- అసెంబ్లీలో 2 గంటలు ఏకధాటిగా మాట్లాడిన సీఎం రేవంత్
- పాలమూరు-రంగారెడ్డి, కాళేశ్వరం ప్రాజెక్టుల విషయంలో బిఆర్ఎస్ అన్యాయం
- అంత కేసీఆర్ , హరీష్ రావు లే చేసారు
తెలంగాణ అసెంబ్లీలో ముఖ్యమంత్రి రేవంత్ రెడ్డి అసాధారణ రీతిలో రెండు గంటల పాటు ఏకధాటిగా ప్రసంగించారు. రాత్రి 7:30 గంటలకు ప్రారంభించి 9:30 గంటల వరకు అనర్గళంగా మాట్లాడుతూ, రాష్ట్ర నీటిపారుదల రంగానికి సంబంధించిన అనేక అంశాలను సభ ముందు ఉంచారు. ముఖ్యంగా కృష్ణా జలాల కేటాయింపులో గత ప్రభుత్వం అనుసరించిన విధానాల వల్ల తెలంగాణకు తీరని అన్యాయం జరిగిందని ఆయన ఆవేదన వ్యక్తం చేశారు. సాగునీటి రంగంపై ముఖ్యమంత్రికి ఉన్న పట్టును ప్రదర్శిస్తూ, గణాంకాలతో సహా గత పదేళ్లలో జరిగిన పరిణామాలను వివరించడం గమనార్హం.
Cm Revanth Reddy
అలాగే బీఆర్ఎస్ ప్రభుత్వంపై సీఎం రేవంత్ రెడ్డి తీవ్రస్థాయిలో ధ్వజమెత్తారు. పాలమూరు-రంగారెడ్డి ఎత్తిపోతల పథకం, కాళేశ్వరం ప్రాజెక్టు నిర్మాణాల్లో జరిగిన లోపాలను ఎండగట్టారు. నాటి ముఖ్యమంత్రి కేసీఆర్, అప్పటి నీటిపారుదల శాఖ మంత్రి హరీశ్ రావు ద్వయం రాష్ట్ర ప్రయోజనాలను తాకట్టు పెట్టారని ఆరోపించారు. ప్రాజెక్టుల రీ-డిజైనింగ్ పేరుతో వేల కోట్లు వృధా చేశారని, కాళేశ్వరం వంటి ప్రాజెక్టులు కుంగిపోవడానికి వారి అనాలోచిత నిర్ణయాలే కారణమని మండిపడ్డారు. కృష్ణా జలాల విషయంలో గెజిట్ నోటిఫికేషన్ ద్వారా రాష్ట్ర హక్కులను కేంద్రానికి అప్పగించారని విమర్శలు గుప్పించారు.
ఎన్ని సవాళ్లు ఎదురైనా తెలంగాణకు దక్కాల్సిన ఒక్క చుక్క నీటిని కూడా వదులుకోబోమని సీఎం రేవంత్ రెడ్డి సభాముఖంగా స్పష్టం చేశారు. “నీళ్ల విషయంలో రాష్ట్రానికి అన్యాయం జరగనివ్వం” అని భరోసా ఇస్తూ, పెండింగ్ ప్రాజెక్టులను యుద్ధ ప్రాతిపదికన పూర్తి చేస్తామని ప్రకటించారు. ఉమ్మడి పాలమూరు, రంగారెడ్డి జిల్లాల రైతులకు సాగునీరు అందించడమే తమ ప్రభుత్వ ప్రథమ ప్రాధాన్యమని తెలిపారు. గత ప్రభుత్వ తప్పిదాలను సరిదిద్దుతూ, భవిష్యత్తులో తెలంగాణ గడ్డపై చుక్క నీరు వృధా కాకుండా పటిష్టమైన కార్యాచరణను రూపొందిస్తామని ఆయన తేల్చి చెప్పారు.