PM Modi: ప్రధాని నరేంద్ర మోదీ (PM Modi) అమెరికా పర్యటన ముగించుకుని శనివారం ఉదయం ఈజిప్ట్ బయల్దేరి వెళ్లారు. ప్రధాని ఈజిప్టులో పర్యటించడం ఇదే తొలిసారి. ఆయన అమెరికా పర్యటన సందర్భంగా అధ్యక్షుడు జో బిడెన్‌తో చర్చలు జరిపారు. US కాంగ్రెస్ (పార్లమెంట్) సంయుక్త సమావేశంలో ప్రసంగించారు. ఈజిప్టు అధ్యక్షుడు అబ్దెల్ ఫత్తా అల్-సిసి ఆహ్వానం మేరకు ప్రధాని మోదీ రెండు రోజుల పర్యటన నిమిత్తం ఈజిప్ట్‌లో పర్యటించనున్నారు. 1997 తర్వాత భారత ప్రధాని ఈజిప్ట్‌కు వెళ్లడం ఇదే తొలిసారి. ప్రెసిడెంట్ బిడెన్, ప్రథమ మహిళ జిల్ బిడెన్ ఆహ్వానం మేరకు మోదీ అమెరికా వెళ్లారు.
US పర్యటన న్యూయార్క్‌లో ప్రారంభమైంది. అక్కడ మోదీ జూన్ 21న తొమ్మిదవ అంతర్జాతీయ యోగా దినోత్సవం సందర్భంగా ఐక్యరాజ్యసమితి ప్రధాన కార్యాలయంలో ఒక చారిత్రాత్మక కార్యక్రమాన్ని నిర్వహించారు. అనంతరం వాషింగ్టన్ డీసీలోని వైట్‌హౌస్‌లో అధ్యక్షుడు బిడెన్ ఆయనకు రెడ్‌ కార్పెట్‌పై ఘన స్వాగతం పలికారు. గురువారం ఇరువురు నేతలు చారిత్రక శిఖరాగ్ర సమావేశం నిర్వహించారు. ఆ తర్వాత ప్రధాని మోదీ US కాంగ్రెస్‌ను ఉద్దేశించి ప్రసంగించారు. ఆపై బిడెన్ గౌరవార్థం వైట్‌హౌస్‌లో విందును ఏర్పాటు చేశారు.ఈ పర్యటనలో రక్షణ, అంతరిక్షం, వాణిజ్యం వంటి కీలక రంగాలలో భారతదేశం-US మధ్య సహకారాన్ని ప్రోత్సహించడానికి ప్రయత్నాలు జరిగాయి. అనేక ప్రధాన ఒప్పందాలపై సంతకాలు చేశారు.
Also Read: PM Modi: ప్రధాని మోదీ అమెరికా పర్యటన చరిత్రాత్మకమైనది: అమెరికా విదేశాంగ మంత్రి
ఈజిప్ట్ పర్యటనలో సిసితో చర్చలు జరపడంతో పాటు ప్రధాని మోడీ ఈజిప్టు ప్రభుత్వ సీనియర్ ప్రముఖులు, దేశంలోని ప్రముఖులు, భారతీయ కమ్యూనిటీ సభ్యులను కూడా కలవనున్నారు. జనవరిలో సిసి భారత పర్యటన సందర్భంగా రెండు దేశాలు తమ సంబంధాలను వ్యూహాత్మక భాగస్వామ్య స్థాయికి పెంచుకోవడానికి అంగీకరించాయి. కైరోలోని ‘హెలియోపోలిస్ కామన్వెల్త్ వార్ గ్రేవ్ శ్మశానవాటిక’ను ప్రధాని సందర్శిస్తారు. ఇది మొదటి ప్రపంచ యుద్ధంలో ఈజిప్ట్, పాలస్తీనాలో సేవ చేసి మరణించిన దాదాపు 4,000 మంది భారత సైన్యం సైనికుల జ్ఞాపకార్థం అంకితం చేయబడిన పవిత్ర స్థలం, స్మారక చిహ్నం.
రెండుసార్లు ప్రసంగించిన తొలి నేతగా ప్రధాని మోదీ
గురువారం యుఎస్ కాంగ్రెస్ సంయుక్త సమావేశంలో రెండుసార్లు ప్రసంగించిన మొదటి భారతీయ నేతగా కూడా పిఎం మోడీ నిలిచారు. తన ప్రసంగంలో ఉగ్రవాదాన్ని ప్రోత్సహిస్తున్న దేశాలపై చర్యలు తీసుకోవాలని కోరారు. ఐక్యరాజ్యసమితితో సహా బహుపాక్షిక సంస్థలలో సంస్కరణల కోసం మోడీ పిలుపునిచ్చారు. అమెరికాతో భారతదేశ సంబంధాల గురించి బహిరంగంగా మాట్లాడారు.