Upasana : తెలంగాణలో క్రీడారంగం మరింత అభివృద్ధి సాధించడం కోసం రాష్ట్ర ప్రభుత్వం ప్రారంభించిన ‘తెలంగాణ స్పోర్ట్స్ పాలసీ 2025’కి అనుగుణంగా ఏర్పాటు చేసిన ‘తెలంగాణ స్పోర్ట్స్ హబ్’కి కో-ఛైర్మన్గా నియమితులైన ఉపాసన కామినేని సీఎం రేవంత్ రెడ్డికి తన హృదయపూర్వక కృతజ్ఞతలు తెలియజేశారు. ఈ సందర్భంగా ఆమె ఎక్స్ వేదికగా స్పందించారు. తెలంగాణ స్పోర్ట్స్ హబ్ కో-ఛైర్మన్గా నన్ను నియమించినందుకు ముఖ్యమంత్రి రేవంత్ రెడ్డిగారికి నా ప్రత్యేక ధన్యవాదాలు. ఈ బాధ్యత నాకు గర్వకారణంగా ఉంది. రాష్ట్ర క్రీడా రంగ అభివృద్ధిలో భాగస్వామిగా ఉండే అవకాశం లభించడం నా జీవితంలో ఒక మైలురాయి అని ఉపాసన పేర్కొన్నారు.
Read Also: Rahul Gandhi : సోషల్ మీడియాలో కాదు.. పార్లమెంటులో మాట్లాడండి : రాహుల్ గాంధీకి సుప్రీం సూచన
తెలంగాణ ప్రభుత్వం ఇటీవలే విడుదల చేసిన ఉత్తర్వుల్లో, ప్రముఖ పారిశ్రామికవేత్త సంజీవ్ గోయెంకాను తెలంగాణ స్పోర్ట్స్ హబ్ ఛైర్మన్గా, అపోలో గ్రూప్ వైస్ ఛైర్పర్సన్ ఉపాసన కామినెనిని కో-ఛైర్మన్గా నియమించిన విషయం తెలిసిందే. ఈ నిర్ణయం క్రీడా రంగానికి సరికొత్త ఊపు తీసుకురానుంది అని నిపుణులు అభిప్రాయపడుతున్నారు. సంజీవ్ గోయెంకా గారితో కలిసి పనిచేసే అవకాశం రావడం నిజంగా మరొక గౌరవంగా భావిస్తున్నాను. ఈ బాధ్యతను నేను క్రీడా ప్రగతి కోసం పూర్తిస్థాయిలో వినియోగిస్తాను అని ఉపాసన అన్నారు. తెలంగాణ ప్రభుత్వం తీసుకొచ్చిన ‘స్పోర్ట్స్ పాలసీ 2025’ కింద రాష్ట్రంలోని క్రీడాకారులకు అంతర్జాతీయ ప్రమాణాలకు తగ్గ వసతులు, శిక్షణ, ప్రోత్సాహక కార్యక్రమాలు అందించేందుకు ప్రత్యేక ప్రణాళిక రూపొందించబడింది. ‘తెలంగాణ స్పోర్ట్స్ హబ్’ ఆ ప్రణాళిక అమలులో కీలక భాగస్వామిగా పనిచేయనుంది.
ఈ సందర్భంగా ఉపాసన, తెలంగాణ ఒలింపిక్ సంఘం ఉపాధ్యక్షుడు వేణుగోపాలాచారి మరియు రాష్ట్ర క్రీడలు, యువజన సేవల శాఖ ముఖ్య కార్యదర్శి జయేశ్ రంజన్లకు కూడా కృతజ్ఞతలు తెలిపారు. మీ ఆధ్వర్యంలో పనిచేయడానికి ఎదురుచూస్తున్నాను. మీరు చూపుతున్న మార్గదర్శకత్వం క్రీడా రంగాన్ని ముందుకు నడిపించడంలో ముఖ్య భూమిక పోషిస్తుంది అని ఆమె పేర్కొన్నారు. తెలంగాణలో క్రీడా అభివృద్ధికి ఇది ఒక కొత్త దిశగా పరిగణించబడుతోంది. దేశం మొత్తానికి ఆదర్శంగా నిలిచేలా స్పోర్ట్స్ హబ్ను తీర్చిదిద్దేందుకు ప్రభుత్వం తీసుకుంటున్న చర్యలు పలువురు క్రీడా విశ్లేషకులు ప్రశంసిస్తున్నారు. ఉపాసన కామినేని ఇప్పటికే ఆరోగ్య రంగంలో తన సేవలతో గుర్తింపు పొందారు. ఇప్పుడు క్రీడా రంగానికీ తమ సేవల్ని విస్తరించడంతో, యువతలో స్పూర్తిని నూరిపోసే అవకాశం ఉంది. తెలంగాణ ప్రభుత్వం తీసుకుంటున్న ఈ అడుగులు కేవలం క్రీడాకారుల కోసం మాత్రమే కాకుండా, క్రీడల ద్వారా సమాజం మొత్తం అభివృద్ధి చెందేలా చేయాలన్న దృష్టితో ముందుకు వెళ్తున్నాయనడంలో సందేహమే లేదు.
Read Also: Kamal Haasan : సనాతన బానిసత్వాన్ని అంతం చేయగల ఏకైక ఆయుధం విద్యే : కమల్ హాసన్