు చేసే అవకాశం ఏర్పడుతుంది. గతేడాది నవంబర్లో చైనా 5G టెక్నాలజీతో రిమోట్ రోబోటిక్ కంటి సర్జరీ చేసింది, అయితే అది సర్జన్ నియంత్రణలో జరగ్గా, తాజా ఆవిష్కరణ స్వయంగా పనిచేయడం విశేషం.