Accident : ఖమ్మం – వరంగల్ జాతీయ రహదారిపై మహబూబాబాద్ జిల్లా పరిధిలోని మరిపెడ మండలం ఎల్లంపేట స్టేజ్ సమీపంలో శుక్రవారం తెల్లవారుజామున తీవ్ర రోడ్డు ప్రమాదం చోటుచేసుకుంది. వేగంగా వచ్చిన రెండు లారీలు ఎదురెదురుగా ఢీకొనడంతో ఒక్కసారిగా వాటిలో ఒకటి లోపలే మంటలు చెలరేగాయి. ఈ ప్రమాదంలో ముగ్గురు కార్మికులు సజీవదహనం కాగా, మరో వ్యక్తి పరిస్థితి అత్యంత విషమంగా ఉంది.
పోలీసుల సమాచారం మేరకు, ఒక లారీ విజయవాడ నుంచి పౌల్ట్రీ ముడి పదార్థాలతో గుజరాత్‌ వైపు వెళ్తుండగా, మరో గ్రానైట్ లోడ్ లారీ వరంగల్ నుండి ఖమ్మం వైపు వస్తోంది. వీటి మధ్య ఎదురెదురుగా ఢీకొన్న వేళ, ఒక్కసారిగా ఒక లారీ క్యాబిన్‌లో మంటలు ఎగిసిపడ్డాయి. ఈ ఘటనతో లారీ లోపలే ముగ్గురు వ్యక్తులు సజీవంగా కాలిపోయారు. మరో క్షతగాత్రుడిని ఆసుపత్రికి తరలించగా, అతని ఆరోగ్యం విషమంగా ఉన్నట్లు సమాచారం.
సమాచారం అందుకున్న వెంటనే పోలీసులు, అగ్నిమాపక సిబ్బంది ఘటన స్థలానికి చేరుకుని మంటలను అదుపులోకి తెచ్చారు. క్యాబిన్‌లో ఉన్న మృతదేహాలను బయటకు తీశారు. వీరి వివరాలు గుర్తించాల్సి ఉంది.
ఈ ప్రమాదం నేపథ్యంలో ఖమ్మం – వరంగల్ హైవే పై భారీగా ట్రాఫిక్ జామ్ ఏర్పడింది. పోలీసులు రవాణా వ్యవస్థను పునరుద్ధరించే పనిలో నిమగ్నమయ్యారు. ఈ ఘటనపై కేసు నమోదు చేసి విచారణ ప్రారంభించినట్లు అధికారులు తెలిపారు.
Taliban : తాలిబాన్ ప్రభుత్వానికి రష్యా అధికార గుర్తింపు.. అంతర్జాతీయ రాజకీయాల్లో కీలక మలుపు