KTR: గత పదేళ్లపాటు తెలంగాణ ఐటీ మంత్రిగా పనిచేసిన కేటీఆర్.. నేడు రైతుల సంక్షేమం కోసం ప్రభుత్వం ప్రవేశపెట్టిన టెక్నాలజీని వ్యతిరేకించడంపై రాజకీయ వర్గాల్లో తీవ్ర చర్చ నడుస్తోంది. రైతులకు ఇంటి వద్దకే ఎరువులు అందించే సరికొత్త సాంకేతికతపై ఆయన చేసిన వ్యాఖ్యలు బాధ్యతారాహిత్యంగా ఉన్నాయని విమర్శలు వెల్లువెత్తుతున్నాయి.
ఐటీ మంత్రిగా పదేళ్ల అనుభవం.. తీరా చూస్తే ఇదా?
రాష్ట్ర ఐటీ ముఖచిత్రాన్ని మార్చానని చెప్పుకునే కేటీఆర్, రైతులకు మేలు చేసే యాప్ ఆధారిత ఎరువుల పంపిణీని వ్యతిరేకించడం విడ్డూరంగా ఉందని రాజకీయ విశ్లేషకులు అభిప్రాయపడుతున్నారు. దశాబ్దాలుగా ఎరువుల కోసం రైతులు ఎండలో, వానలో క్యూ లైన్లలో నిలబడి పడుతున్న ఇబ్బందులు కేటీఆర్కు కనిపించడం లేదా అని ప్రశ్నలు తలెత్తుతున్నాయి. ఐటీ అంటే కేవలం హైటెక్ సిటీకి పరిమితం కావాలా? గ్రామాలకు, రైతులకు టెక్నాలజీ అక్కర్లేదా? అని కాంగ్రెస్ నాయకులు ప్రశ్నిస్తున్నారు.
Also Read: మన శరీరంలోని అవయవాలకు హాని కలిగించే ఆహారాల లిస్ట్ ఇదే!
రైతులు అలసత్వం పెంచుకుంటారా?
గ్రామాలకు, రైతులకు ఐటీ సేవలు అందిస్తే వారు అలసత్వం పెంచుకుంటారని కేటీఆర్ చేసిన వ్యాఖ్యలు ఆయన వెనుకబడిన ఆలోచనా విధానానికి నిదర్శనమని కాంగ్రెస్ వర్గాలు విమర్శించాయి. “సాంకేతికత అనేది మనిషి కష్టాన్ని తగ్గించడానికి, వారిని శక్తివంతులను చేయడానికి ఉపయోగపడాలి. కానీ, రైతులు పాత పద్ధతుల్లోనే కష్టపడాలి, క్యూలలో నిలబడాలి అనడం ఎంతవరకు సమంజసం?” అని నేతలు నిలదీస్తున్నారు.
పల్లె పల్లెకు అభివృద్ధి
ముఖ్యమంత్రి రేవంత్ రెడ్డి నేతృత్వంలోని ప్రభుత్వం అభివృద్ధి కేవలం నగరాలకే పరిమితం కాకూడదని నమ్ముతోంది. అందుకే ప్రతి గ్రామానికి, ప్రతి రైతుకు టెక్నాలజీని చేరువ చేస్తోంది. ఎరువుల కోసం రైతులు ఇబ్బంది పడకుండా, ఇంటి వద్దకే డెలివరీ చేసే విధానం రైతు సాధికారతకు నిదర్శనమని ప్రభుత్వం భావిస్తోంది.
పంచాయతీ ఎన్నికల్లో ప్రజల తీర్పు
కేటీఆర్ ఈ అహంకారపూరిత వైఖరి, గ్రామాలను నిర్లక్ష్యం చేసే ధోరణి వల్లే బీఆర్ఎస్ క్షేత్రస్థాయిలో పట్టు కోల్పోయిందని విశ్లేషణలు వస్తున్నాయి. ప్రస్తుతం జరుగుతున్న పంచాయతీ ఎన్నికల ఫలితాలే ఇందుకు నిదర్శనం. కాంగ్రెస్ ఇప్పటికే రెండు దశల్లో ఘన విజయం సాధించింది. మూడో దశలోనూ అదే జోరు కొనసాగిస్తూ విజయం దిశగా సాగుతోంది.