Khameneis Net Worth: అమెరికా- ఇజ్రాయెల్ దాడుల నేపథ్యంలో ఇరాన్ సుప్రీం లీడర్ అయతుల్లా అలీ ఖమేనీ మరణ వార్త సంచలనం సృష్టించింది. 1989 నుండి సుమారు 36-37 ఏళ్ల పాటు ఇరాన్ అత్యున్నత, అత్యంత శక్తివంతమైన పదవిలో ఉన్న ఖమేనీ తన జీవితాన్ని అత్యంత సాదాసీదాగా గడిపినట్లు చెప్పుకునేవారు. అయితే అంతర్జాతీయ దర్యాప్తు సంస్థల నివేదికలు ఆయన నియంత్రణలో ఉన్న భారీ ఆర్థిక సామ్రాజ్యం గురించి సంచలన విషయాలను వెల్లడించాయి.
ఖమేనీ వద్ద ఎంత ఆస్తి ఉండేది?
2013లో అంతర్జాతీయ వార్తా సంస్థ ‘రాయిటర్స్’ జరిపిన ఒక దర్యాప్తు నివేదిక ప్రకారం.. ఖమేనీ సుమారు 95 బిలియన్ డాలర్ల ఆస్తులను నియంత్రిస్తున్నారని పేర్కొంది. భారత కరెన్సీలో ఇది సుమారు 8.5 లక్షల కోట్ల రూపాయలకు సమానం (మార్పిడి రేటును బట్టి ఇది మారుతూ ఉంటుంది). ఈ ఆస్తి నేరుగా ఆయన వ్యక్తిగత బ్యాంకు ఖాతాలో లేకపోయినా, ఒక భారీ సంస్థ ద్వారా నియంత్రించబడేదని ఆ నివేదిక తెలిపింది.
ఆదాయ వనరులు ఏమిటి?
ఖమేనీ ఆస్తులకు ప్రధాన వనరు ‘సెతాద్’. 1979 ఇరాన్ విప్లవం తర్వాత జప్తు చేసిన అనేక ఆస్తులను నిర్వహించడానికి ఈ సంస్థను ఏర్పాటు చేశారు. సెతాద్కు రియల్ ఎస్టేట్, కంపెనీల షేర్లు, చమురు, ఇంధన రంగం, బ్యాంకింగ్, ఇతర వ్యాపారాల్లో భారీ వాటాలు ఉన్నాయి. నివేదికల ప్రకారం.. ఈ సంస్థ ఇరాన్ పార్లమెంటుకు లేదా ఏ ప్రభుత్వ పర్యవేక్షక సంస్థలకు జవాబుదారీగా ఉండేది కాదు. ఇది నేరుగా సుప్రీం లీడర్ కార్యాలయం కింద పనిచేసేది.
ఇటీవలి నివేదికల అంచనా ఏమిటి?
2025-26 నాటి కొన్ని నివేదికల ప్రకారం.. ఖమేనీ నియంత్రణలోని ఆస్తుల విలువ 95 బిలియన్ డాలర్ల నుండి 200 బిలియన్ డాలర్లకు పెరిగి ఉండవచ్చని అంచనా. అయితే ఈ గణాంకాలకు ఎటువంటి స్వతంత్ర ధృవీకరణ లేదు. ఈ మొత్తాన్ని కేవలం నగదుగా కాకుండా, కంపెనీలు, భూములు, షేర్లు, వివిధ రంగాల్లోని వాటాల రూపంలో పరిగణించాల్సి ఉంటుంది.
Also Read: ఖమేనీ భార్య కూడా కన్నుమూత!
ఏయే రంగాల్లో వాటాలు ఉండేవి?
సెతాద్కు ఇరాన్లోని చమురు, ఇంధనం, టెలికాం, బ్యాంకింగ్, వ్యవసాయం, పరిశ్రమలు- రియల్ ఎస్టేట్ వంటి కీలక రంగాల్లో భారీ వాటాలు ఉన్నాయి. ఇరాన్ ఆర్థిక వ్యవస్థకు వెన్నెముక వంటి చమురు, గ్యాస్ రంగాల్లో కూడా ఈ సంస్థకు పట్టు ఉండటంతో దేశ ఆర్థిక వ్యవస్థపై ఖమేనీ కార్యాలయానికి విపరీతమైన ప్రభావం ఉండేది.
ఖమేనీ విలాసవంతమైన జీవితం గడిపేవారా?
ఖమేనీ వ్యక్తిగతంగా చాలా సాదాసీదాగా ఉండేవారని విశ్లేషకులు చెబుతుంటారు. బహిరంగంగా ఆయన సాధారణ ఇల్లు. పరిమిత వ్యక్తిగత ఆస్తుల గురించే మాట్లాడేవారు. ఆయన మద్దతుదారులు ఆయనకు వ్యక్తిగత ఆస్తులు లేవని వాదించేవారు. కానీ విమర్శకుల వాదన ప్రకారం.. ఆస్తులు ఆయన పేరు మీద లేకపోయినా, వాటి నియంత్రణ అంతా ఆయన ఆదేశాల మేరకే జరిగేది. అంటే వ్యక్తిగత యాజమాన్యం, నియంత్రణ మధ్య ఉన్న తేడాను ఇక్కడ గమనించాలి.
ఈ ఆస్తి పూర్తిగా వ్యక్తిగతమా?
సెతాద్ ఒక అర్ధ-ప్రభుత్వ సంస్థగా పరిగణించబడుతుంది. ఇది సుప్రీం లీడర్కు నేరుగా నివేదించినప్పటికీ దీని కార్యకలాపాల్లో పారదర్శకత చాలా తక్కువ. ఇరాన్ రాజకీయ వ్యవస్థలో సుప్రీం లీడర్ కార్యాలయానికి సంబంధించిన ఆర్థిక వివరాలను బహిరంగంగా వెల్లడించరు. అందుకే ఖమేనీ సంపద గురించి భిన్నమైన అంచనాలు వెలువడుతుంటాయి.