Supreme Court : ప్రపంచం నలుమూలల నుంచి వచ్చే శరణార్థులకు భారత్ ఆశ్రయం కల్పించే ఉచిత శిబిరం కాదని సుప్రీం కోర్టు స్పష్టంగా పేర్కొంది. శరణార్థుల తరఫున వచ్చిన ఓ పిటిషన్పై విచారణ సందర్భంగా అత్యున్నత న్యాయస్థానం ఈ తీవ్ర వ్యాఖ్యలు చేసింది. ‘‘ఇక్కడ సెటిల్ అయ్యేందుకు మీకేం హక్కు ఉంది?’’ అంటూ ధర్మాసనం పిటిషనర్ను ప్రశ్నించింది. శ్రీలంకకు చెందిన ఓ వ్యక్తి 2015లో నిషేధిత ఉగ్రవాద సంస్థ ‘లిబరేషన్ టైగర్స్ ఆఫ్ తమిళ్ ఈలం (LTTE)’తో సంబంధాలున్నారని ఆరోపణలతో తమిళనాడు పోలీసులచే అరెస్టు చేయబడ్డాడు. అనంతరం అతనిపై చట్టవ్యతిరేక కార్యకలాపాల నిరోధక చట్టం (UAPA) కింద ట్రయల్ కోర్టు విచారణ జరిపింది. 2018లో అతడిని దోషిగా తేల్చి 10 ఏళ్ల జైలు శిక్ష విధించింది.
Read Also: Kaleshwaram Project : మరోసారి కాళేశ్వరం విచారణ కమిషన్ గడువు పొడిగింపు
ఈ తీర్పును తనవైపు తగ్గించేందుకు అతను మద్రాసు హైకోర్టును ఆశ్రయించాడు. హైకోర్టు అతని శిక్షను 10 ఏళ్ల నుంచి ఏడేళ్లకు తగ్గించింది. అయితే శిక్ష పూర్తైన తర్వాత అతను భారత్ నుండి బయటకు వెళ్లాలని స్పష్టమైన ఆదేశాలు జారీ చేసింది. ఈ నేపథ్యంలో మళ్ళీ సుప్రీంకోర్టును ఆశ్రయించిన ఆ వ్యక్తి, తనకు శరణార్థ హక్కులు కల్పించాలని కోరాడు. చట్టబద్ధమైన వీసా ఆధారంగా భారత్కు వచ్చానని పేర్కొన్న అతను, శ్రీలంకలో తన ప్రాణాలకు ముప్పు ఉందని వాదించాడు. అంతేగాక, తన భార్య మరియు పిల్లలు ఇప్పటికే భారత్లోనే నివసిస్తున్నారని తెలిపాడు.
ఈ వాదనలపై స్పందించిన సుప్రీంకోర్టు ధర్మాసనం, జస్టిస్ దీపాంకర్ దత్తా మరియు జస్టిస్ కె. వినోద్ చంద్రన్లతో కూడిన బెంచ్, పిటిషనర్పై తీవ్ర అసంతృప్తి వ్యక్తం చేసింది. ‘‘ప్రపంచం నలుమూలల నుంచి వచ్చే వారందరికీ భారత్ ఆశ్రయం కల్పించే ధర్మశాల కాదు. ఇప్పటికే 140 కోట్ల మంది జనాభా ఉన్న దేశం ఇది. ప్రతి ఒక్కరినీ ఆదరించలేము. మీకెందుకు ఇక్కడ స్థిరపడే హక్కు ఉంది?’’ అని ప్రశ్నించింది. పిటిషనర్ తరఫున న్యాయవాది, శ్రీలంకలో అతని ప్రాణాలకు ముప్పు ఉందని, భారతదేశం నుంచి పంపితే అతడి భవిష్యత్తు ప్రమాదంలో పడుతుందని వాదించారు. దీనికి సుప్రీంకోర్టు స్పందిస్తూ, ‘‘అలా అయితే మరో దేశానికి వెళ్లండి. భారత్ను శరణార్థ గమ్యస్థానంగా మలుచుకోకండి,’’ అని తేల్చిచెప్పింది.
ఈ తీర్పుతో శరణార్థ హక్కుల విషయంలో భారత్ విధానం మరోసారి స్పష్టమైంది. భారత్ అంతర్జాతీయ శరణార్థ ఒప్పందాలపై సంతకాలు చేయని దేశం కావడంతో, ఇక్కడ శరణార్థ హక్కులు అంత సులభంగా లభించవు. ప్రత్యేక సందర్భాల్లో మాత్రమే కేంద్రం నిర్ణయం తీసుకుంటుంది. ఈ తీర్పు, భవిష్యత్తులో శరణార్థుల తరఫున దాఖలయ్యే పిటిషన్లపై ప్రభావం చూపే అవకాశం ఉంది. భారతదేశం ప్రతి ఒక్క శరణార్థుడిని ఆదరించాల్సిన అవసరం లేదని, శరణార్థుల పేరుతో భారత్లో స్థిరపడాలనే ఆలోచనను ప్రోత్సహించబోమని సుప్రీంకోర్టు తన తీర్పు ద్వారా స్పష్టంచేసింది. ఇది శరణార్థ విధానానికి గల పరిమితులను గుర్తు చేస్తూ, చట్టాన్ని దాటి ఆశ్రయం కోరే వారికి హెచ్చరికగా ఈ తీర్పు నిలిచింది.
Read Also: Warangal Railway Station : కాకతీయుల చరిత్రాత్మక కళ ఉట్టిపడేలా సుందరంగా రూపుదిద్దుకున్న వరంగల్ రైల్వే స్టేషన్..?