Hospital Airdrop : ఆకాశం నుంచి ఊడిపడిన హాస్పిటల్.. ఎలా ?

Hospital Airdrop : మనుషులను ఎయిర్ డ్రాప్ చేయడం గురించి మనం విన్నాం. ఆహార పొట్లాలను ,నిత్యావసర సామగ్రిని, ఇతరత్రా సహాయక సామగ్రిని ఎయిర్ డ్రాప్ చేయడం గురించి మనకు తెలుసు. తాజాగా ఒక పోర్టబుల్ హాస్పిటల్‌ను మన దేశంలోని ఆగ్రాలో ఎయిర్ డ్రాప్ చేశారు. దానికి సంబంధించిన వీడియోలు సోషల్ మీడియాలో వైరల్ అవుతున్నాయి.  అత్యవసర వైద్య సేవల రంగం వికాసం దిశగా దీన్ని కీలక ముందడుగుగా పరిశీలకులు అభివర్ణిస్తున్నారు.

We’re now on WhatsApp. Click to Join

భారత వైమానిక దళానికి చెందినన IAF C-130 విమానం దాదాపు 720 కిలోల బరువున్న పోర్టబుల్ ఆస్పత్రిని 1,500 అడుగుల ఎత్తు నుంచి ఆగ్రా శివార్లలో ఎయిర్ డ్రాప్(Hospital Airdrop) చేసింది.  ఇందుకోసం ఆగ్రాలోని ఎయిర్ డెలివరీ రీసెర్చ్ అండ్ డెవలప్‌మెంట్ ఎస్టాబ్లిష్‌మెంట్ సంస్థ ప్రత్యేకంగా రూపొందించిన పారాచూట్‌లను ఉపయోగించారు. ఈ పారాచూట్లు హాస్పిటల్‌ను సురక్షితంగా భూమి ఉపరితలానికి చేర్చాయి. దీనికి సంబంధించిన వీడియోలు అబ్బురపరిచేలా ఉన్నాయి. అత్యవసర పరిస్థితుల్లో దేశంలో వినియోగించనున్న పోర్టబుల్  ఆస్పత్రుల సామర్థ్యాన్ని అంచనా వేయడం ఈ పరీక్షను నిర్వహించారు.  ప్రాజెక్ట్ భీష్మ్ (BHISHM)లో భాగంగా ఈ పోర్టబుల్ ఆస్పత్రిని కేంద్ర ప్రభుత్వం స్వదేశీ టెక్నాలజీతో తయారు చేయించింది.  ఈ బలమైన ఆస్పత్రిలో ఆర్టిఫిషియల్ ఇంటెలిజెన్స్ (AI) టెక్నాలజీ, డేటా అనలిటిక్స్‌ పరికరాలు కూడా ఉన్నాయి. అత్యవసర వైద్యసేవలు అందించేందుకు అవసరమైన అన్ని వైద్య ఉపకరణాలు ఇందులో సిద్ధంగా ఉంటాయి.