Iran- US War: అమెరికా- ఇరాన్ మధ్య కొనసాగుతున్న యుద్ధం ఇరు దేశాలకు భారీ నష్టాన్ని కలిగిస్తోంది. నెల రోజులు గడిచినా యుద్ధం తగ్గుముఖం పట్టడం లేదు. ఈ యుద్ధం అమెరికా-ఇరాన్లతో పాటు ఇతర గల్ఫ్ దేశాలను కూడా తీవ్ర ఆందోళనకు గురిచేస్తోంది. యుద్ధం కారణంగా లక్షలాది మంది తమ ఉద్యోగాలను కోల్పోయే ప్రమాదం ఉందని నివేదికలు చెబుతున్నాయి. ముఖ్యంగా ఈ యుద్ధం వల్ల ఇరాన్ అత్యధికంగా నష్టపోగా, అమెరికా తన సొంత భూభాగంలో యుద్ధం చేయడం లేదు కాబట్టి సాపేక్షంగా తక్కువ నష్టాన్ని ఎదుర్కొంటోంది.
ఇరాన్లో ప్రాణ, ఆస్తి నష్టం
అమెరికాతో యుద్ధం కారణంగా ఇరాన్ ప్రజలు తీవ్ర ఇబ్బందులు పడుతున్నారు. ‘ప్రెస్ టీవీ’ నివేదిక ప్రకారం.. టెహ్రాన్తో సహా దేశవ్యాప్తంగా 90,063 ఇళ్లు ధ్వంసమయ్యాయి. 307 ఆసుపత్రులు, ఇతర వైద్య సౌకర్యాలు దెబ్బతిన్నాయి. 760 పాఠశాలలు పూర్తిగా ధ్వంసమయ్యాయి. యుద్ధం ప్రారంభమైన మొదటి వారంలోనే అమెరికా టెహ్రాన్లోని పలు ప్రాంతాలపై దాడులు చేసింది. మిస్సైల్ దాడుల కారణంగా ఇప్పటివరకు వేలాది మంది ప్రాణాలు కోల్పోగా, సుమారు 20,880 మంది తీవ్రంగా గాయపడ్డారు.
Also Read: అమెరికా-ఇరాన్ యుద్ధం.. తిరగబడ్డ ట్రంప్ వ్యూహం!
అణు కేంద్రాలు, ఆయుధ సంపత్తిపై దెబ్బ
యుద్ధ సమయంలో అమెరికా ఇరాన్ అణు స్థావరాలను కూడా లక్ష్యంగా చేసుకుని నష్టం కలిగించిందని సమాచారం. దీనివల్ల ఇరాన్ ఆయుధ సంపత్తి గణనీయంగా తగ్గిపోయింది. దీనిపై ఇంకా అధికారిక గణాంకాలు వెలువడనప్పటికీ అమెరికా, ఇజ్రాయెల్కు వ్యతిరేకంగా ఇరాన్ ప్రయోగించిన క్లస్టర్ బాంబుల నిల్వలు కూడా తగ్గుముఖం పట్టినట్లు తెలుస్తోంది.
అమెరికా రక్షణ మంత్రి హెచ్చరిక
యుద్ధం మధ్యలో అమెరికా రక్షణ కార్యదర్శి పీట్ హెగ్సెత్ ఇరాన్ను ఉద్దేశించి సంచలన వ్యాఖ్యలు చేశారు. రానున్న రోజులు అత్యంత కీలకమని ఆయన పేర్కొన్నారు. సైనిక పరంగా ఇరాన్ కుప్పకూలిపోయింది. వారు ఇప్పుడు ఏమీ చేయలేరు. అమెరికా దాడులతో ఇరాన్ కమాండర్ల ఆత్మస్థైర్యం దెబ్బతింటోంది. ఇరాన్ తెలివైనది అయితే ఒప్పందానికి సిద్ధపడాలి. లేనిపక్షంలో అమెరికా మరిన్ని భీకర దాడులు చేస్తుందని హెచ్చరించారు.
ట్రంప్ మాట తప్పరు
హెగ్సెత్ ఇంకా మాట్లాడుతూ.. ఒప్పందానికి ఇరాన్ అంగీకరించకపోతే అమెరికా సైన్యం మరింత ఉధృతంగా తన చర్యలను కొనసాగిస్తుంది. డొనాల్డ్ ట్రంప్ కేవలం మాటలు చెప్పరు, ఆయన అన్న మాటపై వెనక్కి తగ్గరు. ఇరాన్లోని కొత్త ప్రభుత్వం ఇప్పటికైనా ఈ విషయాన్ని అర్థం చేసుకోవాలి అని హెచ్చరించారు.