Trade deal : వాషింగ్టన్‌లో జరిగిన భారత్-అమెరికా వ్యూహాత్మక భాగస్వామ్య వేదిక (USISPF) నాయకత్వ సదస్సులో, అమెరికా వాణిజ్య శాఖ మంత్రి హోవార్డ్ లుట్నిక్ భారత్‌తో వాణిజ్య ఒప్పందం తర్వలోనే మంజూరయ్యే అవకాశాలు ఉన్నాయని విశ్వాసం వ్యక్తం చేశారు. ఇరుదేశాల మధ్య ఈ డీల్‌ ఇక దాదాపు తుది దశకు చేరిందని ఆయన వెల్లడించారు.లుట్నిక్ మాట్లాడుతూ..భారత్ సరైన ప్రతినిధిని పంపిస్తే, మేము కూడా చర్చలకు తగిన వ్యక్తిని పంపించేందుకు సిద్ధంగా ఉన్నాం. ద్వైపాక్షిక ఒప్పందాల విషయంలో ముందుగా చర్చలు పూర్తి చేసుకున్న దేశాలకు మేం మెరుగైన షరతులు కల్పించబోతున్నాం. జులై 4 నుంచి 9 మధ్య భారత్‌కు చక్కటి అవకాశాలు ఉన్నాయ్ అని వివరించారు.
Read Also: KCR : కాళేశ్వరం కమిషన్ ముందు కేసీఆర్ హాజరు వాయిదా
ఇదిలా ఉండగా, ఈ డీల్‌పై భారత్ కూడా ఆశాజనకంగా ఉందని తెలుస్తోంది. కేంద్ర వాణిజ్యశాఖ మంత్రి పీయూష్ గోయల్‌ ప్రకారం ఇరుదేశాలూ కలిసి పనిచేయాలని నిర్ణయించుకున్నాయి. పరస్పరం మార్కెట్లలోకి వ్యాపారాలకు ప్రాధాన్యత ఇవ్వాల్సిన అవసరం ఉంది. ఇప్పటికే ద్వైపాక్షిక వాణిజ్య ఒప్పందంపై చురుకుగా పనిచేస్తున్నాం అని తెలిపారు.ప్రస్తుతం అమెరికా నుంచి వచ్చిన ఓ ఉన్నత స్థాయి ప్రతినిధి బృందం న్యూఢిల్లీ పర్యటనలో ఉంది. ఈ సందర్భంగా డీల్‌ అంశాలపై సుదీర్ఘంగా చర్చలు జరుగుతున్నాయి. జూన్‌ నెలాఖరు నాటికి దీనిపై ఒక స్పష్టమైన రూపురేఖ బయట పడే అవకాశాలు ఉన్నాయని సమాచారం.
ఇప్పటికే భారత్ 26 శాతం ప్రతీకార సుంకాల నుంచి మినహాయింపు పొందేందుకు గట్టి ప్రయత్నాలు చేస్తోంది. గతంలో ప్రధాని నరేంద్ర మోడీ అమెరికా పర్యటన సందర్భంగా, ఇరుదేశాలు మధ్య వాణిజ్యాన్ని 2030 నాటికి 500 బిలియన్‌ డాలర్లకు పెంచాలని లక్ష్యంగా పెట్టుకున్న విషయం తెలిసిందే. ప్రస్తుతం ఈ వ్యాపారం 191 బిలియన్‌ డాలర్ల స్థాయిలో ఉంది. ఇన్నేళ్లుగా సాగుతున్న చర్చలు ఇప్పుడు సారవంతమైన దశలోకి చేరడం, ఇరుదేశాల నేతలు వ్యాపార సంబంధాలను మరింత బలోపేతం చేయాలని సంకల్పించడమే ఈ ఒప్పందానికి గట్టితనాన్ని ఇస్తోంది. వాణిజ్య ఒప్పందం ఒకసారి అమల్లోకి వస్తే, అది ఆర్థిక పరంగా మాత్రమే కాదు, వ్యూహాత్మకంగా కూడా రెండు దేశాలకు లాభదాయకమవుతుంది.
Read Also: Youtuber: మరో ఇండియన్ యూట్యూబర్ అరెస్ట్.. ఈ సారి టర్కీలో