Indian International Trains : ఈ రైళ్లు ఎక్కితే ఫారిన్ కు వెళ్లొచ్చు

Indian International Trains : ఫారిన్ కు వెళ్లేందుకు విమానమే ఎక్కాలి.. ఈ భ్రమలో ఉండకండి!!

మీరు కొన్ని ట్రైన్స్ ఎక్కినా ఫారిన్ కు వెళ్ళిపోతారు. 

కొన్ని గంటల్లో ఇండియా బార్డర్ దాటిపోతారు. 

ఇప్పటివరకు మనం ఒక రాష్ట్రం నుంచి మరో రాష్ట్రానికి భారతీయ రైలులో ప్రయాణించి ఉంటాం.

అయితే మనం కొన్ని భారతీయ రైళ్లలో జర్నీ చేసి విదేశాలకు కూడా వెళ్లొచ్చు. 

మీకు ఈవిషయం తెలుసా ? తెలియకపోతే ఎలా?   ఇప్పుడు ఆ రైళ్ల జాబితాను మనం తెలుసుకుందాం.

రైలు ప్రయాణం ఆహ్లాదకరమైనది.. దేశ అందాలను చూడటానికి ఇది గొప్ప మార్గం. రైలు ప్రయాణం అనేది దాదాపు ప్రతి భారతీయుడి జీవితంలో అంతర్భాగం. భారతదేశంలో ప్రతిరోజూ పెద్ద సంఖ్యలో ప్రజలు రైలులో ప్రయాణిస్తుంటారు. అందుకే రైలును భారతదేశ జీవనరేఖ అంటారు. ముంబైలోని లోకల్ రైళ్ల నుంచి సిమ్లాలోని టాయ్ రైళ్ల వరకు, భారతదేశంలోని ప్రతి రైలు ప్రయాణం ఒక మర్చిపోలేని అనుభవం. కానీ అంతర్జాతీయ రైలు ప్రయాణం విషయానికి వస్తే, యూరప్ మాత్రమే అందరికీ గుర్తుకు వస్తుంది. యురైల్ అనేది యూరప్ యొక్క అంతర్జాతీయ రైలు వ్యవస్థ..  ఇందులో భాగంగా నడిపే ట్రైన్లు ఎక్కితే యూరోప్ దేశాలన్నీ తిరిగి రావచ్చు. ఇదేవిధంగా మీరు మన ఇండియా నుంచి కూడా ట్రైన్ లో విదేశాలకు(Indian International Trains) వెళ్లొచ్చు. అలాంటి కొన్ని రైళ్ల గురించి తెలుసుకుందాం.

ఇండియా – పాకిస్తాన్ 

ఇండియా నుంచి పాకిస్తాన్‌కు నడిచే రెండు రైళ్ల పేరు..  సంఝౌతా ఎక్స్‌ప్రెస్, థార్ లింక్ ఎక్స్‌ప్రెస్. సంఝౌతా ఎక్స్‌ప్రెస్ భారతదేశం నుంచి పాకిస్తాన్‌కు అత్యంత ప్రసిద్ధ రైలు. ఇది అమృత్‌సర్‌లోని అట్టారి జంక్షన్ నుంచి ప్రారంభమై పాకిస్తాన్‌లోని లాహోర్ జంక్షన్ వరకు వెళుతుంది. లింక్ ఎక్స్‌ప్రెస్ భారతదేశంలోని జోధ్‌పూర్‌లోని భగత్ కీ కోఠి రైల్వే స్టేషన్‌లో ప్రారంభమై, పాకిస్తాన్‌లోని కరాచీలోని కరాచీ కంటోన్మెంట్‌లో ముగుస్తుంది.

సంఝౌతా ఎక్స్‌ప్రెస్ 

రైలు నంబర్ 14607.. దీనికి సంబంధించిన టిక్కెట్లను అమృత్‌సర్‌లోని అత్తారి జంక్షన్‌లో మాత్రమే ఆఫ్‌లైన్‌లో బుక్ చేసుకోవచ్చు. దీని కోసం టిక్కెట్‌లను బుక్ చేయడానికి, మీరు ముందుగా పాకిస్తాన్ వీసా కోసం దరఖాస్తు చేసుకోవాలి. వీసాకు ఆమోదం పొందాలి. చెల్లుబాటు అయ్యే పాకిస్తాన్ వీసా లేకుండా మీరు రైలు టిక్కెట్‌ను కొనలేరు. రైలు భారతదేశం నుంచి ఉదయం 11.30 గంటలకు బయలుదేరి..  27 కి.మీ దూరాన్ని 4 గంటల 10 నిమిషాలలో పూర్తి చేసి మధ్యాహ్నం 3.40 గంటలకు లాహోర్ కు చేరుకుంటుంది. ఈ రైలుకు పంజాబ్‌లోని వాఘా వద్ద ఒక స్టాప్ మాత్రమే ఉంది. ఇది సోమ, గురువారాల్లో వారానికి రెండుసార్లు నడుస్తుంది. ఇది భారతదేశంలోని అత్యంత ప్రతిష్టాత్మకమైన అంతర్జాతీయ రైళ్లలో ఒకటి.

థార్ లింక్ ఎక్స్‌ప్రెస్

రైలు నంబర్ 14890.. దీని కోసం టిక్కెట్లను బుక్ చేయడానికి  ముందుగా పాకిస్తాన్ వీసా పొందాలి. ఆ తర్వాత మాత్రమే ఆఫ్‌లైన్‌లో బుక్ చేసుకోవచ్చు. రైలు భారతదేశం నుంచి  జోధ్‌పూర్‌లోని భగత్ కి కోఠి రైల్వే స్టేషన్‌లో తన ప్రయాణాన్ని ప్రారంభించి, బలోత్రా-బార్మెర్-మనబావో మీదుగా పశ్చిమ దిశగా ప్రయాణిస్తుంది. ఇది పాకిస్తాన్ సరిహద్దును దాటి హైదరాబాద్-ఖోఖ్రాపర్ బ్రాంచ్ లైన్, కరాచీ-పెషావర్ రైల్వే మీదుగా వెళ్తుంది.  దాదాపు 12 గంటల 15 నిమిషాలలో ఈ రైలు 381 కిలోమీటర్ల దూరాన్ని ప్రయాణిస్తుంది. ఈ రైలు ప్రతి శనివారం భగత్ కి కోఠి నుంచి తెల్లవారుజామున 1 గంటలకు బయలుదేరి ఉదయం 7 గంటలకు మునబావో చేరుకుంటుంది. సరిహద్దును దాటి పాకిస్థాన్‌లోకి ప్రవేశించి..  అది మధ్యాహ్నం 2.30 గంటలకు (పాకిస్తాన్ స్థానిక కాలమానం ప్రకారం) జీరో పాయింట్‌కు చేరుకుంటుంది. ఆదివారం మధ్యాహ్నం 2.15 గంటలకు (పాకిస్తాన్ స్థానిక కాలమానం ప్రకారం) కరాచీ కంటోన్మెంట్‌కు చేరుకుంటుంది.

Also read : Kolkata Metro: చారిత్రక ఘట్టం.. నది లోపల మెట్రో రైలు పరుగు.. వీడియో చూడండి..!

భారతదేశం – బంగ్లాదేశ్

భారతదేశం, బంగ్లాదేశ్ మధ్య మైత్రి ఎక్స్‌ప్రెస్, బంధన్ ఎక్స్‌ప్రెస్ అనే రెండు రైళ్లు నడుస్తున్నాయి. మైత్రి ఎక్స్‌ప్రెస్ 2008లో ప్రారంభమై దశాబ్ద కాలంగా విజయవంతంగా నడుస్తోంది. ఇది కోల్‌కతా, ఢాకా మధ్య నడుస్తోంది. బంధన్ ఎక్స్‌ప్రెస్ 2017 నవంబర్ నుంచి నడుస్తోంది. ఇది కోల్‌కతా, ఖుల్నా మధ్య నడుస్తుంది.

మైత్రి ఎక్స్‌ప్రెస్ 

మైత్రీ ఎక్స్‌ప్రెస్ కోల్‌కతా, ఢాకా మధ్య నడుస్తుంది. ఈ రైలు ప్రతి వైపు నుంచి వారానికి ఆరు రోజులు నడుస్తుంది. కోల్‌కతా నుంచి ఢాకా చేరుకోవడానికి ఈ రైలు దాదాపు 375 కిలోమీటర్లు ప్రయాణిస్తుంది. ఈ రైలుకు 2 చోట్ల ఇమిగ్రేషన్ చెకింగ్స్ జరుగుతాయి. ఒకటి గెడె (భారతదేశం వైపు).. మరొకటి దోర్షోనా (బంగ్లాదేశ్ వైపు). ఈ రైలు కోల్‌కతాలో ఉదయం 7.10 గంటలకు బయలుదేరి సాయంత్రం 4.05 గంటలకు ఢాకాకు చేరుకుంటుంది. దీని కోసం టిక్కెట్లను కోల్‌కతా రైల్వే స్టేషన్‌లో ఆఫ్‌లైన్‌లో కొనొచ్చు. బంగ్లాదేశ్ వీసా పొందిన తర్వాత మాత్రమే టిక్కెట్‌లు అందుబాటులో ఉంటాయి.

బంధన్ ఎక్స్‌ప్రెస్

2017లో ప్రధాని మోడీ ప్రారంభించిన బంధన్ ఎక్స్‌ప్రెస్ కోల్‌కతా, బంగ్లాదేశ్‌లోని ఖుల్నా మధ్య ప్రతి వారం నడుస్తుంది. ఇది ఎరుపు-బూడిద రంగు మరియు ఆకాశ నీలం రంగు కోచ్‌లతో కూడిన పూర్తి ఎయిర్ కండిషన్డ్ రైలు. అయితే, రైలు ఎక్కడానికి వీసా అవసరం. ఎక్కువ మంది ప్రయాణికులను ఎక్కించుకోవడానికి ఈ రైలు జెస్సోర్‌లో 3 నిమిషాలు ఆగుతుంది.

భారతదేశాన్ని విదేశాలకు అనుసంధానించే ప్రాజెక్టులు

• ఇండో-నేపాల్ ఫ్రెండ్‌షిప్ రైల్ ప్రాజెక్ట్ కింద కుర్తా-బిజల్‌పురా రైలు విభాగాన్ని నేపాల్‌కు ప్రధాని నరేంద్ర మోడీ గురువారం (జూన్ 1న) అప్పగించారు. బీహార్‌లోని మధుబనిలో ఉన్న జయనగర్ నుంచి నేపాల్‌లోని బర్దిబాస్ వరకు రైల్వే సెక్షన్ నిర్మిస్తున్నారు. రెండో దశ నిర్మాణంలో, ఈ రైల్వే సెక్షన్‌లో కుర్తా నుండి బిజల్‌పురా వరకు రైలు నడపడానికి సన్నాహాలు పూర్తయ్యాయి.
• రూ.800 కోట్లతో జైనగర్‌ నుంచి బర్దీబాస్‌ వరకు 65.5 కిలోమీటర్ల మేర రైలు మార్గం పనులు 2014 నుంచి జరుగుతున్నాయి.
• 2001లో నేపాల్‌లో వరదల కారణంగా జనక్‌పూర్, బిజల్‌పురా మధ్య రైలు వంతెన ధ్వంసమైంది. దీని తర్వాత రైలు జనక్‌పూర్ వరకు మాత్రమే నడిచింది. భారత ప్రభుత్వం 2010లో ఇండో-నేపాల్ ఫ్రెండ్‌షిప్ రైల్ ప్రాజెక్ట్ కింద దీనిని బ్రాడ్ గేజ్‌గా మార్చాలని ప్రణాళిక వేసింది.
• జైనగర్, బర్దిబన్స్ రైలు సెక్షన్‌లోని కుర్తా నుండి బిజల్‌పురా వరకు నిర్మించిన 17.5 కిలోమీటర్ల రైలు సెక్షన్ కూడా నేపాల్ రైల్వేకు జూన్ 1న అప్పగించారు.

భారతదేశం-భూటాన్ రైలు లింక్ ప్రాజెక్ట్

భవిష్యత్తులో రైళ్ల ద్వారా భారత్-భూటాన్ మధ్య ప్రయాణించే అవకాశం ఉంటుంది. పొరుగు దేశాలైన భారతదేశం మరియు భూటాన్ మధ్య సరిహద్దు రైలు మార్గాన్ని అందించడానికి రైల్వే బోర్డు ద్వారా ముజ్నై-న్యోన్‌పలింగ్ లైన్ ఏర్పాటు కోసం ఒక సర్వే ప్రారంభించింది. ఆ సర్వే ఇప్పుడు పూర్తయింది.