జనగామ జిల్లాలో కురుస్తున్న భారీ వర్షాలు భయానక దృశ్యాలను సృష్టిస్తున్నాయి. వాగులు, వంకలు ఉద్ధృతంగా ప్రవహిస్తున్నాయి. ఈ వరదల దెబ్బకు సాధారణ రాకపోకలు కూడా ప్రమాదకరంగా మారాయి. తాజాగా జఫర్‌గఢ్ మండలం శంకర్‌ తండా సమీపంలో దారుణ ఘటన చోటుచేసుకుంది. బైక్‌పై వెళ్తున్న యువతీయువకుడు వాగు దాటే ప్రయత్నంలో ఉద్ధృతమైన వరద ప్రవాహానికి కొట్టుకుపోయారు. స్థానికుల సహాయంతో యువకుడు శివకుమార్ చెట్టుకొమ్మ పట్టుకుని బయటపడగలిగాడు. అయితే అతనితో ఉన్న యువతి శ్రావ్య ప్రవాహంలో కొట్టుకుపోయి కనిపించకుండా పోయింది.
Floods in Warangal : వరదలతో ‘వరంగల్’ విల విల ..
ఈ ఘటనతో ప్రాంతమంతా విషాదం నెలకొంది. సమాచారం అందుకున్న పోలీసులు, SDRF సిబ్బంది తక్షణమే సంఘటనా స్థలానికి చేరుకుని గాలింపు చర్యలు ప్రారంభించారు. వరద ప్రవాహం చాలా వేగంగా ఉండడంతో రక్షణ బృందాలు పడవల సాయంతో వాగులో శ్రావ్య కోసం గాలిస్తున్నాయి. అయినప్పటికీ ఇప్పటివరకు ఆమె ఆచూకీ లభించలేదు. ఘటన జరిగిన ప్రాంతంలో వర్షాలు ఇంకా కొనసాగుతుండడంతో గాలింపు పనులు కష్టంగా మారాయి. గ్రామస్థులు కూడా పోలీసులతో కలిసి సహాయక చర్యల్లో పాల్గొంటున్నారు.
ఈ సంఘటన ప్రజలకు మరోసారి హెచ్చరికగా మారింది. అధికారులు వరద వాగులు, వంకలు దాటేందుకు ప్రయత్నించవద్దని పునరుద్ఘాటిస్తున్నారు. తేలికపాటి వర్షాల తర్వాత కూడా వాగులు ఒక్కసారిగా ఉద్ధృతం కావచ్చని చెబుతున్నారు. “ప్రాణం కంటే అవసరమేమీ లేదు. వర్షాలు ఆగిన తర్వాతే ప్రయాణించాలి” అని అధికారులు సూచించారు. శ్రావ్యను సురక్షితంగా కనుగొనాలని ఆమె కుటుంబ సభ్యులు కన్నీటి పర్యంతమవుతున్నారు. వరద బీభత్సం జనగామ జిల్లాలో ఇంకా కొనసాగుతుండడంతో స్థానిక ప్రజల్లో భయాందోళనలు నెలకొన్నాయి.