తెలంగాణ రాష్ట్ర క్యాబినెట్ (Telangana Cabinet) ఈ నెల 10న సమావేశం కానుంది. ఈ భేటీ రాష్ట్ర సచివాలయంలోని ముఖ్యమంత్రి కాన్ఫరెన్స్ హాల్లో మధ్యాహ్నం 2 గంటలకు ప్రారంభం అవుతుంది. సీఎం రేవంత్ రెడ్డి అధ్యక్షతన నిర్వహించనున్న ఈ సమావేశంలో ప్రభుత్వం చేపట్టిన పలు ప్రాధాన్యత ఉన్న అంశాలపై కీలకంగా చర్చించనుంది. రాష్ట్ర పాలనకు సంబంధించిన కీలక నిర్ణయాలు తీసుకునే అవకాశం ఉంది.
Musk Party : మస్క్ కొత్త పార్టీ ఎఫెక్ట్.. పడిపోయిన టెస్లా షేర్లు
ఈ సమావేశంలో ముఖ్యంగా స్థానిక సంస్థల ఎన్నికలు ప్రధాన అజెండాగా ఉండే అవకాశముంది. గత కొంత కాలంగా పెండింగ్లో ఉన్న పంచాయతీ, మున్సిపల్ ఎన్నికల నిర్వహణపై కేబినెట్ చర్చించే అవకాశం ఉంది. అలాగే ఎన్నికలలో బీసీలకు 42 శాతం రిజర్వేషన్ల అమలు విషయంపై స్పష్టత తీసుకురావాలని భావిస్తున్నారు. ఈ రిజర్వేషన్లు రాజకీయంగా, సామాజికంగా ప్రాధాన్యం సంతరించుకున్న అంశంగా మారింది.
ఇక మరోవైపు రాష్ట్ర ప్రభుత్వం అమలు చేస్తున్న సంక్షేమ పథకాల ప్రగతిపై కూడా ఈ సమావేశంలో సమీక్ష జరిగే అవకాశం ఉంది. మహాలక్ష్మి, గృహలక్ష్మి, రైతు భరోసా, చెరువు పునరుద్ధరణ వంటి పథకాల అమలు పరిస్థితులు, ప్రజల అభిప్రాయాలు, బడ్జెట్ కేటాయింపులపై చర్చించే అవకాశం ఉంది. రాష్ట్ర అభివృద్ధి దిశగా తీసుకోవాల్సిన తదుపరి చర్యలపై క్యాబినెట్లో స్పష్టమైన నిర్ణయాలు తీసుకునే అవకాశముంది.