తెలంగాణ రాజకీయాల్లో కుటుంబ కలహాలు, పార్టీల స్థాపనపై సాగుతున్న చర్చలు ఇప్పుడు సరికొత్త మలుపు తిరిగాయి. మాజీ ముఖ్యమంత్రి కేసీఆర్ తనయ కల్వకుంట్ల కవిత కొత్త పార్టీ దిశగా అడుగులు వేస్తున్నారన్న వార్తల నేపథ్యంలో, కాంగ్రెస్ ఎమ్మెల్యే కోమటిరెడ్డి రాజగోపాల్ రెడ్డి చేసిన వ్యాఖ్యలు రాజకీయ వర్గాల్లో పెను సంచలనం సృష్టిస్తున్నాయి.
పార్టీ ఆవిర్భవ సభలో కవిత తన తండ్రి కేసీఆర్ను ఉద్దేశించి చేసిన వ్యాఖ్యలపై రాజగోపాల్ రెడ్డి తీవ్రంగా స్పందించారు. కవిత తన తండ్రిని విమర్శించడం ద్వారా ఆయన మర్యాదను పోగొట్టారని ఆయన మండిపడ్డారు. “ఉద్యమకారుడిగా కేసీఆర్ గారిపై మాకు గౌరవం ఉంది. ఒక కూతురు తన తండ్రిని అలా తిట్టడం చూస్తుంటే బాధగా అనిపిస్తోంది. అన్న (కేటీఆర్) మీద ఉన్న కోపాన్ని తండ్రి మీద చూపించడం ఏమాత్రం సరైన పద్ధతి కాదు. కూతురికి తండ్రి పట్ల ఉండాల్సిన కనీస ప్రేమ, గౌరవం ఇక్కడ కనిపించడం లేదు” అంటూ ఆయన హితవు పలికారు.
లిక్కర్ కేసు ప్రస్తావన – క్లీన్ చిట్ రాలేదు!
కవిత ఎదుర్కొంటున్న ఢిల్లీ లిక్కర్ స్కామ్ కేసును కూడా రాజగోపాల్ రెడ్డి ఈ సందర్భంగా ప్రస్తావించారు. ఆ కేసులో ఆమెకు ఇంకా పూర్తిస్థాయిలో ఊరట లభించలేదని గుర్తు చేశారు. “లిక్కర్ కేసులో కవితకు ఇంకా క్లీన్ చిట్ రాలేదు. కేసుల నుంచి తప్పించుకోవడానికో లేదా రాజకీయ ఉనికి కోసమో ప్రయత్నాలు చేస్తున్నట్లు కనిపిస్తోంది” అని ఆయన ఆరోపించారు. అవినీతి ఆరోపణలు ఎదుర్కొంటున్న తరుణంలో ఇలాంటి రాజకీయ ఎత్తుగడలు ప్రజల్లోకి తప్పుడు సంకేతాలు పంపుతాయని ఆయన అభిప్రాయపడ్డారు.
పార్టీ పెట్టడం పాన్ షాప్ పెట్టినంత సులువు కాదు
కొత్త పార్టీ స్థాపనపై వస్తున్న లీకులపై రాజగోపాల్ రెడ్డి వ్యంగ్యంగా స్పందించారు. కేవలం డబ్బు ఉందనే అహంతో పార్టీలు పెట్టలేరని ఆయన వ్యాఖ్యానించారు. “పార్టీ పెట్టడం అంటే ఏదో పాన్ షాప్ తెరిచినంత సులువు కాదు. దానికి ప్రజాబలం, సిద్ధాంతం, ప్రజల నమ్మకం కావాలి. కేవలం ఆర్థిక బలం చూసుకుని రాజకీయాల్లో నెగ్గుకురావడం అసాధ్యం” అని ఆయన స్పష్టం చేశారు. కేసీఆర్ నిర్మించిన సామ్రాజ్యాన్ని కూల్చేలా కవిత వ్యవహరిస్తున్నారని, ఇది అంతిమంగా వారికే నష్టమని ఆయన పేర్కొన్నారు.