Kashmir Kid Viral Interview : టచ్ చేద్దామంటే కశ్మీర్లో మంచు లేదు.. బాధగా ఉంది – బాలిక ఇంటర్వ్యూ వీడియో వైరల్

కశ్మీర్ ను భూలోక స్వర్గం అంటారు. దాన్ని చూసేందుకు రెండు కళ్ళూ చాలవు. రెండు కళ్ళూ లేని ఓ పాప.. కశ్మీర్ కు వస్తే ఏం కోరుకుంటుంది ? మంచు దుప్పటి తో కప్పి ఉండే కశ్మీరం అందాలను చూడలేకపోయినా.. కనీసం మంచునైనా టచ్ చేయాలని పరితపిస్తుంది. సరిగ్గా ఇదే కోరికతో ఓ బాలిక తన తల్లిదండ్రులతో కలిసి కశ్మీర్ పర్యటనకు వచ్చింది. అయితే.. వాళ్ళు పర్యటనకు వచ్చిన ఈ సీజన్ వేసవికాలం . ఇప్పుడు కశ్మీర్ లో మంచు జాడ ఉండదు. దీంతో ఆ పాప ఆవేదనకు గురైంది. ఒక మీడియా సంస్థ ఆమెను ఇంటర్వ్యూ చేసిన వీడియో ఇప్పుడు సోషల్ మీడియాలో వైరల్ గా మారింది. అందులో ఏముందంటే.. ‘ నేను కశ్మీర్ పర్యటనకు వచ్చింది ఎందుకో తెలుసా ? కేవలం మంచును టచ్ చేయడానికి .. కానీ టచ్ చేద్దామంటే మంచు ఎక్కడా కనిపించలేదు.. ఇందుకు నాకు చాలా బాధగా ఉంది ‘ అని ఆ పాప పేర్కొంది. ముద్దుముద్దు మాటలతో.. అద్భుతమైన ఆంగ్ల భాషలో తన మదిలోని భావాలను వ్యక్తీకరించిన ఆ బాలిక పెరు పౌష్పిక. ఇప్పుడు ఈమెపై ట్విట్టర్ వేదికగా ప్రశంసల వర్షం కురుస్తోంది. ” నీ వయసులో నాకు ఒకటి , రెండు ఆంగ్ల పదాలు మినహా ఏమీ రాదు’ అని ఒకరు కామెంట్ చేయగా.. ‘ వేసవిలోనూ బాల పర్యాటకుల కోసం మంచును సిద్ధంగా ఉంచాలి’ అని ఇంకొకరు ట్వీట్ చేశారు. ‘ఆమె మాట్లాడిన ఇంగ్లీష్ ను కాదు.. ఆమె ఆత్మవిశ్వాసం, భావ వ్యక్తీకరణ సామర్ధ్యం ఎంతలా ఉన్నాయో చూడండి’ అని మరో నెటిజన్ కామెంట్ పెట్టాడు.