Ram Lalla Idol : అయోధ్యలో కొలువుతీరబోయే బాలరాముడి విశేషాలివీ..

Ram Lalla Idol : నల్లటి ఏకశిలతో చెక్కిన 51 అంగుళాల పొడవున్న బాలరాముడి విగ్రహాన్ని అయోధ్య రామమందిరం గర్భగుడిలో ప్రతిష్ఠించేందుకు ఎంపిక చేసిన సంగతి తెలిసిందే. తాజాగా ఆ విగ్రహానికి సంబంధించిన మరిన్ని విశేషాలు తెలిశాయి. కర్ణాటకకు చెందిన ప్రఖ్యాత శిల్పి అరుణ్ యోగిరాజ్ ‘రామ్ లల్లా’ విగ్రహాన్ని చెక్కారు. దీని బరువు దాదాపు ఒకటిన్నర టన్నులు. రామమందిరం గర్భగుడిలో ప్రతిష్టించేందుకు బాలరాముడి మూడు విగ్రహాలను తయారు చేయించగా.. ముఖంలోని మృదుత్వం, చూపు, చిరునవ్వు, శరీరం ఇతర అంశాలను దృష్టిలో ఉంచుకొని అరుణ్ యోగిరాజ్ చెక్కిన విగ్రహాన్ని ఎంపిక చేశారు. బాలరాముడి విగ్రహం తయారీకి వాడిన రాయిపై నీరు, పాలు వంటి ద్రవాలు ప్రతికూల ప్రభావాన్ని చూపలేవని సంబంధిత వర్గాలు తెలిపాయి. బాలరాముడి విగ్రహాన్ని గర్భగుడిలో.. రాముడి సోదరుల విగ్రహాలు, సీత, హనుమంతుడి విగ్రహాలను రామమందిరం మొదటి అంతస్తులో ఉంచుతారు. అయితే మొదటి అంతస్తులో విగ్రహాలను ప్రతిష్ఠించడానికి మరో ఎనిమిది నెలల టైం పడుతుందని ఆలయ వర్గాలు వెల్లడించాయి. రాజస్థాన్​కు చెందిన మరో ఇద్దరు కళాకారులు చెక్కిన ఇంకో రెండు బాలరాముడి విగ్రహాలను ఆలయ ప్రాంగణంలోని వివిధ ప్రాంతాల్లో ప్రతిష్ఠించనున్నారు.

We’re now on WhatsApp. Click to Join.