CM Revanth Reddy: తెలంగాణ ముఖ్యమంత్రి రేవంత్ రెడ్డి త్వరలో 1000 ఎలక్ట్రిక్ బస్సులు ప్రారంభించనున్నారని తెలిపారు రవాణా శాఖ మంత్రి పొన్నం ప్రభాకర్‌. ఈరోజు ఎన్టీఆర్‌ మార్గ్‌లోని అంబేద్కర్‌ విగ్రహం వద్ద 80 కొత్త టీఎస్‌ఆర్‌టీసీ బస్సులను మంత్రి జెండా ఊపి ప్రారంభించారు. ఈ సందర్భంగా మంత్రి మాట్లాడుతూ ఆర్టీసీలో 1050 కొత్త బస్సులను ప్రారంభించడం సంతోషంగా ఉందన్నారు. 80 కొత్త బస్సులను ప్రారంభించడం పట్ల ముఖ్యమంత్రి రేవంత్ రెడ్డి సంతోషం వ్యక్తం చేశారని చెప్పారు. త్వరలో సీఎం రేవంత్ రెడ్డి 1000 ఎలక్ట్రిక్ బస్సులను ప్రారంభించనున్నారని చెప్పాడు.
కార్మికుల హక్కులు, వారి సంక్షేమం, ప్రయాణికులు, టిఎస్‌ఆర్‌టిసి సంస్థ బలోపేతానికి కృషి చేయాలని మంత్రి పొన్నం ప్రభాకర్‌ కోరారు. గత ముఖ్యమంత్రి కేసీఆర్ నేతృత్వంలోని గత బిఆర్‌ఎస్‌ ప్రభుత్వం చేసిన అక్రమాలను , కార్పొరేషన్ అప్పులను సరిచేస్తామన్నారు. టిఎస్‌ఆర్‌టిసి కార్మికులు ఎంతో కష్టపడి పనిచేస్తున్నారని, వారి కృషి వల్లే కార్పొరేషన్ అభివృద్ధి చెందుతుందన్నారు. ముఖ్యమంత్రి రేవంత్‌రెడ్డి నేతృత్వంలో ప్రభుత్వం ఏర్పడిన 48 గంటల్లోనే ఉచిత పథకాన్ని ప్రారంభించామన్నారు. ఇప్పటి వరకు 6 కోట్ల మంది మహిళలు ఆర్టీసీ బస్సుల్లో ప్రయాణించారని తెలిపారు. గతంలో 40-50 ఉన్న ఆక్యుపెన్సీ ఇప్పుడు 100 దాటిపోతోందని, మహిళలకు ఉచిత ప్రయాణం అమలు చేసేందుకు అధికారులు కృషి చేయాలని మంత్రి పొన్నం కోరారు.
త్వరలో అధునాతన బస్సులను అందుబాటులోకి తెస్తున్నామన్నారు.364 బస్టాండ్లలో సౌకర్యాలు మెరుగుపరుస్తామని, ప్రభుత్వ నిర్ణయాలను బాధ్యతాయుతంగా అమలు చేసేందుకు ఆర్టీసీ అధికారులు కృషి చేయాలన్నారు. తెలంగాణ ఉద్యమంలో ఆర్టీసీ కార్మికుల కృషి మరువలేనిదని, ఉద్యమకారుడిగా, ఎంపీగా తనకు తెలుసునని అన్నారు. తెలంగాణ ఉద్యమం, రాష్ట్ర సాధన కోసం కార్మికులు అహర్నిశలు శ్రమించారన్నారు.ఆర్టీసీ సంక్షేమం కోసం ప్రభుత్వం కృషి చేస్తుందన్నారు. మహిళలకు ఉచిత బస్సు ప్రయాణం భవిష్యత్తులో కూడా కొనసాగుతుందని పొన్నం స్పష్టం చేశారు.
Also Read: Tea Bag Tips : మీరు కూడా టీ బ్యాగ్స్ వాడుతున్నారా..? అయితే ఈ విషయాలు ఖచ్చితంగా తెలుసుకోవాల్సిందే..