Telangana : తెలంగాణ‌లో 19ల‌క్ష‌ల రేష‌న్ కార్డుల ర‌ద్దు

Supreme Court

తెలంగాణ వ్యాప్తంగా కేసీఆర్ స‌ర్కార్ 19లక్ష‌ల రేష‌న్ కార్డుల‌ను ర‌ద్దు చేసింది. ఆ విష‌యంపై సుప్రీం కోర్టు ఆగ్ర‌హం వ్య‌క్తం చేసింది. ఎలాంటి వ్య‌క్తిగ‌త విచార‌ణ లేకుండా రేష‌న్ కార్డుల‌ను ఎలా ర‌ద్దు చేస్తార‌ని తెలంగాణ అధికారుల‌ను నిల‌దీసింది. భౌతికంగా ప‌రిశీలించిన త‌రువాత రేష‌న్ కార్డుల‌ను వెంట‌నే మంజూరు చేయాల‌ని సుప్రీం కోర్టు ఆదేశించ‌డం గ‌మ‌నార్హం.

కంప్యూటర్ అల్గారిథమ్ ఆధారంగా రేష‌న్ కార్డుల‌ను ర‌ద్దు చేసిన విష‌యాన్ని న్యాయమూర్తులు ఎల్ నాగేశ్వరరావు, జస్టిస్ బిఆర్ గవాయ్‌లతో కూడిన ధర్మాసనం త‌ప్పు బ‌ట్టింది. “కేంద్ర ప్రభుత్వం 2016లో జారీ చేసిన ఆదేశానుసారం రద్దు చేసిన అన్ని రేషన్ కార్డుల వెరిఫికేషన్ నిర్వహించాలని తెలంగాణ రాష్ట్రాన్ని ఆదేశించింది. కార్డులను ఎలా రద్దు చేశారంటూ చీఫ్ సెక్రటరీ నుంచి సమాధానం కోరింది. పెద్ద సంఖ్య‌లో రేష‌న్ కార్డుల‌ను ర‌ద్దు చేయ‌డం కార‌ణంగా ఉచిత రేషన్ పొందే హక్కు లేకుండా పోయింది.

పిటిషనర్ తరపున వాదించిన సీనియర్ న్యాయవాది కొలిన్ గోన్సాల్వేస్, ప్రజలకు అవకాశం ఇవ్వకుండా రేషన్ కార్డులను రద్దు చేశారని వాదించారు. రేషన్ కార్డులు రద్దయిన వారు తాజాగా కార్డుల కోసం దరఖాస్తు చేసుకోవాలని ఆయన తెలిపారు. అన్ని కార్డుల ఫీల్డ్ వెరిఫికేషన్‌ను నిర్వహించాలని, అలాగే బాధిత కార్డు హోల్డర్‌కు త్వరితగతిన కార్డులు మంజూరు చేయాల‌ని అధికారుల‌ను సుప్రీం ఆదేశించింది.

కె. పుట్టస్వామి తీర్పును ఉల్లంఘించే ఆధార్ కార్డ్‌ని తప్పుగా నమోదు చేయడంతో సహా కంప్యూటర్ అల్గారిథమ్ ఆధారంగా కార్డులు రద్దు చేయబడ్డాయి అని గోన్సాల్వ్స్ వాదించారు. ఆధార్ కార్డు తప్పనిసరి కాదని కేంద్ర ప్రభుత్వం చెబుతున్నప్పటికీ కార్డులు ర‌ద్దు చేయ‌డంతో ప్రజలకు ఆహార ధాన్యాలు అందకుండా పోతున్నాయని సుప్రీం కోర్టుకు నివేదించింది. కార్డులను రద్దు చేసే ముందు రాష్ట్రం మరింత జాగ్రత్తగా ఉండాలని ధర్మాసనం పేర్కొంది.

రేషన్ కార్డుల రద్దుకు వ్యతిరేకంగా తన ప్రజా ప్రయోజన వ్యాజ్యాన్ని (పిఐఎల్) స్వీకరించడానికి నిరాకరించిన తెలంగాణ హైకోర్టు ఆదేశాలను సవాలు చేస్తూ సామాజిక కార్యకర్త ఎస్‌క్యూ మసూద్ దాఖలు చేసిన పిటిషన్‌ను విచారించిన సందర్భంగా అత్యున్నత న్యాయస్థానం ఈ వ్యాఖ్యలు చేసింది.