CHINA vs USA ఐక్యరాజ్యసమితి నిరాయుధీకరణ సదస్సులో చైనాపై అమెరికా సంచలన ఆరోపణలు చేసింది. ఆ దేశం 2020 జూన్లో అణు పరీక్షలు నిర్వహించిందని అమెరికా మంత్రి చేసిన వ్యాఖ్యలతో కలకలం రేగింది. తాజాగా, ఈ ఆరోపణలపై బీజింగ్ స్పందించి.. అమెరికాకు చురకలు అంటించింది. ముందు అమెరికా తన ప్రాథమిక బాధ్యతను నిర్వర్తించాలని కౌంటర్ ఇచ్చింది. ఈ నేపథ్యంలో తాము ఎటువంటి పరీక్షలు చేయలేదని, అంతర్జాతీయ అణు నిరాయుధీకరణకు కట్టుబడి ఉన్నామని చైనా పునరుద్ఘాటించింది.
- భారత్, చైనా సైనికుల మధ్య గాల్వాన్ లోయ వద్ద ఘర్షణ
- ఈ సమయంలో బీజింగ్ అణు పరీక్షలు చేసిందన్న అమెరికా
- అగ్రరాజ్యం ఆరోపణలను తోసిపుచ్చిన బీజింగ్
గాల్వాన్ లోయ ఘర్షణల తర్వాత తాము అణ్వస్త్ర పరీక్షలు చేపట్టినట్టు అమెరికా చేసిన ఆరోపణలపై చైనా స్పందించింది. ఇందులో ఎలాంటి నిజం లేదని, తాను పరీక్షలు తిరిగి మొదలుపెట్టడానికి సాకులు చెబుతోందని బీజింగ్ ఆరోపించింది. ఈ మేరకు చైనా విదేశాంగ శాఖ అధికార ప్రతినిధి లిన్ జియాన్ వెల్లడించారు. గతవారం జెనీవాలో ఐక్యరాజ్యసమితి నిర్వహించిన నిరాయుధీకరణ సదస్సులో అమెరికా మంత్రి థామస్ డినానో మాట్లాడుతూ.. చైనా 2020 జూన్ 22న ఒకటి సహా అణ్వాయుధ పరీక్షలు చేపట్టిందని, మరిన్ని భారీ పరీక్షలకు సిద్ధమైందని ఆరోపించారు.
ఈ ఆరోపణలపై లిన్ జియాన్ స్పందిస్తూ.. ‘‘చైనా ఆరోపణలు పూర్తిగా నిరాధరమైనవి.. ఇందులో ఎలాంటి నిజం లేదు.. మళ్లీ అణు పరీక్షలను ప్రారంభించడానికి అమెరికా సాకుల కోసం వెతుకుతున్న ప్రయత్నాలను చైనా తీవ్రంగా వ్యతిరేకిస్తుంది’’ అని స్పష్టం చేశారు. అంతేకాదు, అమెరికా ఇలాంటి బాధ్యతయుతమైన చర్యలను తక్షణమే నిలిపివేయాలని ఆయన కోరారు. అమెరికా అధ్యక్షుడు డొనాల్డ్ ట్రంప్ గతేడాది అక్టోబరులో తామూ చైనా, రష్యాలతో సమానంగా అణ్వస్త్ర పరీక్షలు మొదలుపెడతామని అన్నారు. అయితే, అవి ఎటువంటి పరీక్షలు అనేది మాత్రం ఆయన వెల్లడించలేదు.
ప్రపంచ అణ్వాయుధ శక్తులైన అమెరికా, రష్యా మధ్య చివరి ఒప్పందం న్యూ START గడువు గత గురువారం ముగిసింది. అణ్వాయుధాలపై కొత్త పరిమితులను నిర్ణయించడానికి రష్యా, చైనాలతో త్రిముఖ చర్చలకు అమెరికా ప్రయత్నాలు చేస్తున్న నేపథ్యంలో డినాన్నో వ్యాఖ్యలు చేయడం గమనార్హం. అయితే, ఈ చర్చల్లో తాము పాల్గొనడానికి సిద్ధంగా లేమని చైనా ఇప్పటికే తోసిపుచ్చింది. లిన్ జియాన్ మాట్లాడుతూ ‘‘అమెరికా ఆయుధ నియంత్రణ, అంతర్జాతీయ భద్రత సహాయ మంత్రి థామస్ జి. డినాన్నో అణ్వాయుధ నియంత్రణ, వ్యూహాత్మక స్థిరత్వంపై బహుళ పక్ష చరల్లో పాల్గొనాలని చైనా కోరినట్లు వచ్చిన నివేదికలు మా దృష్టికి వచ్చాయి.. అలాగే, జెనీవాలో జరిగిన నిరాయుధీకరణ సమావేశంలో జూన్ 2020లో చైనా అణు పరీక్షలు నిర్వహించిందని ఆరోపించింది’’ అని అన్నారు.
అయితే, అమెరికా వైఖరి మాకు కొత్తేమీ కాదని, ఆ దేశం తమ అణు విధానాన్ని వక్రీకరిస్తూనే ఉందన్నారు. ఇది కేవలం అణ్వాయుధ నిరాయుధీకరణ బాధ్యత నుంచి తప్పించుకోవడానికి అమెరికా ఆడుతోన్న రాజకీయ డ్రామా అని మండిపడ్డారు. అంతేకాదు, అంతర్జాతీయ అణు నిరాయుధీకరణ, ప్రపంచ వ్యూహాత్మక స్థిరత్వానికి ఆమెరికానే తూట్లు పొడుస్తోందని లిన్ దుయ్యబట్టారు. అణు నిరాయుధీకరణ విషయంలో అమెరికా తన ప్రత్యేక, ప్రాథమిక బాధ్యతలను ముందు నెరవేర్చాలని ఆయన చురకలంటించారు.