Malla Reddy : తెలంగాణ రాజకీయాల్లో సంచలనంగా మారిన బీఆర్ఎస్ ఎమ్మెల్సీ కల్వకుంట్ల కవిత సస్పెన్షన్ అంశంపై పార్టీ ఎమ్మెల్యే, మాజీ మంత్రి మల్లారెడ్డి స్పందించారు. బీఆర్ఎస్ అధినేత కేసీఆర్ తీసుకున్న నిర్ణయం పూర్తిగా సముచితమని, పార్టీ క్రమశిక్షణ విషయంలో ఆయన ఎప్పుడూ రాజీపడరని పేర్కొన్నారు. కుటుంబ బంధాలను పక్కన పెట్టి పార్టీ పట్ల విధేయత చూపడమే నిజమైన నాయకత్వ లక్షణమని, ఈ చర్యతో అది మరింత స్పష్టమైందని మల్లారెడ్డి అభిప్రాయపడ్డారు. హైదరాబాద్ బోయిన్పల్లిలోని శ్రీ వెంకటేశ్వర లారీ అసోసియేషన్ ఆధ్వర్యంలో నిర్వహించిన వినాయక చవితి పూజా కార్యక్రమంలో పాల్గొన్న అనంతరం మల్లారెడ్డి మీడియాతో మాట్లాడుతూ..కవిత సస్పెన్షన్ను సమర్థించారు. ప్రతి కుటుంబంలో చిన్నపాటి విభేదాలు ఉంటాయి.
Read Also: Revanth Reddy : నేను ఎవరి వెనుకా లేను..మీ కుటుంబ పంచాయితీలోకి మమ్మల్ని లాగొద్దు : సీఎం రేవంత్రెడ్డి
అదే విధంగా ప్రతి రాజకీయ పార్టీలోనూ అలాంటి పరిణామాలు జరుగుతుంటాయి. పార్టీ క్రమశిక్షణకు తూట్లు పొడిచిన ఎవరిపైనా చర్యలు తీసుకోవడమే సబబు. అది ఎవరైనా సరే, పార్టీకి అత్యంత ప్రాధాన్యం ఇవ్వాల్సిందే. కేసీఆర్ కూడా ఇదే మంత్రాన్ని పాటించారు అని వివరించారు. మల్లారెడ్డి అభిప్రాయప్రకారం, తెలంగాణ రాష్ట్రం కోసం కేసీఆర్ చేసిన త్యాగాలు తక్కువ కావు. అలాంటి నాయకుడిని ఈరోజు విమర్శించడం దురదృష్టకరమని అన్నారు. తన కుమార్తె అయినా, కుమారుడైనా పార్టీ నిబంధనలు అతిక్రమిస్తే చర్యలుంటాయన్న విషయాన్ని కేసీఆర్ మరోసారి చాటిచెప్పారు. పార్టీపై విశ్వాసం ఉంచి పనిచేయడమే మనందరి బాధ్యత అని చెప్పారు. ఇదే సందర్భంలో ఆయన కాళేశ్వరం ప్రాజెక్టు పై కాంగ్రెస్ ప్రభుత్వం చేస్తున్న విమర్శలపై తీవ్ర ఆగ్రహం వ్యక్తం చేశారు. కాంగ్రెస్ పార్టీ ప్రజలను తప్పుదోవ పట్టించే దుష్ప్రయత్నాలు చేస్తోందని, బీఆర్ఎస్ ప్రభుత్వాన్ని దుష్ప్రచారంతో ఇబ్బందిపెట్టాలని చూస్తోందని విమర్శించారు.
కాళేశ్వరం ప్రాజెక్టు రాష్ట్రాభివృద్ధికి సంకేతం. అలాంటి ప్రాజెక్టుపై ఆరోపణలు చేయడం అనైతికం. కాంగ్రెస్ పార్టీ డ్రామాల ద్వారా ప్రజల దృష్టిని మళ్లించాలనుకుంటోంది. సీబీఐ విచారణ పేరుతో కేసీఆర్ను లక్ష్యంగా చేసుకోవడం సరికాదు. దేశానికి, రాష్ట్రానికి గౌరవాన్నిచ్చే నేతను నిందించడం సిగ్గు చేటు అని మల్లారెడ్డి పేర్కొన్నారు. అంతేకాకుండా సీబీఐ వచ్చినా, ఏవరు వచ్చినా నిజం బయటపడదు. ఎందుకంటే కేసీఆర్ పాలన క్లీన్. ప్రజల నమ్మకాన్ని గెలుచుకున్న నాయకుడు ఆయన. అలాంటి నాయకుడిని రాజకీయ ప్రయోజనాల కోసం లక్ష్యంగా చేసుకోవడం తగదు అని ఆయన స్పష్టం చేశారు. పార్టీ నాయకత్వం పట్ల భక్తి, ప్రజల సంక్షేమం పట్ల నిబద్ధతే నిజమైన రాజకీయ విలువలు అని మల్లారెడ్డి పేర్కొన్నారు. పార్టీలో క్రమశిక్షణ అనేది ఎవరికైనా వర్తిస్తుందని, కేసీఆర్ తీసుకున్న నిర్ణయాన్ని ప్రతి కార్యకర్త గౌరవించాల్సిందేనని పేర్కొన్నారు.