Telangana : తెలంగాణ రాష్ట్ర డీజీపీ జితేందర్ ఈ నెలాఖరులో పదవీ విరమణ చేయనున్న నేపథ్యంలో పోలీసు శాఖలో భారీ మార్పులకు పునాది పడుతోంది. కొత్త డీజీపీ నియామకంతోపాటు, కీలక విభాగాల్లో ఉన్నతాధికారుల బదిలీలపై ప్రభుత్వం లోతైన కసరత్తు ప్రారంభించినట్టు విశ్వసనీయ వర్గాల సమాచారం. ఈ పరిణామాల నేపథ్యంలో పోలీసు విభాగంలో ఉన్నతాధికారుల భవితవ్యంపై స్పష్టత లేని పరిస్థితి నెలకొనగా, శాఖ అంతటా ఉత్కంఠ వాతావరణం ఏర్పడింది. ప్రస్తుతం ఇంటెలిజెన్స్ చీఫ్‌గా బాధ్యతలు నిర్వర్తిస్తున్న శివధర్ రెడ్డి రాష్ట్ర నూతన డీజీపీగా నియమితులు కావడం దాదాపు ఖరారైనట్టు తెలుస్తోంది. ఆయనకు పదోన్నతి లభిస్తే ఖాళీ అయ్యే ఇంటెలిజెన్స్ చీఫ్ హోదాలో ప్రముఖ ఐపీఎస్ అధికారి, ప్రస్తుత ఆర్టీసీ ఎండీ వీసీ సజ్జనార్ నియామకానికి అవకాశాలు మెండుగా కనిపిస్తున్నాయి. పోలీసు శాఖలో వీరి అనుభవం, ప్రదర్శనను దృష్టిలో పెట్టుకుని ప్రభుత్వం ఈ నిర్ణయాలు తీసుకునే అవకాశముంది.
కేవలం డీజీపీ స్థాయికే పరిమితం కాకుండా, ఇతర కీలక విభాగాల్లోనూ అధికారులు మారనున్నారు. హైదరాబాద్ నగర పోలీసు కమిషనర్ సీవీ ఆనంద్‌ను అవినీతి నిరోధక శాఖ (ఏసీబీ) డీజీగా బదిలీ చేయాలని ప్రభుత్వం భావిస్తుండగా, ఆయన స్థానంలో అదనపు డీజీపీ (లా & ఆర్డర్) మహేశ్ భగవత్ పేరును పరిశీలిస్తున్నట్టు ప్రచారం సాగుతోంది. మహేశ్ భగవత్‌కు గ్రౌండ్ లెవల్‌లో ఉన్న అనుభవం, ఇంతకుముందు రాచకొండ కమిషనరేట్‌ను సమర్థవంతంగా నడిపిన తీరు ఆయనకు మద్దతుగా నిలుస్తున్నాయని విశ్లేషకులు భావిస్తున్నారు. ఇక, హోం శాఖ కీలక విభాగాల్లోనూ మార్పులు జరగనున్న సూచనలు కనిపిస్తున్నాయి. హోం శాఖ ప్రత్యేక ముఖ్య కార్యదర్శిగా ఉన్న రవిగుప్తాను విజిలెన్స్ విభాగానికి బదిలీ చేయాలని ప్రభుత్వ యోచనలో ఉంది. అదే సమయంలో జైళ్ల శాఖ డీజీగా ఉన్న సౌమ్యా మిశ్రాకు హోం శాఖ ముఖ్య కార్యదర్శి బాధ్యతలు అప్పగించే అవకాశాలున్నట్టు అధికార వర్గాలు పేర్కొంటున్నాయి.
సైబరాబాద్ పోలీస్ కమిషనర్ అవినాశ్ మహంతి సహా మరికొందరు కీలక పోస్టుల్లో ఉన్న అధికారులు కూడా ఈ మార్పుల్లో భాగంగా బదిలీ అయ్యే అవకాశం ఉంది. మూడు ప్రధాన కమిషనరేట్ల పరిధిలో పనిచేస్తున్న పలువురు డీసీపీలు, జిల్లాల ఎస్పీలు తదితర అధికారులు కూడా బదిలీలకు లోనయ్యే అవకాశం ఉన్నందున, పోలీసు విభాగంలో ఈ పరిణామాలు పెద్ద ఎత్తున ప్రభావం చూపనున్నాయి. ఇక, మరోవైపు, డీజీపీ జితేందర్‌కు పదవీకాల పొడిగింపు లభించే అవకాశాలపై ఊహాగానాలు పోలీసు వర్గాల్లో వినిపిస్తున్నాయి. ఇటీవల ప్రభుత్వ ప్రధాన కార్యదర్శి శాంతికుమారి పదవీ కాలం పొడిగించబడిన నేపథ్యంలో, అదే నమూనాలో జితేందర్‌కు కూడా కేంద్రం అనుమతితో పొడిగింపు వచ్చే అవకాశాన్ని కొందరు అధికారులు కొట్టిపారించడం లేదు. ఈ నేపథ్యంలో మరికొన్ని రోజులలో ప్రభుత్వం అధికారికంగా నిర్ణయాలు తీసుకునే అవకాశం ఉన్నప్పటికీ, ఇప్పుడే పోలీసు వర్గాల్లో బదిలీలపై చర్చలు, లాబీయింగ్ వేగంగా సాగుతున్నాయి. అధికారం మారిన తర్వాత తొలిసారి జరుగుతున్న ఈ స్థాయి మార్పులు, కొత్త పాలనశైలికి రూపుదిద్దనున్న సంకేతాలుగా భావించవచ్చు.