KTR : తెలంగాణలో రాజకీయ విమర్శల హీట్ మళ్లీ పెరుగుతోంది. భారత రాష్ట్ర సమితి (బీఆర్‌ఎస్) వర్కింగ్ ప్రెసిడెంట్, మాజీ మంత్రి కల్వకుంట్ల తారక రామారావు (కేటీఆర్) మరోసారి కాంగ్రెస్ ప్రభుత్వంపై తీవ్ర స్థాయిలో ఆగ్రహం వ్యక్తం చేశారు. అధికారంలోకి వచ్చి అప్పటినుండి పౌరులకు హామీగా ప్రకటించిన ఆరు గ్యారంటీలు అమలు చేయడంలో విఫలమైన కాంగ్రెస్ పార్టీ ప్రజలను మోసం చేస్తోందని ఆయన ఆరోపించారు. ఈ నేపథ్యంలో ఆయన సోషల్ మీడియా వేదికగా ఘాటుగా స్పందిస్తూ, కాంగ్రెస్ ప్రభుత్వ కుట్రలు, విచారణలు, కమిషన్లతో తాము వెనక్కి తగ్గే ప్రసక్తే లేదని స్పష్టం చేశారు.
“మా ఆరాటాన్ని విచారణలతో ఆపలేరు, మా ఉద్యమాన్ని కమిషన్లతో అణచలేరు. ప్రభుత్వం చెప్పిన ఆరు గ్యారంటీలు ఇప్పటివరకు కేవలం మోసగాళ్ల హామీలుగానే మిగిలిపోయాయి. కాంగ్రెస్ పార్టీ 420 డిక్లరేషన్లతో ప్రజలను మోసం చేస్తోంది. మేము ఈ మోసాన్ని ఎండగడతూనే ఉంటాం” అని కేటీఆర్ తెలిపారు. “ఎన్ని కుట్రలు చేసినా మేము తగ్గేది లేదు” అంటూ ఆయన గట్టి హెచ్చరికలు జారీ చేశారు.
ఈ నేపథ్యంలో కేటీఆర్ నేడు ఫార్ములా ఈ-కారు రేసు కేసుకు సంబంధించి మరోసారి ఏసీబీ విచారణకు హాజరుకానున్నారు. గతంలోనూ ఈ కేసులో ఆయనను అవినీతి నిరోధక శాఖ (ఏసీబీ)తో పాటు ఎన్‌ఫోర్స్‌మెంట్ డైరెక్టరేట్ (ఈడీ) అధికారులు పలుమార్లు విచారించారు. ఫార్ములా ఈ ఆపరేషన్ సంస్థ ప్రతినిధులను వీడియో కాన్ఫరెన్స్‌ ద్వారా ప్రశ్నించిన అధికారులు, ఇప్పటి వరకు సేకరించిన సమాచారం ఆధారంగా విచారణను మరింత లోతుగా సాగిస్తున్నారు.
ఈ కేసులో ఆరోపణలు ఎదుర్కొంటున్న అప్పటి పురపాలక శాఖ ముఖ్య కార్యదర్శి అరవింద్ కుమార్, హెచ్‌ఎండీఏ మాజీ చీఫ్ ఇంజనీర్ బీఎల్‌ఎన్ రెడ్డి ఇప్పటికే ఇచ్చిన వాంగ్మూలాలను పరిశీలించిన ఏసీబీ అధికారులు… నిధుల మళ్లింపు, క్యాబినెట్ అనుమతి లేకుండా తీసుకున్న నిర్ణయాలు, సచివాలయ బిజినెస్ రూల్స్ ఉల్లంఘన అంశాలపై కేటీఆర్‌ను ప్రశ్నించేందుకు సన్నాహాలు చేస్తున్నట్లు సమాచారం.
ఈ విచారణలపై ఇప్పటికే బీఆర్‌ఎస్ అధినేతలు రాజకీయ ప్రతీకార ధోరణిగా అభివర్ణిస్తున్నారు. అదే సమయంలో కాంగ్రెస్ ప్రభుత్వంపై ప్రజల మనసుల్లో అనుమానాలు చెలరేగేలా కేటీఆర్ విమర్శలు మరింత రాజకీయం రగిలిస్తున్నాయి.
CM Chandrababu : విజయవాడ నుంచి ప్రత్యేక విమానంలో విశాఖకు సీఎం చంద్రబాబు