RGIA: శంషాబాద్ అంతర్జాతీయ విమానాశ్రయంలో సోమవారం ఉదయం ఓ అనూహ్య పరిస్థితి చోటుచేసుకుంది. బ్రిటీష్ ఎయిర్‌వేస్‌కు చెందిన విమానం లండన్‌కు వెళ్లాల్సి ఉండగా, విమానం సుమారు రెండు గంటలుగా రన్‌వే పై నిలిచిపోయింది. యుద్ధ పరిస్థితుల నేపథ్యంలో ఇరాన్ గగనతలం మూసివేయబడిన కారణంగా ఈ ఆలస్యం జరిగిందని అధికారులు తెలిపారు.
ప్రస్తుతం ఇజ్రాయెల్-ఇరాన్ మధ్య ఉద్రిక్తతలు తీవ్ర స్థాయికి చేరుకున్నాయి. ఈ నేపథ్యంలో ఇరాన్ తన గగనతలాన్ని చాలా దేశాల విమానాల రాకపోకలకు మూసివేసినట్లు తెలుస్తోంది. ఈ మార్గం ద్వారా ప్రయాణించే విమానాలకు కొత్త మార్గాలు అన్వేషించే అవసరం ఏర్పడింది. హైదరాబాద్ నుంచి లండన్‌కు బయలుదేరే బ్రిటీష్ ఎయిర్‌వేస్ విమానం సాధారణంగా ఇరాన్ గగనతలం మీదుగా ప్రయాణిస్తుంది. అయితే, అనుమతులులేకపోవడం వల్ల కొత్త మార్గాన్ని ఖరారు చేయకుండానే విమానం టేకాఫ్‌కు సిద్ధం కాలేకపోయింది.
విమానంలో ఉన్న సుమారు 250 మంది ప్రయాణికులు రెండు గంటలపాటు విమానం లోపలే ఉండాల్సి రావడం వల్ల తీవ్ర అసౌకర్యానికి గురయ్యారు. ముందుగా ఎటువంటి సమాచారం ఇవ్వకపోవడంతో వారిలో ఆందోళన చోటుచేసుకుంది. విమానం ఎందుకు నిలిచిపోయిందో తెలియక కొందరు సిబ్బందిని ప్రశ్నించారు. అయితే, సిబ్బంది “ఇరాన్ గగనతలానికి అనుమతి రావాల్సి ఉంది, మార్గం క్లియర్ అయితేనే టేకాఫ్‌కు అనుమతిస్తాం” అని వివరణ ఇచ్చినట్లు ప్రయాణికులు తెలిపారు.
విమానాశ్రయ అధికారులు ఈ విషయంలో స్పందిస్తూ – ‘‘విమానం నిలిచిపోయిన కారణం భౌగోళిక భద్రతా సమస్యలే. ఇరాన్ గగనతలంపై ఉన్న అనిశ్చితి కారణంగా విమానాన్ని నూతన మార్గంలో తరలించాల్సిన అవసరం ఉంది. దీనికి కొన్ని అధికార అనుమతులు కావాలి. వాటి కోసం వేచి చూస్తున్నారు’’ అని పేర్కొన్నారు.
ఇదిలా ఉండగా, విమాన టేకాఫ్ ఆలస్యం కారణంగా లండన్‌లో కనెక్టింగ్ ఫ్లైట్లను అందుకోవలసిన ప్రయాణికులు తమ యాత్రపై ఆందోళన వ్యక్తం చేస్తున్నారు. విమానాశ్రయంలో తక్షణమే స్పష్టమైన సమాచారం ఇవ్వాలని డిమాండ్ చేస్తున్నారు. మరోవైపు, బ్రిటీష్ ఎయిర్‌వేస్ అధికారులు ఈ విషయంపై అధికారిక ప్రకటన చేయాల్సి ఉంది.