Ration : తెలంగాణ రాష్ట్రంలో రేషన్ డీలర్లు చేపట్టిన రాష్ట్రవ్యాప్త బంద్ కారణంగా రేపు రేషన్ దుకాణాలు మూతపడనున్నాయి. దీని ప్రభావం రేషన్ సరుకుల పంపిణీపై తీవ్రంగా పడే అవకాశం ఉంది. ప్రభుత్వం తమ హామీలను నెరవేర్చడంలో విఫలమైందని ఆరోపిస్తూ రేషన్ డీలర్లు ఈ నిరసన కార్యక్రమానికి పిలుపునిచ్చారు. రాష్ట్రవ్యాప్తంగా కార్యకలాపాలను నిలిపివేసేలా రేషన్ డీలర్లు ఒకరోజు బంద్‌కు పిలుపునివ్వడం గమనార్హం. ఈ బంద్‌ను తెలంగాణ రాష్ట్ర రేషన్ డీలర్ల సంక్షేమ సంఘం నిర్వహిస్తోంది. బంద్ కారణంగా లక్షలాది మంది లబ్దిదారులు రేపు రేషన్ సరుకులు పొందలేని పరిస్థితి ఏర్పడనుంది.
ప్రభుత్వ హామీలకు తూటాలు
ఎన్నికల ముందు తమకు నెలకు రూ. 5,000 గౌరవ వేతనం, రేషన్ సరుకులపై కమీషన్ పెంపు వంటి హామీలను ప్రభుత్వం ఇచ్చిందని రేషన్ డీలర్ల సంఘం ఆరోపించింది. అయితే ప్రభుత్వం అధికారంలోకి వచ్చిన 21 నెలలు గడుస్తున్నా, ఈ హామీలను అమలు చేయకపోవడంపై వారు తీవ్ర అసంతృప్తిని వ్యక్తం చేశారు.
రేషన్ డీలర్ల కుటుంబాలకు హెల్త్ కార్డులు జారీ చేయాలని, రేషన్ షాపుల అద్దె మరియు బియ్యం దిగుమతి ఛార్జీలను కూడా ప్రభుత్వమే భరిచేలా చర్యలు తీసుకోవాలని డీలర్లు డిమాండ్ చేస్తున్నారు.
బకాయిల చెల్లింపుల్లో నిర్లక్ష్యం
గత ఐదు నెలలుగా డీలర్లకు చెల్లించాల్సిన కమీషన్ బకాయిలు, గన్నీ బ్యాగుల బిల్లులు ఇంకా చెల్లించకపోవడంపై అసహనం పెరిగింది. ప్రభుత్వం తమ సమస్యల పట్ల నిర్లక్ష్యంగా వ్యవహరిస్తోందని రేషన్ డీలర్ల సంఘం అధ్యక్షుడు బత్తుల రమేశ్ బాబు పేర్కొన్నారు.
ప్రతిస్పందించకపోతే ఉద్యమం తీవ్రతరం
తాము చేపట్టిన ఒకరోజు బంద్‌కైనా ప్రభుత్వం స్పందించకపోతే, తమ ఉద్యమాన్ని మరింత ఉధృతం చేస్తామని డీలర్లు హెచ్చరించారు. తమ డిమాండ్లకు సంబంధించి ప్రభుత్వం తక్షణమే నిర్ణయం తీసుకోకపోతే, రాష్ట్రమంతటా నిరవధికంగా బియ్యం పంపిణీని నిలిపివేస్తామని వారు స్పష్టం చేశారు. అంతేకాక, పెండింగ్ బకాయిలు వెంటనే చెల్లించకపోతే, భవిష్యత్‌లో సచివాలయ ముట్టడి వంటి మరింత దాడి చర్యలకు దిగుతామని డీలర్లు హెచ్చరించారు. ప్రభుత్వ వైఖరిని ఖండిస్తూ, తమ హక్కుల కోసం పోరాటాన్ని కొనసాగించేందుకు సిద్ధంగా ఉన్నామని వారు పేర్కొన్నారు.
ప్రభుత్వ స్పందనపై ఉత్కంఠ
రేషన్ డీలర్ల బంద్ నేపథ్యంలో ప్రభుత్వం ఎలా స్పందిస్తుందన్న దానిపై అందరిలోనూ ఉత్కంఠ నెలకొంది. ఇప్పటికే తక్కువ ఆదాయ గల కుటుంబాలు ఆధారపడే రేషన్ పంపిణీపై ప్రభావం పడటం, సామాన్యులపై ప్రభావం చూపే అవకాశం ఉంది. దీనితో పాటు, ఇటువంటి ఆందోళనలు భవిష్యత్తులో మరింత వ్యాపించే అవకాశమూ ఉంది. ప్రభుత్వం డీలర్ల సమస్యలను సమీక్షించి, త్వరితగతిన పరిష్కారం చూపించకపోతే… రేషన్ పంపిణీ వ్యవస్థనే ముప్పులో పడేస్తుందని పలువురు నిపుణులు హెచ్చరిస్తున్నారు.