రామగుండం ఎమ్మెల్యే మక్కాన్ సింగ్ రాజ్ ఠాకూర్ చేసిన వ్యాఖ్యలు ఉమ్మడి కరీంనగర్ జిల్లా రాజకీయాల్లో పెను సంచలనం సృష్టించాయి. పెద్దపల్లి జిల్లా మంథనిలో మాజీ స్పీకర్ దుద్దిళ్ల శ్రీపాదరావు 27వ వర్ధంతి సందర్భంగా ఏర్పాటు చేసిన సభ రాజకీయ దుమారానికి కేంద్రబిందువైంది. ఈ వేదికపై రామగుండం ఎమ్మెల్యే మక్కాన్ సింగ్ రాజ్ ఠాకూర్ మాట్లాడుతూ తీవ్రస్థాయిలో విరుచుకుపడ్డారు. మంత్రి శ్రీధర్ బాబు రాష్ట్ర రాజకీయాల్లో బిజీగా ఉన్నప్పుడు, మంథని కార్యకర్తలకు తాము అండగా ఉంటామని భరోసా ఇచ్చే క్రమంలో ఆయన వాడిన భాష చర్చనీయాంశమైంది. “ఎవరైనా అడ్డంగా మాట్లాడితే అడ్డంగా నరుకుతాం” అని, ఏ సమస్య వచ్చినా తాము రెండు గంటల్లో మంథనికి చేరుకుంటామని ఆయన చేసిన వ్యాఖ్యలు సోషల్ మీడియాలో వైరల్ అయ్యాయి. ఇది కేవలం కార్యకర్తలకు ధైర్యం చెప్పడమే కాకుండా, ప్రత్యర్థులకు నేరుగా హెచ్చరికలు పంపినట్లయిందని రాజకీయ విశ్లేషకులు భావిస్తున్నారు.
పుట్ట మధు ఘాటు స్పందన
ఎమ్మెల్యే మక్కాన్ సింగ్ వ్యాఖ్యలపై బీఆర్ఎస్ నేత, మాజీ ఎమ్మెల్యే పుట్ట మధు తీవ్రంగా స్పందించారు. అంబేద్కర్ జయంతి వేడుకల సందర్భంగా ఆయన మాట్లాడుతూ.. కాంగ్రెస్ నాయకులు అరాచక రాజకీయాలకు తెరలేపుతున్నారని మండిపడ్డారు. పక్క నియోజకవర్గాల ఎమ్మెల్యేలను తీసుకొచ్చి మంథని ప్రజలను, నాయకులను చంపేస్తాం, నరికేస్తాం అని బెదిరించడం ప్రజాస్వామ్యానికి విరుద్ధమని ఆయన విమర్శించారు. ఇలాంటి బెదిరింపులకు తాము భయపడబోమని, చైతన్యవంతమైన మంథని గడ్డపై ఇలాంటి పప్పులు ఉడకవని కౌంటర్ ఇచ్చారు. ఈ పరిణామంతో మంథని నియోజకవర్గంలో మరోసారి శ్రీధర్ బాబు మరియు పుట్ట మధు వర్గాల మధ్య ఆధిపత్య పోరు బహిర్గతమైంది.
ఈ వివాదం ముదురుతుండటంతో మంత్రి శ్రీధర్ బాబు రంగంలోకి దిగి పరిస్థితిని చక్కదిద్దే ప్రయత్నం చేశారు. రామగుండం ఎమ్మెల్యే వ్యాఖ్యలను ఆయన సమర్థించడమే కాకుండా, వాటి వెనుక ఉన్న ఉద్దేశాన్ని వివరించారు. స్థానిక కాంగ్రెస్ కార్యకర్తలు కొందరు ప్రత్యర్థుల వేధింపులకు గురవుతున్నారని తన దృష్టికి వచ్చిందని, ఆ ఆవేదనతోనే జిల్లా కాంగ్రెస్ అధ్యక్షుడి హోదాలో మక్కాన్ సింగ్ అలా మాట్లాడి ఉంటారని చెప్పారు. అయితే, కాంగ్రెస్ పార్టీ ఎప్పుడూ శాంతిని కోరుకుంటుందని, ఎవరూ చట్టాన్ని చేతుల్లోకి తీసుకోవద్దని సూచిస్తూనే, కార్యకర్తలకు అండగా ఉంటామని స్పష్టం చేశారు. ఈ వివరణతో వివాదాన్ని సద్దుమణిగేలా చేసేందుకు మంత్రి ప్రయత్నించినప్పటికీ, “నరికేస్తా” అనే పదం మాత్రం రాజకీయ వర్గాల్లో హాట్ టాపిక్గానే నిలిచింది.