Jyoti Malhotra: పాకిస్తాన్ కోసం గూఢచర్యం చేసిన ఆరోపణలతో హరియాణాకు చెందిన యూట్యూబర్ జ్యోతి మల్హోత్రాను (Jyoti Malhotra) అరెస్టు చేశారు. ఈ కేసులో పంజాబ్‌లోని మలేర్‌కోట్లా, హరియాణా నుంచి మొత్తం ఆరుగురు పాకిస్తానీ గూఢచారులను అరెస్టు చేశారు. ఇప్పుడు ఈ కేసులో పెద్ద విషయం వెల్ల‌డైంది.
జ్యోతి మల్హోత్రా ఇన్‌స్టాగ్రామ్ ఖాతాను పరిశీలించినప్పుడు పహల్గామ్ ఉగ్రవాద దాడికి మూడు నెలల ముందు ఆమె శ్రీనగర్ పర్యటనకు వెళ్లినట్లు తెలిసింది. ఈ సందర్భంలో జ్యోతి పహల్గామ్‌కు కూడా వెళ్లింది. జనవరిలో శ్రీనగర్‌ను సందర్శించిన తర్వాత ఆమె మార్చి నెలలో పాకిస్తాన్‌కు వెళ్లింది. జ్యోతి మల్హోత్రా పాకిస్తాన్ హైకమిషన్‌లో పనిచేసే డానిష్ అనే అధికారితో సంబంధం ఉందని ఆరోపణలు ఉన్నాయి. ఈ అధికారే జ్యోతిని పాకిస్తాన్‌కు ర‌ప్పించిన‌ట్లు స‌మాచారం.
పోలీసు విచారణలో జ్యోతి ఏమి వెల్లడించింది?
పోలీసు విచారణలో ఆమె 2023లో పాకిస్తాన్ హైకమిషన్‌కు వెళ్లినట్లు అంగీకరించింది. ఆమెకు పాకిస్తాన్ వెళ్లడానికి వీసా అవసరం ఉంది. అక్కడ ఆమె అహ్సాన్-ఉర్-రహీమ్ అలియాస్ డానిష్‌ను కలిసింది. ఈ సందర్భంలో ఆమె డానిష్ మొబైల్ నంబర్ తీసుకొని అతనితో మాట్లాడటం ప్రారంభించింది. ఆ తర్వాత జ్యోతి రెండుసార్లు పాకిస్తాన్‌కు వెళ్లి డానిష్ సూచనల మేరకు అలీ అహ్వాన్‌ను కలిసింది. అలీ అహ్వాన్ పాకిస్తాన్‌లో ఆమె బస, పర్యటన ఏర్పాట్లు చేశాడు.
పాకిస్తానీ భద్రత, గూఢచర్య అధికారులతో సమావేశం
అలీ అహ్వాన్ అనే వ్యక్తి జ్యోతిని పాకిస్తానీ భద్రత, గూఢచర్య అధికారులతో కలిపాడు. ఈ సందర్భంలో ఆమె షాకిర్, రాణా షెహబాజ్ అనే ఇద్దరు వ్యక్తులను కూడా కలిసింది. షాకిర్ మొబైల్ నంబర్‌ను తీసుకొని అది ఎవరికీ అనుమానం రాకుండా ‘జట్ రంధావా’ పేరుతో సేవ్ చేసింది. భారత్‌కు తిరిగి వచ్చిన తర్వాత స్నాప్‌చాట్, వాట్సాప్, టెలిగ్రామ్ వంటి సోషల్ మీడియా ప్లాట్‌ఫారమ్‌ల ద్వారా వీరితో ట‌చ్‌లో ఉంది. దేశ వ్యతిరేక సమాచారాన్ని అందించడం ప్రారంభించింది. ఈ సమయంలో ఆమె పాకిస్తాన్ హైకమిషన్ అధికారి డానిష్‌తో నిరంతరం ట‌చ్‌లో ఉంది. జ్యోతి మల్హోత్రా పాకిస్తానీ గూఢచర్య సంస్థతో సంబంధం కలిగి ఉన్నట్లు బ‌య‌ట‌కు వ‌చ్చింది.
Also Read: RCB vs KKR Match: ఆర్‌సీబీ vs కేకేఆర్ మ్యాచ్‌లో భార‌త సైన్యం కోసం బీసీసీఐ కీల‌క నిర్ణ‌యం!
భద్రతా సంస్థలు జ్యోతిపై నిఘా ఉంచాయి
హిసార్ పోలీసులు శనివారం (మే 17, 2025) జ్యోతిని కోర్టులో హాజరుపరిచి 5 రోజుల రిమాండ్‌పై తీసుకున్నారు. హిసార్ పోలీసుల ప్రకారం.. మే 15న DSP జితేంద్ర కుమార్ నేతృత్వంలో ఒక బృందం జ్యోతిని ఆమె ఇంటి నుంచి అదుపులోకి తీసుకుంది. ఆమెపై హిసార్ సివిల్ లైన్ పోలీస్ స్టేషన్‌లో కేసు నమోదు చేయబడింది. కేంద్ర సంస్థలు జ్యోతిని విచారిస్తున్నాయి. హిసార్ పోలీసుల ప్రకారం.. జ్యోతి పాకిస్తానీ గూఢచర్య సంస్థలతో ట‌చ్‌లో ఉంది. సోషల్ మీడియా ద్వారా భారతదేశ రహస్య సమాచారాన్ని పంపుతోంది. మూడుసార్లు పాకిస్తాన్ పర్యటన చేసిన జ్యోతిపై భారతీయ భద్రతా సంస్థలు నిఘా ఉంచాయి.