. ఏకగ్రీవ ఎన్నికతో రాజకీయ వర్గాల్లో చర్చ
. పార్టీ నేతృత్వంలో కొత్త అధ్యాయం
. ఆరెస్సెస్ నేపథ్యం, రాజకీయ ప్రస్థానం
Nitin Nabin: భారతీయ జనతా పార్టీ (బీజేపీ) నూతన జాతీయ అధ్యక్షుడిగా నితిన్ నబీన్ ఏకగ్రీవంగా ఎన్నికయ్యారు. ప్రస్తుత అధ్యక్షుడు జేపీ నడ్డా పదవీకాలం ముగియనున్న నేపథ్యంలో పార్టీ అధిష్ఠానం ఈ కీలక నిర్ణయం తీసుకుంది. పార్టీ శ్రేణులు సీనియర్ నాయకుల సమ్మతితో నితిన్ నబీన్ను జాతీయ అధ్యక్షుడిగా ఎన్నుకోవడం విశేషంగా మారింది. రేపు ఉదయం 11 గంటలకు ఆయన అధికారికంగా పార్టీ అధ్యక్షుడిగా ప్రమాణ స్వీకారం చేయనున్నారు. ఈ సందర్భంగా దేశవ్యాప్తంగా బీజేపీ నేతలు కార్యకర్తలు ఉత్సాహం వ్యక్తం చేస్తున్నారు. నితిన్ నబీన్ ప్రస్తుతం బీజేపీ జాతీయ వర్కింగ్ ప్రెసిడెంట్గా బాధ్యతలు నిర్వహిస్తున్నారు. పార్టీ అంతర్గత వ్యవహారాలు వ్యూహాత్మక నిర్ణయాల్లో కీలక పాత్ర పోషిస్తూ ఆయన కేంద్ర నాయకత్వానికి దగ్గరగా ఉన్నారు.
జేపీ నడ్డా పదవీకాలం ముగిసే సమయానికి పార్టీకి కొత్త దిశానిర్దేశం అవసరమని భావించిన అధిష్ఠానం, అనుభవం మరియు సంస్థాగత పరిజ్ఞానం ఉన్న నేతగా నబీన్ను ఎంపిక చేసినట్లు తెలుస్తోంది. ఈ ఎన్నిక ఏకగ్రీవంగా జరగడం ఆయనపై ఉన్న విశ్వాసాన్ని ప్రతిబింబిస్తోంది. 46 ఏళ్ల నితిన్ నబీన్ బీహార్ రాష్ట్రానికి చెందినవారు. ఆయనకు రాష్ట్రీయ స్వయంసేవక్ సంఘ్ (ఆరెస్సెస్) నేపథ్యం ఉంది. చిన్న వయసులోనే సంఘ కార్యకలాపాల్లో పాల్గొన్న నబీన్ క్రమంగా బీజేపీలో కీలక స్థానాలకు ఎదిగారు. గత ఏడాది డిసెంబర్లో బీజేపీ ఆయనను జాతీయ వర్కింగ్ ప్రెసిడెంట్గా ప్రకటించింది. అప్పటి నుంచే భవిష్యత్తులో పార్టీ జాతీయ అధ్యక్షుడిగా ఆయన పేరు వినిపిస్తూ వచ్చింది. పార్టీని సంస్థాగతంగా బలోపేతం చేయడంలో యువతను ఆకర్షించడంలో ఆయన పాత్ర ముఖ్యమని నేతలు అభిప్రాయపడుతున్నారు.
నితిన్ నబీన్ బీహార్ అసెంబ్లీ ఎన్నికల్లో బాంకీపూర్ నియోజకవర్గం నుంచి నాలుగోసారి ఎమ్మెల్యేగా విజయం సాధించారు. రాష్ట్ర రాజకీయాల్లో పట్టు సాధించిన ఆయన క్రమంగా జాతీయ స్థాయిలో గుర్తింపు పొందారు. బీహార్లో పార్టీ విస్తరణకు ఎన్నికల విజయాలకు ఆయన వ్యూహాలు ఉపయోగపడ్డాయని బీజేపీ వర్గాలు చెబుతున్నాయి. ఇప్పుడు జాతీయ అధ్యక్షుడిగా బాధ్యతలు చేపట్టనున్న నేపథ్యంలో రాబోయే లోక్సభ ఎన్నికలు మరియు రాష్ట్ర అసెంబ్లీ ఎన్నికలపై ఆయన దృష్టి సారించనున్నారు. నితిన్ నబీన్ ప్రమాణ స్వీకారంతో బీజేపీలో కొత్త అధ్యాయం ప్రారంభమవుతుందని పార్టీ వర్గాలు ఆశాభావం వ్యక్తం చేస్తున్నాయి. అనుభవం సంఘ నేపథ్యం యువ నాయకత్వ లక్షణాలు కలగలిపిన ఈ నేత పార్టీని మరింత బలోపేతం చేసే దిశగా అడుగులు వేస్తారని భావిస్తున్నారు.