CM Revanth Reddy: తెలంగాణ ముఖ్యమంత్రి రేవంత్ రెడ్డి (CM Revanth Reddy) మాజీ ముఖ్యమంత్రి కేసీఆర్పై పరోక్షంగా సంచలన వ్యాఖ్యలు చేశారు. పరిపాలన సక్రమంగా సాగాలంటే రాజకీయ సంకల్పం (పొలిటికల్ విల్) చాలా అవసరమని ఆయన చెప్పారు. “తెలంగాణలో ఒకప్పుడు ట్రంప్లాంటి నాయకుడు ఉండేవాడు. ప్రజలు ఆయనను పక్కన పెట్టేశారు” అంటూ రేవంత్ రెడ్డి కేసీఆర్ పాలన తీరును తీవ్రంగా విమర్శించారు.
రాత్రి పూట నిద్రలో ఏది ఆలోచన వస్తే మరుసటి రోజు ఉదయం దాన్ని ఆదేశంగా అమలు చేయాలనుకునే పాలన ఎక్కువ కాలం నిలబడదని ఆయన అన్నారు. ఇష్టానుసారంగా, నియంతృత్వ ధోరణితో పాలన సాగించేవారు ఎవరైనా ట్రంప్లాగే ప్రజల మద్దతును కోల్పోతారని స్పష్టం చేశారు. “ట్రంప్ తీసుకున్న నిర్ణయాలు అమెరికాకే నష్టం చేకూర్చాయి” అని గుర్తుచేస్తూ అలాంటి ఏకపక్ష నిర్ణయాలు ప్రజలకు మేలు చేయవని ఆయన సూచించారు.
అమెరికా సంస్థలకు తెలంగాణ ఆహ్వానం
అమెరికా ప్రభుత్వం తమ దేశంలో ఉండకూడదని చెబుతున్న ప్రతిష్టాత్మక సంస్థలైన హార్వర్డ్, స్టాన్ఫోర్డ్ లాంటి వాటిని భారతదేశానికి, ముఖ్యంగా తెలంగాణకు ఆహ్వానిస్తున్నామని రేవంత్ రెడ్డి తెలిపారు. “అమెరికాను కాదంటున్న సంస్థలు భారతదేశానికి రావాలి. తెలంగాణకు మేం స్వాగతం పలుకుతున్నాం” అని అన్నారు.
Also Read: TikTok: ట్రంప్ టిక్టాక్ను ఎందుకు పునరుద్ధరించాలని చూస్తున్నారు?
అంతేకాకుండా పెట్టుబడులు పెట్టడానికి తెలంగాణలో ఉన్న అద్భుతమైన అవకాశాలను ఆయన వివరించారు. రాష్ట్రంలో అన్ని రకాల మౌలిక వసతులు, పరిశ్రమలకు అనుకూలమైన వాతావరణం ఉందని హామీ ఇచ్చారు. “తెలంగాణకు రండి, పెట్టుబడులు పెట్టండి. మీతో కలిసి పనిచేయడానికి మా ప్రభుత్వం సిద్ధంగా ఉంది” అంటూ విదేశీ సంస్థలను ఉద్దేశించి మాట్లాడారు.
పాలనలో పారదర్శకత, ప్రజల భాగస్వామ్యం
కేసీఆర్ పాలనలో విధానపరమైన నిర్ణయాలు ప్రజలకు తెలియకుండా అత్యంత రహస్యంగా జరిగేవని విమర్శలు ఉన్నాయి. అయితే తన పాలనలో అలాంటి అప్రజాస్వామిక పద్ధతులు ఉండవని రేవంత్ రెడ్డి పరోక్షంగా తెలిపారు. ప్రతి నిర్ణయం ప్రజల ప్రయోజనాలను, రాష్ట్ర భవిష్యత్తును దృష్టిలో పెట్టుకుని ఉంటుందని, పాలనలో ప్రజల భాగస్వామ్యం ఉంటుందని ఆయన సూచించారు.
రాజకీయ సంకల్పంతో పాటు పారదర్శకమైన, ప్రజలకు జవాబుదారీగా ఉండే పాలన అవసరమని ఆయన పేర్కొన్నారు. కేవలం కలలు కనడం కాకుండా వాటిని నిజం చేసే కార్యాచరణ ఉండాలని, దానికోసం సుదీర్ఘ ప్రణాళికలు, సంప్రదింపులు జరగాలని ఆయన నొక్కి చెప్పారు. కేసీఆర్ ప్రభుత్వం మాదిరిగా కాకుండా ప్రజల భాగస్వామ్యంతోనే తెలంగాణను ముందుకు నడిపిస్తామని రేవంత్ రెడ్డి స్పష్టం చేశారు. ఇది ప్రజల మనసులను గెలిచి, సుస్థిరమైన పాలన అందించేందుకు దోహదపడుతుందని ఆయన ఆశాభావం వ్యక్తం చేశారు.