ఉమ్మడి మహబూబ్నగర్ జిల్లాలో చారిత్రాత్మక ప్రాధాన్యం కలిగిన కృష్ణ రైల్వే స్టేషన్ ఇప్పుడు అభివృద్ధి దిశగా అడుగులు వేస్తోంది. 1908లో బ్రిటిష్ పాలనలో మీటర్ గేజ్ లైన్తో ప్రారంభమైన ఈ స్టేషన్కు వందేళ్లకు పైగా చరిత్ర ఉంది. అయితే ఈ నాటి వరకు అభివృద్ధి పనులు గణనీయంగా జరగకపోవడంతో స్థానిక ప్రజలు, ప్రయాణికులు తీవ్ర ఇబ్బందులు ఎదుర్కొంటున్నారు. చాలా కాలంగా నిర్లక్ష్యానికి గురైన ఈ స్టేషన్పై ఇప్పుడు కేంద్ర ప్రభుత్వం ప్రత్యేక దృష్టి సారించింది. నారాయణపేట జిల్లాలో ఉన్న ఈ స్టేషన్ అభివృద్ధి కోసం ప్రభుత్వం రూ.16 కోట్ల నిధులను మంజూరు చేసింది. ఈ నిర్ణయంతో స్థానిక ప్రజల్లో ఉత్సాహం నెలకొంది.
కృష్ణ రైల్వే స్టేషన్ ప్రాముఖ్యతను దృష్టిలో ఉంచుకుని, రానున్న కృష్ణ పుష్కరాలకు ముందు పూర్తి స్థాయి ఆధునికీకరణ కార్యక్రమాలను చేపట్టాలని రైల్వే శాఖ నిర్ణయించింది. ఇప్పటికే దేవరకద్ర–కృష్ణ లైన్ ప్రారంభమై ఉండగా, వికారాబాద్–కృష్ణ లైన్ పనులు ప్రారంభించేందుకు ఆదేశాలు జారీ అయ్యాయి. దీని ద్వారా ఈ స్టేషన్ “కృష్ణ జంక్షన్”గా మారనుంది. పుష్కరాల సమయంలో భక్తులు, ప్రయాణికులు భారీ సంఖ్యలో వచ్చే అవకాశం ఉన్నందున, స్టేషన్ను అన్ని సదుపాయాలతో తీర్చిదిద్దేందుకు ప్రణాళికలు సిద్ధం చేశారు. దీని ఫలితంగా ప్రయాణికుల సంఖ్య గణనీయంగా పెరగడం మాత్రమే కాకుండా, రైళ్ల నిలుపుదల సమయాలు కూడా పెరగనున్నాయి. ఇది మొత్తం ప్రాంత ఆర్థికాభివృద్ధికి దోహదం చేసే అవకాశం ఉంది.
రైల్వే అధికారులు తెలిపిన వివరాల ప్రకారం, రూ.16 కోట్ల నిధులతో రెండు కొత్త ప్లాట్ఫారాలు, లిఫ్ట్లు, ఎక్సలేటర్లు, కార్–బైక్ పార్కింగ్ సౌకర్యాలు, వెయిటింగ్ హాల్లు, అధునాతన ప్రాంగణాలు నిర్మించనున్నారు. అదనంగా సిబ్బంది కోసం కొత్త భవనాలు, ప్రయాణికులకు తాగునీటి ట్యాంకులు, రైళ్లకు వాటరింగ్ సదుపాయాలు ఏర్పాటు చేయనున్నారు. గుంతకల్లు డివిజన్ మేనేజర్ ఇప్పటికే కృష్ణ స్టేషన్ను సందర్శించి, అభివృద్ధి పనుల ప్రణాళికను సమీక్షించారు. 2027లో జరిగే కృష్ణ పుష్కరాల నాటికి ఈ ప్రాజెక్టు పూర్తి అవుతుందని అధికారులు నమ్ముతున్నారు. ఈ అభివృద్ధి ద్వారా కృష్ణ రైల్వే స్టేషన్ దక్షిణ తెలంగాణలో ఒక కీలక ట్రాన్సిట్ హబ్గా మారి, భవిష్యత్తులో రైల్వే నెట్వర్క్ విస్తరణకు కేంద్ర బిందువుగా నిలిచే అవకాశం ఉంది.