- గ్రూప్ 3 అభ్యర్థులకు గుడ్ న్యూస్
- 1,370 మంది అభ్యర్థులను ఎంపిక చేసిన తెలంగాణ రాష్ట్ర పబ్లిక్ సర్వీస్ కమిషన్
- గ్రూప్-3 ఉద్యోగాల భర్తీ ప్రక్రియలో కీలక ఘట్టం
తెలంగాణ రాష్ట్ర పబ్లిక్ సర్వీస్ కమిషన్ (TGPSC) గ్రూప్-3 ఉద్యోగాల భర్తీ ప్రక్రియలో కీలక ఘట్టాన్ని పూర్తి చేస్తూ తుది ఫలితాలను విడుదల చేసింది. సుదీర్ఘ నిరీక్షణ తర్వాత అభ్యర్థుల మెరిట్, రిజర్వేషన్లు మరియు ఇటీవల పూర్తి చేసిన సర్టిఫికెట్ వెరిఫికేషన్ ఆధారంగా ఈ ఎంపిక జాబితాను ఖరారు చేశారు. మొత్తం 1,388 పోస్టులకు గాను ప్రస్తుతం 1,370 మంది అభ్యర్థులను ఎంపిక చేసినట్లు కమిషన్ ప్రకటించింది. ఈ ఫలితాలకు సంబంధించిన పూర్తి వివరాలు మరియు ఎంపికైన వారి జాబితాను టీజీపీఎస్సీ అధికారిక వెబ్సైట్లో అభ్యర్థుల సౌకర్యార్థం అందుబాటులో ఉంచారు.
Tgpsc Group 3
ఈ ఎంపిక ప్రక్రియలో సాంకేతిక మరియు పరిపాలనాపరమైన కారణాల వల్ల కొన్ని పోస్టుల ఫలితాలను కమిషన్ హోల్డ్లో ఉంచింది. మొత్తం ఖాళీలలో ఒక పోస్టుకు సంబంధించిన వెరిఫికేషన్ ప్రస్తుతం పెండింగ్లో ఉండగా, మరో 17 పోస్టుల వివరాలను మరియు వాటి ఫలితాలను అతి త్వరలోనే వెల్లడిస్తామని అధికారులు స్పష్టం చేశారు. వివిధ శాఖల్లో ఖాళీగా ఉన్న జూనియర్ అసిస్టెంట్, టైపిస్ట్ వంటి కీలక పోస్టులను ఈ నోటిఫికేషన్ ద్వారా భర్తీ చేస్తున్నారు. అభ్యర్థుల ధృవపత్రాల పరిశీలన అనంతరం అత్యంత పారదర్శకంగా ఈ తుది జాబితాను రూపొందించినట్లు తెలుస్తోంది.
గ్రూప్-3 ఫలితాల విడుదలపై అభ్యర్థుల నుంచి హర్షం వ్యక్తమవుతోంది. నియామక ప్రక్రియ తుది దశకు చేరుకోవడంతో, ఎంపికైన అభ్యర్థులు త్వరలోనే ఆయా శాఖల్లో విధుల్లో చేరనున్నారు. రాష్ట్ర ప్రభుత్వంలోని వివిధ విభాగాల్లో పాలనా యంత్రాంగాన్ని బలోపేతం చేసేందుకు ఈ నియామకాలు దోహదపడనున్నాయి. పెండింగ్లో ఉన్న మిగిలిన పోస్టుల భర్తీని కూడా యుద్ధప్రతిపాదికన పూర్తి చేసి, అభ్యర్థులకు నియామక పత్రాలు అందజేసే దిశగా ప్రభుత్వం అడుగులు వేస్తోంది.