తెలంగాణ లో ముందుస్తు అసెంబ్లీ ఎన్నికలు ఉంటాయని భావించాయి పలు ప్రధాన పార్టీలు. అయితే ఇప్పట్లో ముందస్తు ఉంటుందో, లేదో కానీ స్థానిక పోరు మాత్రం (పంచాయతీ ఎన్నికలు) రంగం సిద్దమైనట్లు తెలుస్తోంది. రాష్ట్రంలో గ్రామీణ, పట్టణ స్థానిక సంస్థల్లో ఖాళీగా ఉన్న 6 వేలకు పైగా సర్పంచ్లు, ఉప సర్పంచ్లు, జడ్పీటీసీలు, ఎంపీటీసీలు, వార్డు సభ్యుల స్థానాల ఎన్నికలకు ఏర్పాట్లు జరిగే అవకాశాలున్నాయి. SSC, ఇంటర్మీడియట్ పరీక్షలు ముగిసిన తర్వాత ఈ ఖాళీలకు ఎన్నికలు మే నెల చివరిలో లేదా జూన్ మధ్యలో జరిగే అవకాశం ఉంది. పాఠశాలలు, కళాశాలల భవనాలను పోలింగ్ కేంద్రాలుగా వినియోగించనున్నందున, ఈ నెలాఖరులోగా ఓటర్ల జాబితా సవరణ, పోలింగ్ బూత్లను మొదటి వారంలోగా ఖరారు చేయాలని జిల్లా ఎన్నికల అధికారులను తెలంగాణ రాష్ట్ర ఎన్నికల సంఘం ఆదేశిస్తూ ముందస్తు ఎన్నికల ప్రక్రియను ప్రారంభించింది.
తాము ముందస్తు ఎన్నికల కసరత్తును ప్రారంభించామని, రాష్ట్ర ప్రభుత్వంతో సంప్రదింపులు జరిపి వీలైనంత త్వరగా ఎన్నికలు నిర్వహిస్తామని తెలంగాణ ఎన్నికల కమిషనర్ సి.పార్థ సారథి స్పష్టం చేశారు. కరోనా మహమ్మారి ప్రభావం తగ్గుముఖం పట్టడంతోపాటు, ఇటీవల ఐదు రాష్ట్రాల అసెంబ్లీలకు ఎన్నికలు జరిగిన తర్వాత కూడా ఎక్కువ కేసులు నమోదు కాకపోవడంతో రాష్ట్ర ప్రభుత్వం అనుమతి ఇచ్చే అవకాశం ఉందని ఆరోగ్య శాఖ సీనియర్ అధికారి ఒకరు తెలిపారు. 2018, 2019లో ఎన్నికలు జరిగినప్పటి నుండి 6,000 సర్పంచ్లు, MPTC, ZPTC సభ్యులు, ఉప సర్పంచ్ల ఖాళీలు ఖాళీ అయ్యాయి. కొంతమంది సిట్టింగ్ సభ్యులు మరణించగా, మరికొందరు రాజీనామా చేశారు. దీంతో ఆయా స్థానాలకు ఎన్నికలు జరగాల్సి ఉంది.